ບໍລິສັດສື່ໄດ້ເປີດເຜີຍວ່າ ບໍລິສັດກູເກີ້ນຕ້ອງໄດ້ຕໍ່ສູ້ກ່ຽວກັບການລະເມີດລິຂະສິດເທິງໂລກອອນລາຍນັບມື້ນັບຫຼາຍຂຶ້ນເລື້ອຍໆ, ຕອນນີ້ເອງກູເກີ້ນມີຄຳຮ້ອງຮຽນກ່ຽວກັັບການລະເມີດລິຂະສິດເຖິງ 2 ພັນລ້ານລາຍການຕໍ່ມື້, ບໍລິສັດກູເກີ້ນໄດ້ເປີດເຜີຍວ່າເມື່ອເດືອນຕຸລາທີ່ຜ່ານມານີ້ ພວກເຂົາໄດ້ຮັບການຮ້ອງຮຽນກ່ຽວກັບການລະເມີດລິຂະສິດຫຼາຍກວ່າ 65 ລ້ານລາຍການ ຫຼືຄິດເປັນນາທີລະ 1500 ລາຍການຕໍ່ການຮ້ອງຮຽນຈາກຜູ້ຜະລິດສື່ແລະເຈົ້າຂອງລິຂະສິດກວ່າ 5069 ເຈົ້າລວມກັນ.
ຈຳນວນຮ້ອງຮຽນໃຫ້ຈັດການລິ້ງເວັບໄຊລະເມີດລິຂະສິດນັ້ນມີຈຳນວນເພີ່ມຂຶ້ນສອງເທົ່າຈາກປີກ່ອນທີ່ມີຢູ່ຫຼາຍແລ້ວ ແຕ່ບາງເທື່ອທາງຜູ້ຍື່ນເລື່ອງຮ້ອງຮຽນກໍບໍ່ໄດ້ສົ່ງລິ້ງເວັບໄຊທີ່ຖືກຕ້ອງສຳລັບການດຳເນີນການສະກັດກັ້ນການເຂົ້າເຖິງຂໍ້ມູນເຖື່ອນເຫຼົ່ານັ້ນ ບາງເທື່ອກໍເປັນລິ້ງທີ່ບໍ່ສາມາດໃຊ້ງານໄດ້ ແລະບາງເທື່ອກໍໄປຊ້ຳກັບເນື້ອຫາອື່ນທີ່ຮ້ອງຂໍລິຂະສິດຢ່າງຖືກຕ້ອງອີກນຳ.
ສິ່ງທີ່ເຮັດໃຫ້ຈຳນວນໂຕເລກຂອງການຮ້ອງຮຽນສູງເຖິງຂະໜາດນີ້ແມ່ນມາຈາກກຸ່ມ British Recorded Music Industry (BPI) ແລະ Recording Industry Association of America (RIAA). ສິ່ງທີ່ມີການຮ້ອງຮຽນເຂົ້າມານັ້ນກູເກີ້ນເອງກໍຊ່ວຍຈັດການຕໍ່ສູ້ກັບການລະເມີດລິຂະສິດເຫຼົ່ານີ້ໂດຍການບໍ່ສະແດງຜົນການຄົ້ນຫາເປົ້າໝາຍ ຫຼື ອາດຈະມີການປັບຫຼຸດລະດັບ Page Ranking (ອັນດັບໜ້າເວັບໄຊ) ຂອງບັນດາເວັບໄຊທີ່ຮູ້ຈັກກັນດີວ່າເປັນແຫຼ່ງເຜີຍແຜ່.
ລວມໄປເຖິງລາຍງານຈາກ TorrentFreak ນັ້ນກໍໄດ້ມີການລະບຸປະເດັນຄ້າຍໆກັນວ່າ ໄດ້ມີການຮຽກຮ້ອງໃຫ້ທາງກູເກີ້ນຂຶ້ນບັນຊີດຳໃນການເຂົ້າເຖິງແຫຼ່ງທີ່ຜິດກົດໝາຍ ເຊິ່ງລະເມີດຊັບສິນທາງປັນຍາເຫຼົ່ານີ້ແບບເໝົາຍົກໄປເລີຍ ແຕ່ກໍເປັນທາງກູເກີ້ນເອງທີ່ບອກວ່າມາດຕະການແບບເຂັ້ມງວດນັ້ນອາດຈະບໍ່ເປັນວິທີແກ້ໄຂທີ່ຖືກຕ້ອງໃນໄລຍະຍາວກໍເປັນໄດ້.
ທີ່ມາ: Kitguru