ວັນທີ 4 ທັນວານີ້, ສະມາຄົມນັກປະພັນລາວ ໄດ້ຈັດພິທີຖະແຫລງຜົນຜູ້ໄດ້ຮັບລາງວັນຊີໄຣ ແລະລາງວັນວັນນະກຳແມ່ນ້ຳຂອງປະຈຳປີ 2015 ຕໍ່ສື່ມວນຊົນຂຶ້ນທີ່ກະຊວງຖະແຫລງຂ່າວ, ວັດ ທະນະທຳ ແລະ ທ່ອງທ່ຽວ ໂດຍທ່ານນາງ ຜິວລາວັນ ຫລວງວັນນາ ຜູ້ຮັກສາການປະທານສະມາຄົມດັ່ງກ່າວ ໃຫ້ຮູ້ວ່າ: ຜົນຜູ້ໄດ້ຮັບລາງວັນຊີໄຣປະຈຳປີ 2015 ສຳລັບປະເທດເຮົາໄດ້ແກ່ບົດປະພັນທີ່ມີຊື່ວ່າ: “ສາຍນ້ຳທີ່ໄຫລກັບ” ປະພັນໂດຍທ່ານ ພອນສະຫວັນ ພັນທະວິຈິດ ເຊິ່ງເປັນບົດປະພັນສຸດຍອດຂອງວັນນະກຳຊີໄຣທີ່ຜູ້ຂຽນໄດ້ສ່ອງແສງໃຫ້ເຫັນຄວາມເປັນຈິງຂອງການດຳລົງຊີວິດຢູ່ໃນຄອບຄົວກໍຄືສັງຄົມລາວໃນປັດຈຸບັນ ໂດຍສະເພາະແມ່ນການພົວພັນຄົນໃນສັງຄົມ ເຊິ່ງຍາມໃດກໍປາຖະໜາໃຫ້ມີຄວາມຖືກຕ້ອງເປັນທຳ, ມີຄວາມສະເໝີພາບຕໍ່ໜ້າກົດໝາຍ.
ວັນນະກຳຊີໄຣເປັນລາງວັນຍອດຍ້ຽມສຳລັບນັກປະພັນດີເດັ່ນປະຈຳອາຊຽນ ເຊິ່ງໄດ້ຈັດໃນທຸກໆປີ ແລະ ສຳລັບປີນີ້ກໍເປັນປີທີ 18 ແລ້ວ ໂດຍສະມາຄົມນັກປະພັນລາວໄດ້ຮີບໂຮມເອົາເລື່ອງນະວະນິຍາຍຕ່າງໆຈາກນັກປະພັນຜູ້ມີຊື່ສຽງຂອງລາວເຂົ້າຮ່ວມປະກວດ.
ສ່ວນລາງວັນວັນນະກຳແມ່ນ້ຳຂອງສຳລັບປີ 2015 ນີ້ ແມ່ນເປັນປີທີ 16 ເຊິ່ງຜູ້ໄດ້ຮັບລາງວັນດີເດັ່ນປະເພດບົດກະວີໄດ້ແກ່ພະອາຈານ ໄພວັນມາລາວົງຈາກບົດກະວີທີ່ມີຊື່ວ່າ: “ອະລິຍະທຳລຸ່ມແມ່ນ້ຳຂອງ”, ສ່ວນບົດເລື່ອງສັ້ນໄດ້ແກ່ທ່ານ ຈັນທະພອນ ວັນນະຈິດ ໃນບົດເລື່ອງ “ທີ່ລະນຶກຂອງເຈົ້າ” ແລະ ບົດບັນທຶກໄດ້ແກ່ບົດທີ່ມີຊື່ວ່າ: “ບໍ່ມີວັນລືມ” ຂຽນໂດຍທ່ານ ຄຳແພງ ອ່ອນສາ ເຊິ່ງບັນດາບົດຂຽນ, ບົດກະວີ ແລະ ບົດປະພັນດັ່ງກ່າວລ້ວນແຕ່ສ່ອງແສງເຖິງການສົ່ງເສີມການພົວພັນ, ຮ່ວມມື, ມິດຕະພາບ ແລະ ການພັດທະນາທີ່ຕິດພັນກັບປະເທດລຸ່ມແມ່ນ້ຳຂອງ ເຊິ່ງໃນເບື້ອງຕົ້ນມີພຽງ 3 ປະເທດຄືລາວ, ຫວຽດນາມ ແລະກຳປູເຈຍເທົ່ານັ້ນທີ່ສົ່ງບົດເຂົ້າປະກວດ, ແຕ່ມາຮອດປັດຈຸບັນໄດ້ເພີ່ມເປັນ 6 ປະເທດສະມາຊິກລຸ່ມອ່າງແມ່ນ້ຳຂອງເຂົ້າຮ່ວມດ້ວຍກັນ ເພື່ອເປັນສັນຍາລັກ ແລະ ເສີມສ້າງຄວາມຜູກພັນດ້ານສິລະປະວັນນະກຳ ແລະ ວັດທະນະທຳຢູ່ໃນຂົງເຂດລຸ່ມແມ່ນ້ຳຂອງໃຫ້ນັບມື້ຂະຫຍາຍຕົວ.
ແຫ່ລງຂ່າວ
