ສຳນັກຂ່າວຕ່າງປະເທດ ລາຍງານໃນວັນທີ 14 ທັນວານີ້ວ່າ ເວລາປະມານ 06:30 ໂມງ ຂອງວັນທີ 13 ທັນວາ (ຕາມເວລາໃນທ້ອງຖິ່ນ) ກະຊວງປ້ອງກັນປະເທດຣັດເຊຍ ໄດ້ຖະແຫລງວ່າ ເຮືອກ່ຳປັ່ນສູ້ຮົບຂອງຕົນ ໄດ້ຍິງປືນສະກັດໃສ່ ເຮືອປະມົງຂອງຕວກກີລຳໜຶ່ງ ທີ່ກຳລັງແມ່ນມຸ່ງໜ້າເຂົ້າມາຕຳ ຈາກທາງດ້ານຂວາ ຢູ່ໃນທະເລອີຈຽນ ນອກຊາຍຝັ່ງປະເທດເກຣັກ ຊຶ່ງຕໍ່ມາຣັດເຊຍໄດ້ຮຽກເອົາ ຜູ່ຊ່ວຍທູດທະຫານຕວກກີ ປະຈຳນະຄອນຫລວງມົດສະກູເຂົ້າພົບ ເພື່ອປະທ້ວງ ແລະ ຂໍຊີ້ແຈງເຖິງເຫດການ.

ກະຊວງປ້ອງກັນປະເທດຣັດເຊຍ ໄດ້ອະທິບາຍວ່າ ລູກເຮືອຂອງກອງທັບຕົນ ເຫັນເຮືອປະມົງຂອງຕວກກີ ຊຶ່ງຢູ່ຫ່າງໄປປະມານ 1,000 ແມັດ ແລ່ນເຂົ້າມາຫາເຮືອຕົນ ຈຶ່ງພະຍາຍາມຕິດຕໍ່ທາງວິທະຍຸ ແລະ ສົ່ງສັນຍານເຕືອນຫລາຍຄັ້ງ ແຕ່ກໍບໍ່ໄດ້ຮັບການຕອບສະໜອງ ຈົນພາຍຫລັງເຮືອລຳດັ່ງກ່າວ ແລ່ນເຂົ້າມາຮອດໄລຍະ 600 ແມັດ ລູກເຮືອຈິ່ງໃຊ້ປືນຂະໜາດນ້ອຍຍິງສະກັດ ໂດຍຮູ້ດີວ່າ ໃນໄລຍະດັ່ງກ່າວ ແມ່ນບໍ່ເປັນອັນຕະລາຍໃດໆ ເພື່ອປ້ອງກັນ ແລະ ເຕືອນຂັ້ນສຸດທ້າຍ ບໍ່ໃຫ້ເຮືອລຳດັ່ງກ່າວແລ່ນມາຕຳ.