ເຈົ້າໜ້າທີ່ຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ວັນທີ 2 ທັນວາຜ່ານມາ, ໄດ້ເກີດອຸປະຕິເຫດຂຶ້ນ 6 ເລື່ອງ ສົ່ງຜົນໃຫ້ມີຜູ້ເສຍຊີວິດ 3 ຄົນ, ໃນນັ້ນ ຕອນເດຶກຂອງວັນດັ່ງກ່າວ ໄດ້ເກີດເຫດລົດເມສາຍໃຕ້ ຕຳທ້າຍລົດຕ໋ອກໆ ສົ່ງຜົນໃຫ້ທ້າວ ຄຳ ອາຍຸ 35 ປີ, ກຳມະກອນ ແລະ ທ້າວ ສີ ອາຍຸ 30 ປີ, ກຳມະກອນ ທັງສອງຢູ່ບ້ານໜອງຂອນ ເມືອງໂພນໂຮງ ແຂວງວຽງຈັນ ເສຍຊີວິດຄາທີ່, ສ່ວນຜູ້ທີ່ນັ່ງມາໃນລົດຈຳນວນໜຶ່ງ ໄດ້ບາດເຈັບສົມຄວນ ແລະ ໃນທ່ຽງຄືນຂອງວັນດຽວກັນໄດ້ເກີດເຫດລົດຈັກຕຳກັນ ຢູ່ບໍລິເວນທາງບ້ານໜອງບົວທອງເໜືອ, ເມືອງສີໂຄດຕະບອງ ເຮັດໃຫ້ມີຄົນເສຍຊີວິດ 1 ຄົນ.
ເຈົ້າໜ້າທີ່ ຍັງໃຫ້ຮູ້ຕື່ມວ່າ: ວັນທີ 29-30 ພະຈິກຜ່ານມາ, ຢູ່ນະຄອນຫລວງວຽງຈັນ, ໄດ້ມີອຸປະຕິເຫດເກີດຂຶ້ນ 11 ເລື່ອງ, ສົ່ງຜົນໃຫ້ມີຜູ້ເສຍຊີວິດ 2 ຄົນຄື: ໃນຕອນແລງຂອງວັນທີ 29 ຢູ່ຖະໜົນ 13 ເໜືອ, ເຂດບ້ານບົວ, ເມືອງນາຊາຍທອງ ເກີດເຫດລົດຈັກຕຳກັບລົດໃຫຍ່ ເຮັດໃຫ້ທ້າວ ຈັນທະຈອນ (ຜູ້ຂັບຂີ່ລົດຈັກ) ອາຍຸ 25 ປີ, ກຳມະກອນ ຢູ່ບ້ານໜອງສະ ເມືອງນາຊາຍທອງ ເສຍຊີວິດຄາທີ່ ແລະ ໃນຕອນບ່າຍຂອງວັນທີ 30, ຢູ່ເຂດບ້ານນາແຮ່ ເມືອງນາຊາຍທອງ ໄດ້ເກີດເຫດລົດໃຫຍ່ຕຳກັບລົດຈັກ ເຮັດໃຫ້ນາງ ວະນີດາ (ຜູ້ຂັບຂີ່ລົດຈັກ), ອາຍຸ 55ປີ ຢູ່ບ້ານຜາງແຫ້ງ, ເມືອງນາຊາຍທອງ ເສຍຊີວິດຄາທີ່. ດັ່ງນັ້ນ ເຈົ້າໜ້າທີ່ຈຶ່ງຮຽກຮ້ອງໃຫ້ນັກຂັບຂີ່ທຸກຄົນ ຄວນມີສະຕິໃນການຂັບຂີ່ຍົນຍານພາຫະນະ ແລະ ເອົາໃຈໃສ່ປະຕິບັດລະບຽບຈະລາຈອນ ໃຫ້ເຂັ້ມງວດ ເພື່ອຫລີກລ້ຽງການເກີດອຸປະຕິເຫດທີ່ອາດຈະເກີດຂຶ້ນໄດ້ທຸກເວລາ.
ແຫລ່ງຂ່າວ:
