ສຳນັກຂ່າວຕ່າງປະເທດ ລາຍງານໃນວັນທີ 20 ພະຈິກນີ້ວ່າ ສຳນັກງານສືບຂ່າວແບນຊິກ ໄດ້ຮັບແຈ້ງວ່າ ທ້າວ ຊາລາ ອັບເດຊາລາມ ອາຍຸ 26 ປີ ຊຶ່ງເປັນຜູ້ຖືກຫາ ໃນຄະດີກໍ່ການຮ້າຍ ທີ່ນະຄອນຫລວງປາຣີ ປະເທດຝຣັ່ງ ຊຶ່ງຖືກອອກໝາຍຈັບແລ້ວ ໄດ້ຍ່າງຢູ່ບໍລິເວນຖະໜົນແຫ່ງໜຶ່ງ ໃຈກາງນະຄອນຫລວງບຣຸກແຊນ ຈຶ່ງໄດ້ສັ່ງໃຫ້ເຈົ້າໜ້າທີ່ ປະຈຳການປ້ອງກັນ ແລະ ຍົກລະດັບການເຕືອນໄພ ຢູ່ນະຄອນຫລວງບຣຸກແຊນ ຈາກລະດັບ 3 ຂຶ້ນເປັນລະດັບ 4 ຊຶ່ງເປັນລະດັບສູງສຸດ.

ທັງນີ້ ທ້າວ ອັບເດຊາລາມ ຖືກອອກໝາຍຈັບ ເນື່ອງຈາກເປັນຜູ້ຖືກຫາ ເປັນຜູ້ລົງມືກວາດຍິງ ຢູ່ບໍລິເວນໜ້າຮ້ານອາຫານ ໃນວັນທີ 13 ພະຈິກຜ່ານມາ ຢູ່ນະຄອນຫລວງປາຣີ ປະເທດຝຣັ່ງ ແລະ ແຫລ່ງຂ່າວຍັງໃຫ້ຮູ້ອີກວ່າ ເຈົ້າໜ້າທີ່ຕຳຫລວດ ສາມາດຈັບກຸມຜູ້ຖືກສົງໄສ ໃນຄະດີດຽວກັນນີ້ອີກ ຈຳນວນ 9 ຄົນແລ້ວ.