ສຳນັກຂ່າວຕ່າງປະເທດ ລາຍງານໃນວັນທີ 9 ທັນວານີ້ວ່າ ທ່ານ ເຊີເກ ຊອຍກູ ລັດຖະມົນຕີວ່າການ ກະຊວງປ້ອງກັນປະເທດຣັດເຊຍ ໄດ້ເປີດເຜີຍວ່າ ເຮືອດຳນ້ຳຂອງກອງທັບຣັດເຊຍ ໄດຍິງລູກສອນໄຟພິໄສໄກ ຈາກທະເລເມດິແຕຣານຽນ ເຂົ້າໃສ່ຖານທີ່ໝັ້ນຂອງກຸ່ມໄອເອັສ ຊຶ່ງລວມທັງໂຮງງານນ້ຳມັນຂອງກຸ່ມດັ່ງກ່າວ 2 ຈຸດ ທາງພາກເໜືອຂອງປະເທດຊີຣີ ສ້າງຄວາມເສຍຫາຍຢ່າງໜັກໜ່ວງ ໂດຍໄດ້ມີການແຈ້ງ ໃຫ້ແກ່ຝ່າຍສະຫະລັດອາເມຣິກາ ແລະ ອິດສະລາແອນຮັບຊາບ ກ່ຽວກັບການຍິງຂີປະນາວຸດຄັ້ງນີ້ ລ່ວງໜ້າແລ້ວ.

ທັງນີ້ ການຍິງລູກສອນໄຟໂຈມຕີດັ່ງກ່າວ ແມ່ນເປັນຄັ້ງທຳອິດທີ່ ກອງທັບຣັດເຊຍ ທຳການຍິງຈາກເຮືອດຳນ້ຳ ເພື່ອໂຈມຕີກຸ່ມໄອເອັສ ໃນປະເທດຊີຣີ ເນື່ອງຈາກໃນໄລຍະຜ່ານມາ ແມ່ນມີການຍິງໂຈມຕີ ຈາກເຮືອກ່ຳປັ່ນສູ້ຮົບ ແລະ ທາງອາກາດເທົ່ານັ້ນ.