ງານສະເຫຼີມສະຫຼອງ ຫຼວງພະບາງເຂົ້າເປັນມໍລະດົກໂລກ ຄົບຮອບ 20 ປີຈັດຂຶ້ນຢ່າງຍິ່ງໃຫຍ່ ໃນຕອນເຊົ້າວັນທີ 9 ທັນວາ 2015 ນີ້ ໂດຍ ມີພິທີເປີດ ງານຢ່າງເປັນທາງ ການທີ່ໜ້າຫໍພິພິທະພັນແຫ່ງ ຊາດ ຫຼວງພະບາງ ໂດຍການ ເປັນກຽດເຂົ້າຮ່ວມຂອງທ່ານ ຈູມມາລີ ໄຊຍະສອນ ເລຂາທິການ ໃຫຍ່ປະທານປະເທດ, ທ່ານ ພັນຄຳ ວິພາວັນ ຮອງນາຍົກລັດຖະມົນຕີ ລັດຖະມົນຕີວ່າການກະຊວງສຶກສາທິການ ແລະ ກິລາ, ຜູ້ຊີ້ນຳວຽກ ງານວັດ ທະນະທຳ-ສັງຄົມ, ປະ ທານຄະນະກຳມະການລະດັບ ຊາດ ເພື່ອມໍລະດົກໂລກ, ທ່ານ ນາງ ແອນ ເລີແມດ ຜູ້ຕາງໜ້າ ອົງການອຸຍແນັດສະໂກ, ທ່ານ ຄຳຂັນ ຈັນທະວີສຸກ ເຈົ້າແຂວງ ຫຼວງພະບາງ ພ້ອມດ້ວຍລັດ ຖະມົນຕີວ່າການ, ຊ່ວຍວ່າ ການ, ບັນດາທູຕານຸທູດຕ່າງ ປະເທດ ແລະ ອົງການຈັດຕັ້ງ ສາກົນ ປະຈຳລາວ, ແຂກຮັບ ເຊີນທັງພາຍໃນ ແລະ ຕ່າງປະ ເທດ ຕະຫຼອດຮອດມວນຊົນ ຊາວແຂວງຫຼວງພະບາງເປັນ ຈຳນວນຫຼວງຫຼາຍ.
ໃນພິທີ, ພາຍຫຼັງທ່ານ ສາຍສະໝອນ ຄົມທະວົງ ຕາງໜ້າການນຳຂອງແຂວງ ໃນນາມປະທານຄະນະກຳມະການລະດັບທ້ອງຖິ່ນ ເພື່ອມໍລະດົກໂລກ ປະທານກະກຽມການສະເຫຼີມສະຫຼອງ ໄດ້ລາຍງານການກະກຽມຈັດງານສະເຫຼີມສະຫຼອງຫຼວງພະບາງ ເຂົ້າ ເປັນມໍລະດົກໂລກ ຄົບຮອບ 20 ປີແລ້ວ, ທ່ານ ພັນຄຳ ວິພາວັນ ໄດ້ມີຄຳເຫັນກ່າວເປີດງານຢ່າງເປັນທາງການ ຊຶ່ງມີບາງຕອນກ່າວວ່າ: ຜ່ານຂະບວນວິວັດແຫ່ງ ການປົກປັກຮັກສາ ແລະ ພັດທະນາເມືອງ ຫຼວງພະບາງມໍລະດົກໂລກ ມີທັງຂໍ້ສະດວກ, ຂໍ້ຫຍຸ້້ງຍາກ ແລະ ສິ່ງທ້າທາຍຫຼາຍປະການ ແຕ່ພາຍໃຕ້ ການຊີ້ນຳໆພາ ຂອງພັກ ແລະ ລັດຖະບານ ບວກກັບການສະໜັບສະໜູນ ດ້ານງົບປະມານຂອງລັດຖະບານ ແຫ່ງ ສປປ ລາວ ແລະ ອົງການ ອຸຍແນັດສະໂກ, ລັດ ຖະບານປະເທດ ຝຣັ່ງ ແລະ ບັນດາຄູ່ຮ່ວມພັດທະນາ ເຮັດ ໃຫ້ເມືອງຫຼວງພະບາງ ໄດ້ຮັບການປົກປັກຮັກສາ ແລະ ພັດທະນາເປັນເມືອງມໍລະດົກ ໂລກ ທີ່ຄົງຄຸນຄ່າ, ຍືນຍົງຕະ ຫຼອດມາ ແລະ ກາຍເປັນເມືອງ ຍອດນິຍົມແຫ່ງການທ່ອງທ່ຽວ ຂອງໂລກຫຼາຍປີຊ້ອນ.
ໂອກາດນີ້, ທ່ານ ຈູມມາລີ ໄຊຍະສອນ ປະທານປະເທດ ໄດ້ໃຫ້ກຽດລັ່ນຄ້ອງ 9 ບາດ ພ້ອມທັງຕັດແຖບຜ້າປ່ອຍ ໝາກປູມເປົ້າເປີດງານສະເຫຼີມ ສະຫຼອງຫຼວງພະບາງເຂົ້າເປັນ ມໍລະດົກໂລກຄົບຮອບ 20 ປີຢ່າງເປັນທາງການ. ຈາກນັ້ນໄດ້ຈັດພິທີປະດັບຫຼຽນນາມມະຍົດດີເດັ່ນແຫ່ງຊາດ ດ້ານ ການພັດທະນາ ແລະ ປົກປັກຮັກສາມໍລະດົກໂລກໃຫ້ເມືອງຫຼວງພະບາງຢ່າງສົມກຽດ. ຕໍ່ມາຂະບວນກ້ອນກຳລັງຕ່າງໆໄດ້ ແຫ່ອອກຈາກ ໜ້າຫໍພິພິ ທະພັນຫຼວງພະບາງ ໄປຕາມເສັ້ນທາງສີສະຫວ່າງວົງ ແລະ ໄປສິ້ນສຸດຢູ່ວັດຊຽງທອງໂດຍມີທັງໝົດ 27 ຂະບວນຊຶ່ງເລີ່ມຕົ້ນດ້ວຍຂະບວນກອງດຸລິ ຍາງຂອງນ້ອງນ້ອຍເຍົາວະຊົນທັນວາ, ຂະບວນປູ່ເຍີ – ຍ່າເຍີ, ເຖົ້າແກ່ຖືຂັນດອກໄມ້, ຂະບວນປ້າຍມໍລະດົກ, ປ້າຍລາງວັນຄຳເມືອງຍອດນິຍົມ ໃນ ການທ່ອງທ່ຽວຂອງໂລກ, ເມືອງປອດຄວັນຢາສູບ, ເມືອງສິ່ງແວດລ້ອມທີ່ຍືນຍົງຂອງອາຊຽນ ແລະ ຂະບວນອື່ນທີ່ສະແດງເຖິງວັດທະນະທຳອັນດີ ງາມຂອງຊາວເມືອງມໍລະດົກ ໂລກຫຼວງພະບາງ, ພ້ອມໆກັບຂະບວນແຫ່ຊ້າງຈຳນວນ 20 ເຊືອກນຳຂະບວນໂດຍນາງພະຍາຊ້າງເຜືອກແກ້ວມິ່ງ ເມືອງລາວຢ່າງຍິ່ງໃຫຍ່

ແຫ່ລງຂ່າວ