ເພື່ອ​ສືບຕໍ່​ຮັດ​ແໜ້ນ​ສາຍ​ພົວພັນ​ຮ່ວມ​ມື​ມິດຕະພາບ ຜັນ​ຂະຫຍາຍ​ສັນຍາ​ຮ່ວມ​ມື ລະຫວ່າງ​ສອງ​ສະ​ຖາ​ບັນ​ຂອງ​ສະພາ​ວິທະຍາສາດ​ແຫ່ງ​ຊາດ​ແຫ່ງ ​ສປປ ລາວ ແລະ ສະພາ​ບັນດິດ​ວິທະຍາສາດ ແລະ ເຕັກ​ໂນ​ໂລ​ຊີ​ແຫ່ງ ​ສສ.ຫວຽດນາມ ເຊິ່ງ​ທັງ​ສອງ​ຝ່າຍ​ໄດ້​ລົງ​ນາມ​ຮ່ວມ​ກັນ​ໃນ​ວັນ​ທີ 22 ພຶດສະພາ 2012 ທີ່​ຜ່ານ​ມາ ໃຫ້​ມີ​ທ່າ​ກ້າວ​ຂະຫຍາຍຕົວ​ໃນ​ຈັງຫວະ​ທີ່​ວ່ອງໄວ ແລະ ໜັກ​ແໜ້ນ​ຂຶ້ນ​ຢ່າງ​ບໍ່​ຢຸດ​ຢັ້ງ.

ເນື່ອງ​ໃນ​ໂອກາດ​ທີ່​ທາງ​ຄະນະ​ຜູ້​ແທນ ​ສສ.ຫວຽດນາມ ນຳ​ໂດຍ​ທ່ານ ​ສຈ.​ດຣ. ເຈົາ​ວັນ​ມິງ ກຳມະການ​ສູນ​ກາງ​ພັກ ປະທານ​ສະພາ​ບັນດິດ​ວິທະຍາສາດ ແລະ ເຕັກ​ໂນ​ໂລ​ຊີ ເດີນທາງ​ມາ​ຢ້ຽມຢາມ​ເຮັດ​ວຽກ​ຢູ່ ​ສປປ ລາວ ໃນ​ລະຫວ່າງ​ວັນ​ທີ 19-21 ທັນວາ 2013 ແລະ ໃນ​ວັນ​ທີ 20 ທັນວາ 2013 ທາງ​ຄະນະ​ຜູ້​ແທນ​ໄດ້​ມີ​ໂອກາດ​ພົບ​ປະ​ປຶກສາ​ຫາລື​ກັນ ກັບ​ທາງ​ຄະນະ​ທ່ານ ​ສຈ.​ດຣ. ບໍ່​ວຽງ​ຄຳ ວົງ​ດາລາ ລັດຖະມົນຕີ​ວ່າການ ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ ປະທານ​ສະພາ​ວິທະຍາສາດ​ແຫ່ງ ​ສປປ ລາວ ຢູ່​ທີ່​ກະຊວງ​ດັ່ງກ່າວ.

ການ​ພົບ​ປະ​ໃນ​ຄັ້ງ​ນີ້ ທັງ​ສອງ​ຝ່າຍ​ໄດ້​ຢືນຢັນ​ຄືນ ໃນ​ການ​ສືບຕໍ່​ເຖິງ​ການ​ຕັດສິນ​ໃຈ​ອັນ​ໜັກ​ແໜ້ນ ໃນ​ຂົງເຂດ​ການ​ຄົ້ນຄວ້າ​ວິທະຍາສາດ ການ​ພັດທະນາ​ຊັບພະຍາກອນ​ມະນຸດ ເຊິ່ງ​ຜົນສຳເລັດ​ໃນ​ການ​ຮ່ວມ​ມື​ໃນ​ເບື້ອງ​ຕົ້ນ​ນັ້ນ ຈະ​ກາຍເປັນ​ທ່າແຮງ​ໃນ​ການ​ຮ່ວມ​ມື​ກັນ​ໃນ​ຫຼາຍ​ຂົງເຂດ ໃຫ້​ມີ​ປະ​ສິດທິ​ຜົນ ແລະ ເກີດ​ດອກ​ອອກ​ຜົນ​ຢ່າງ​ງົດ​ງາມ.

ທີ່ມາhttp://www.vientianemai.net/teen/khao/1/10859