ຂປລ. ໃນວັນທີ 25 ພະຈິກ 2015, ທ່ານ ທອງລຸນ ສີສຸລິດ, ຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງການຕ່າງປະເທດ ໄດ້ຮັບຫລຽນໄຊມິດຕະພາບ ຈາກລັດຖະບານ ສະຫະພັນ ຣັດເຊຍ, ໂດຍພິທີໄດ້ຈັດຂຶ້ນໃນໂອກາດ ງານສະເຫລີມສະຫລອງ ວັນສ້າງຕັ້ງສະມາຄົມ ມິດຕະພາບ ລາວ–ຣັດເຊຍ ຄົບຮອບ 50 ປີ ແລະ ພິທີນຳສະເໜີໂຄງການ ໜັງສືຜ່ານແດນເອເລັກໂທຣນິກ ຫລື ອີປັດສະປໍ (E-passport), ເຊິ່ງໂຄງການດັ່ງກ່າວນີ້ ໄດ້ຮັບອະນຸມັດຈາກລັດຖະບານລາວ ໃຫ້ເລີ່ມຈັດຕັ້ງປະຕິບັດ ມາແຕ່ປີ 2012 ແລະ ຕາມແຜນການ ສະເພາະໜັງສືຜ່ານແດນ ເອເລັກໂທຣນິກການທູດ ຈະເລີ່ມນຳໃຊ້ໃນວັນທີ 15 ມັງກອນ 2016, ສ່ວນໜັງສືຜ່ານແດນ ເອເລັກໂທຣນິກ ລັດຖະການ ແລະ ໜັງສືຜ່ານແດນ ເອເລັກໂທຣນິກທຳມະດາ ຈະສາມາດເລີ່ມນຳໃຊ້ ໃນກາງປີ 2016. ງານ ສະຫລອງ ແລະ ພິທີດັ່ງກ່າວ ຈັດຂຶ້ນທີ່ ນະຄອນຫລວງວຽງຈັນ, ໂດຍສະມາຄົມມິດຕະພາບ ລາວ-ຣັດເຊຍ ຮ່ວມກັບສະຖານທູດຣັດເຊຍ ທີ່ ນະຄອນຫລວງວຽງຈັນ ແລະ ພາກສ່ວນທີ່ກ່ຽວຂ້ອງ ຂອງຝ່າຍລາວ ໂດຍມີບັນດາ ລັດຖະມົນຕີວ່າການ, ຊ່ວຍວ່າການ, ຫົວໜ້າກົມ ຈາກກະຊວງການຕ່າງປະເທດ, ບັນດາກະຊວງ ທີ່ກ່ຽວຂ້ອງ ແລະ ແຂກຝ່າຍຣັດເຊຍ ເຂົ້າຮ່ວມຢ່າງພ້ອມພຽງ.
ການມອບຫລຽນໄຊມິດຕະພາບຈາກລັດຖະບານຣັດເຊຍ ໃຫ້ແກ່ທ່ານ ທອງລຸນ ສີສຸລິດ, ຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງການຕ່າງປະເທດ ຄັ້ງນີ້ ແມ່ນຜົນງານ ການປະກອບສ່ວນຢ່າງຕັ້ງໜ້າ ເຂົ້າໃນການຮັດແໜ້ນ ແລະ ເສີມຂະຫຍາຍ ສາຍພົວພັນມິດຕະພາບ ທີ່ເປັນມູນເຊື້ອ ແລະ ການຮ່ວມມື ມີມາແຕ່ຍາວນານ ລະຫວ່າງ ລາວ-ຣັດເຊຍ ມີບາດກ້າວຂະຫຍາຍຕົວຕໍ່ເນື່ອງ ຕະຫລອດມາ ອັນພົ້ນເດັ່ນແມ່ນ ການຊຸກຍູ້ໃຫ້ມີການແລກປ່ຽນການຢ້ຽມຢາມ ໄປມາຫາສູ່ກັນ ລະຫວ່າງ ການນໍາຂັ້ນສູງຂອງ ສປປ ລາວ ແລະ ສະຫະພັນຣັດເຊຍ ຢ່າງເປັນປົກກະຕີ, ເຊິ່ງມາໃນໄລຍະໃໝ່ ການພົວພັນຮ່ວມມື ຂອງສອງປະເທດ ລາວ-ຣັດເຊຍ ໄດ້ກ້າວຂຶ້ນສູ່ລະດັບໃໝ່ ເປັນປະເທດຄູ່ຮ່ວມມື ຍຸດທະສາດນໍາກັນ.
ຄຽງ ຄູ່ກັບການຮ່ວມມື ທາງດ້ານການເມືອງ ທ່ານ ຮອງນາຍົກລັດຖະມົນຕີ ຍັງມີບົດບາດ ແລະ ປະກອບສ່ວນອັນສໍາຄັນ ຊຸກຍູ້ການຮ່ວມມື ດ້ານເສດຖະກິດ-ການຄ້າ, ການທ່ອງທ່ຽວ, ການ ສືກສາ-ວັດທະນະທໍາ ແລະ ດ້ານອື່ນໆ. ຕໍ່ຜົນງານ ແລະ ຄຸນງາມຄວາມດີ ໃນການປະກອບສ່ວນ ຢ່າງຫ້າວຫັນດັ່ງກ່າວ ລັດຖະບານຣັດເຊຍ ຈຶ່ງໄດ້ມອບຫລຽນໄຊມິດຕະພາບ ໃຫ້ແກ່ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງການຕ່າງປະເທດ ໃນໂອກາດປີ 2015 ນີ້, ເຊິ່ງເປັນປີສອງປະເທດ ສະເຫລີມສະຫລອງ ວັນສ້າງຕັ້ງສາຍພົວພັນ ການທູດ ລາວ-ຣັດເຊຍ ຄົບຮອບ 55 ປີ ແລະ ວັນສ້າງຕັ້ງສະມາຄົມ ມິດຕະພາບ ລາວ-ຣັດເຊຍ ຄົບຮອບ 50 ປີ.
ແຫລ່ງຂ່າວ:
