ເຊົ້າວັນທີ 7 ທັນວານີ້, ກະຊວງການຕ່າງປະເທດໄດ້ຈັດກອງປະຊຸມສຳມະນາກ່ຽວກັບກົນໄກສິດທິມະນຸດສາກົນ, ພາກພື້ນ ແລະ ລະດັບຊາດຂຶ້ນ, ໂດຍທ່ານ ອາລຸນແກ້ວ ກິດຕິຄຸນ ລັດຖະມົນຕີຊ່ວຍວ່າການກະຊວງການຕ່າງປະເທດ, ມີບັນດາທຸຕານຸທູດ, ອົງການຈັດຕັ້ງສາກົນປະຈຳລາວ,ພ້ອມດ້ວຍຜູ້ຊ່ຽວຊານດ້ານສິດທິມະນຸດຈາກອົດສະຕຣາລີ, ກຳປູເຈຍ, ອິນໂດເນເຊຍ, ອິນເດຍ, ໄທ ແລະ ຂະແໜງການກ່ຽວຂ້ອງຕ່າງໆເຂົ້າຮ່ວມນຳ.
ລັດຖະມົນຕີຊ່ວຍວ່າການກະຊວງການຕ່າງປະເທດໄດ້ກ່າວວ່າ: ກອງປະຊຸມຄັ້ງນີ້, ແມ່ນເພື່ອເສີມສ້າງຄວາມສາມາດ ແລະ ຄວາມເຂົ້າໃຈກ່ຽວກັບກົນໄກສິດທິມະນຸດໃຫ້ແກ່ເຈົ້າໜ້າທີ່, ຂະແໜງການທີ່ກ່ຽວຂ້ອງ ແລະ ພາກສ່ວນອື່ນໆທີ່ມີສ່ວນຮ່ວມໃນ ສປປ ລາວ ທັງເປັນກິດຈະກຳເພື່ອຮ່ວມກັບວົງຄະນະ
ຍາດສາກົນໃນການລະນຶກວັນສິດທິມະນຸດສາກົນໃນວັນທີ 10 ທັນວາ 2015 ນີ້, ເຊິ່ງເປັນວັນຄົບຮອບ 67 ປີທີ່ສະມັດຊາໃຫຍ່ສະຫະປະຊາຊາດໄດ້ຮັບຮອງເອົາຖະແຫຼງການສາກົນວ່າດ້ວຍດ້ານສິດທິມະນຸດໃນປີ 1948.
ສປປ ລາວ, ໄດ້ເຄື່ອນໄຫວຢ່າງຕັ້ງໜ້າໃນຂອບຂອງສະພາສິດທິມະນຸດຂອງອົງການສະ ຫະປະຊາຊາດ, ນອກນີ້ ສປປ ລາວ ຍັງໄດ້ພົວພັນ ແລະ ຮ່ວມມືກັບບັນດາອົງການກ່ຽວຂ້ອງທີ່ເຮັດວຽກສົ່ງເສີມ ແລະ ປົກປ້ອງສິດທິມະນຸດ, ຊຶ່ງປັດຈຸບັນ ສປປ ລາວ, ໄດ້ເຂົ້າເປັນພາຄີສົນທິສັນ ຍາດ້ານສິດທິມະນຸດຂອງສະຫະປະຊາຊາດ 7 ສະບັບ ແລະ ອະນຸສັນຍາ 2 ສະບັບໃນປີ 2015 ແລະ ຍັງໄດ້ຮັບເອົາຂໍ້ສະເໜີແນະຂອງສາກົນຈຳນວນ 116 ຂໍ້, ອັນໄດ້ສະແດງເຖິງຄວາມໝັ້ນໝາຍ ແລະນະໂຍບາຍອັນຖືກຕ້ອງເປັນທຳຂອງລັດຖະບານລາວໃນການສົງເສີມ ແລະ ປົກປ້ອງສິດທິມະນຸດ.ນອກນັ້ນ, ຍັງມີຄະນະກຳມາທິການເພື່ອຄວາມກ້າວໜ້າຂອງແມ່ຍິງແຫ່ງຊາດ, ຄະນະກຳມາທິການເພື່ອແມ່ ແລະ ເດັກແຫ່ງຊາດ, ຄະນະກຳມາທິການແຫ່ງຊາດເພື່ອຄົນພິການ ແລະ ຜູ້ສູງອາຍຸ.ປັດຈຸບັນພັກ ແລະ ລັດຖະບານ ໄດ້ສືບຕໍ່ປັບປຸງກົດໝາຍ ແລະ ນິຕິກຳພາຍໃນ ເພື່ອເປັນບ່ອນອີງໃນການຮັບປະກັນສິດ ແລະ ພັນທະຂອງພົນລະເມືອງ ເພື່ອຕອບສະຫນອງຄວາມຮຽກຮອງຕ້ອງການຂອງການພັດທະນາເສດຖະກິດ-ສັງຄົມ ແລະ ການສົ່ງເສີມສິດທິມະນຸດຂອງປະຊາຊົນລາວບັນດາເຜົ່າ, ເພື່ອເສີມຂະຫຍາຍສິດເປັນເຈົ້າຂອງປະເທດຊາດ, ສິດປະຊາທິປະໄຕຂອງປະຊາຊົນລາວບັນດາເຜົ່າພາຍໃຕ້ລະບອບປະຊາທິປະໄຕ ປະຊາຊົນ, ຮັບປະກັນການເຄົາລົບສິດທິມະນຸດ.
ກອງປະຊຸມສຳມະນານີ້, ເປັນການເພີ່ມທະວີຄວາມຮັບຮູ້ ແລະ ຄວາມເຂົ້າໃຈຂຶ້ນຕື່ມກ່ຽວກັບກົນໄກສິດທິມະນຸດລະດັບສາກົນ, ພາກພື້ນ ແລະ ລະດັບຊາດພ້ອມນີ້, ຍັງໄດ້ແລກປ່ຽນບົດ ຮຽນເຊິ່ງກັນ ແລະ ກັນກັບບັນດາຜູ້ຊ່ຽວຊານຈາກຕ່າງປະເທດໃນການຈັດຕັ້ງປະຕິບັດພັນທະ ແລະ ການປົກປ້ອງສິດທິມະນຸດຢ່າງແທ້ຈິງ.
ແຫ່ລງຂ່າວ
