ທ່ານ ອາຊາງ ລາວລີ ຮອງນາຍົກລັດຖະມົນຕີ ຜູ້ຊີ້ນຳວຽກງານວັດທະນະທຳ-ສັງຄົມ ປະທານຄະນະກຳມະການແຫ່ງຊາດ ຕ້ານ ແລະ ຄວບຄຸມພະຍາດຕິດຕໍ່ ໄດ້ເປັນກຽດປະກອບຄຳຄິດຄຳເຫັນ ຕໍ່ກອງປະຊຸມສະຫຼຸບຖອດຖອນບົດຮຽນ ການຈັດຕັ້ງປະຕິບັດວຽກງານປ້ອງກັນ ແລະ ຄວບຄຸມພະຍາດໄຂ້ຍຸງລາຍ ປະຈຳປີ 2013 ທີ່ຈັດຂຶ້ນໃນວັນທີ 18-19 ທັນວາ 2013 ນີ້ ຢູ່ທີ່ຫໍວັດທະນະທຳແຫ່ງຊາດ ໂດຍມີທ່ານ ສຈ.ດຣ. ເອກສະຫວ່າງ ວົງວິຈິດ ລັດຖະມົນຕີວ່າການ ກະຊວງສາທາລະນະສຸກ ພ້ອມດ້ວຍເຈົ້າແຂວງ ລັດຖະມົນຕີວ່າການ ຮອງເຈົ້າແຂວງ ຮອງເຈົ້າຄອງນະຄອນຫຼວງວຽງຈັນ ຜູ້ຕາງໜ້າອົງການອະນາໄມໂລກ ແລະ ບັນດາແຂກທີ່ກ່ຽວຂ້ອງເຂົ້າຮ່ວມ.
ທ່ານ ອາຊາງ ລາວລີ ໄດ້ກ່າວເນັ້ນຫຼາຍບັນຫາໃນການຕ້ານ ແລະ ສະກັດກັ້ນພະຍາດໄຂ້ຍຸງລາຍວ່າ: ຄະນະພັກ-ຄະນະນຳແຕ່ລະຂັ້ນ ຕ້ອງເອົາໃຈໃສ່ການໂຄສະນາສຶກສາອົບຮົມ ໃຫ້ແກ່ປະຊາຊົນບັນດາເຜົ່າ ທຸກພາກສ່ວນຂອງສັງຄົມ ຮັບຮູ້ເຂົ້າໃຈເຖິງຜົນຮ້າຍ ຄວາມເປັນອັນຕະລາຍຂອງພະຍາດດັ່ງກ່າວຢ່າງກວ້າງຂວາງ ແລະ ທົ່ວເຖິງ ເອົາໃຈໃສ່ປັບປຸງວຽກງານຄຸ້ມຄອງກໍລະນີໃຫ້ໄດ້ດີ ຮັບປະກັນໃຫ້ໄດ້ດີ ມີການອົບຮົມໃຫ້ບັນດາຖັນແຖວພະນັກງານແພດໝໍ ທີ່ເຮັດວຽກຢູ່ເຂດຫ່າງໄກສອກຫຼີກ ໄດ້ມີການຍົກລະດັບທາງດ້ານການບົ່ງມະຕິ ແລະ ຄຸ້ມຄອງກໍລະນີໃຫ້ໄດ້ ອຸປະກອນ ແລະ ເຄື່ອງມືຮັບໃຊ້ຄວນໄດ້ຮັບການປັບປຸງ ຄວນຈັດໃຫ້ມີໂຮງໝໍແຫ່ງໜຶ່ງ ມີເຄື່ອງມືອຸປະກອນການແພດທີ່ທັນສະໄໝ ເພື່ອປິ່ນປົວຄົນເຈັບໜັກ ຂໍໃຫ້ກະຊວງສາທາລະນະສຸກ ຈົ່ງໄດ້ເອົາໃຈໃສ່ບັນຫານີ້ ເອົາໃຈໃສ່ສຳຫຼວດໜອນນ້ຳຍຸງລາຍເປັນປະຈຳ ແຕ່ລະແຂວງ ແຕ່ລະເມືອງ ແຕ່ລະບ້ານ ແລະ ຄອບຄົວ ຖ້າພົບເຫັນຄອບຄົວໃດມີໜອນນ້ຳຍຸງລາຍ ກໍໃຫ້ມີການໃສ່ຢາຂ້າໜອນນ້ຳ ແລະ ອະນາໄມທຳລາຍແຫຼ່ງເພາະພັນຂອງຍຸງລາຍ ຕ້ອງເອົາໃຈໃສ່ປ້ອງກັນ-ສະກັດກັ້ນ ການລະບາດຂອງພະຍາດຕິດແປດຊະນິດອື່ນໆໃຫ້ດີ ແລະ ທັນເວລາ ເອົາໃຈໃສ່ຈັດຕັ້ງ ແລະ ປັບປຸງຂອດປະສານງານ ແລະ ຂອດບັນຊາການຕອບໂຕ້ການລະບາດຢູ່ແຕ່ລະແຂວງ ແຕ່ລະເມືອງ ໃຫ້ມີປະສິດທິຜົນ ຕ້ອງຮັບປະກັນໃຫ້ມີກົນໄກແກ້ໄຂການລະບາດແຕ່ຫົວທີ ພ້ອມທັງປັບປຸງຂອດແລກປ່ຽນຂໍ້ມູນຂ່າວສານການລະບາດໃຫ້ທັນເວລາ ຂໍໃຫ້ກະຊວງສາທາລະນະສຸກ ສົມທົບກັບອົງການປົກຄອງທ້ອງຖິ່ນ ແກ້ໄຂບັນຫານີ້ໃຫ້ດີ ເພາະຜ່ານກອງປະຊຸມຖອດຖອນບົດຮຽນຄັ້ງນີ້ ພວກເຮົາກໍເຫັນນຳກັນແລ້ວວ່າ ແຂວງຈຳນວນໜຶ່ງມີຄົນເຈັບຫຼາຍ ແຕ່ຍ້ອນການເອົາໃຈໃສ່ປິ່ນປົວຖືກຕ້ອງຕາມຫຼັກວິຊາການ ການປະສານສົມທົບໄດ້ດີ ຈຶ່ງເຮັດໃຫ້ຄົນເຈັບບໍ່ເສຍຊີວິດ ຫຼື ມີໜ້ອຍ ກົງກັນຂ້າມແຂວງຈຳນວນໜຶ່ງເຮັດບໍ່ທັນດີ ກໍ່ໃຫ້ເກີດຄົນເຈັບເສຍຊີວິດຈຳນວນຫຼາຍ ສືບຕໍ່ຂົນຂວາຍຂໍການຊ່ວຍເຫຼືອ ຈາກອົງການຈັດຕັ້ງສາກົນ ອົງການອະນາໄມໂລກ ທະນາຄານພັດທະນາອາຊີ ທະນາຄານໂລກ ແລະ ອົງການຈັດຕັ້ງສາກົນອື່ນໆ ເພື່ອປະກອບສ່ວນນຳລັດຖະບານ ແກ້ໄຂການປ້ອງກັນ ແລະ ຄວບຄຸມພະຍາດໄຂ້ຍຸງລາຍຢ່າງຄົບວົງຈອນ ກວມໄປທຸກແຂວງໃນທົ່ວປະເທດ.
ທີ່ມາ http://www.vientianemai.net/teen/khao/1/10836