ຂປລ. ຄະນະກຳມະການ ສູນກາງແນວລາວສ້າງຊາດ (ສນຊ) ແຈ້ງໃຫ້ຊາບວ່າ: ຜ່ານການກະກຽມໃນດ້ານຕ່າງໆ ມາຮອດປັດຈຸບັນນີ້ ແມ່ນໄດ້ມີຄວາມກຽມພ້ອມ ໃນທຸກດ້ານ ເພື່ອດຳເນີນ ກອງປະຊຸມຜູ້ຊົງຄຸນວຸດທິທົ່ວປະເທດ ເຊິ່ງຈະໄດ້ຈັດຂຶ້ນແຕ່ວັນທີ 28-30 ພະຈິກ 2015 ທີ່ນະຄອນຫລວງວຽງຈັນ ໂດຍຈະມີຜູ້ແທນເຂົ້າຮ່ວມ ທັງໝົດ 1.400 ກວ່າທ່ານ, ໃນນັ້ນ ຈະມີຕົວແທນຂອງຊົນເຜົ່າ ໃນທົ່ວປະເທດຈຳນວນ 49 ຊົນເຜົ່າເຂົ້າຮ່ວມ. ການຈັດກອງປະຊຸມດັ່ງກ່າວ ແມ່ນໜຶ່ງໃນການສະເຫລີມສະຫລອງ ວັນສຳຄັນປະຫວັດສາດ ຂອງຊາດ ກໍຄື ວັນສະຖາປະນາ ສປປ ລາວ ຄົບຮອບ 40 ປີ.
ທ່ານ ວົງຈັນ ພົມສະຫວັດ ຮອງປະທານສູນກາ ງແນວລາວສ້າງຊາດ, ຜູ້ຊີ້ນຳວຽກງານຊົນເຜົ່າ ໄດ້ຖະແຫລງ ຂ່າວຕໍ່ສື່ມວນຊົນໃນວັນທີ 25 ພະຈັກ 2015 ໂດຍໄດ້ໃຫ້ຮູ້ວ່າ: ກອງປະຊຸມພົບປະຜູ້ຊົງຄຸນວຸດທິ ທົ່ວປະເທດໃນຄັ້ງນີ້ ແມ່ນເພື່ອປັບປຸງ ແລະ ເຕົ້າໂຮມຄວາມສາມັກຄີ ທົ່ວປວງຊົນລາວ ແນໃສ່ເພີ່ມທະວີກຳລັງແຮງ ສັງລວມຂອງຊາດເຮົາ ດັ່ງນັ້ນ ຜູ້ແທນກອງປະຊຸມ ຈະໄດ້ຮ່ວມກັນສະຫລຸບຕີລາຄາ ການຈັດຕັ້ງປະຕິບັດ ບັນດາມະຕິຂອງພັກ ກ່ຽວກັບນະໂຍບາຍຊົນເຜົ່າ, ພ້ອມນັ້ນຍັງຈະໄດ້ຮັບຟັງ ການໂອ້ລົມຂອງການນຳ ພັກ–ລັດ, ແນວລາວສ້າງຊາດ ແລະ ເຂົ້າຮ່ວມງາມສະເຫລີມສະຫລອງ ສອງວັນປະຫວັດສາດ. ນອກນັ້ນ ບັນດາຜູ້ແທນຜູ້ຊົງຄຸນວຸດທິ ຈາກທ້ອງຖິ່ນຕ່າງໆຈະໄດ້ເຄື່ອນໄຫວຢ້ຽມຢາມ ບັນດາໂຄງການພັດທະນາ ເສດຖະກິດ–ສັງຄົມ ຢູ່ ນະຄອນຫລວງວຽງຈັນ ຈຳນວນໜຶ່ງ.
ທ່ານ ວົງຈັນ ພົມສະຫວັດ ຕາງໜ້າໃຫ້ຄະນະກຳມະການ ສູນກາງແນວລາວສ້າງຊາດ ໄດ້ເຊີນຊວນພະນັກ ງານ, ລັດຖະກອນ, ທະຫານ, ຕຳຫລວດ ແລະ ປະຊາຊົນລາວບັນດາເຜົ່າ ໂດຍສະເພາະແມ່ນ ຊາວນະຄອນຫລວງວຽງຈັນ ຮ່ວມກັນເປັນເຈົ້າພາບ ຈັດຕັ້ງກອງປະຊຸມຄັ້ງນີ້ ລວມເຖິງການສະເຫລີມສະຫລອງ 2 ວັນປະຫວັດສາດ ໃຫ້ມີຄວາມຄຶກຄື້ນ ແລະ ສົມກຽດ. ພ້ອມນີ້, ຍັງໄດ້ຮຽກຮ້ອງໃຫ້ບັນດາທຸກຊັ້ນຄົນ, ສາສະໜາ ແລະ ທຸກເພດໄວ ຕະຫລອດຮອດ ບັນດາພີ່ນ້ອງຊາວລາວ ທີ່ດຳລົງຊີວິດ ແລະ ທຳມາຫາກິນຢູ່ຕ່າງປະເທດ ເຊິ່ງຍາມໃດກໍໄດ້ໃຫ້ການສະໜັບສະໜູນ ພາລະກິດເຕົ້າໂຮມຄວາມສາມັກຄີປອງດອງ ທົ່ວປວງຊົນທັງຊາດ ຂອງອົງການແນວລາວສ້າງຊາດ ໃນໂລຍະຜ່ານມາ ແລະ ເຊື່ອໝັ້ນວ່າ ທຸກທ່ານຈະສືບຕໍ່ ໃຫ້ການສະໜັບສະໜູນຕະຫລອດໄປ ໃນຕໍ່ໜ້າ.
ແຫລ່ງຂ່າວ:
