ຂປລ. ດາວທຽມດວງທໍາອິດຂອງລາວ ຈະມີພິທີສົ່ງຂຶ້ນສູ່ວົງໂຄຈອນ ໃນວັນທີ 21 ພະຈິກ 2015 ນີ້ ເພື່ອເປັນຂອງຂວັນພິເສດໃຫ້ແກ່ ສປປ ລາວ ເນື່ອງໃນໂອກາດທີ່ ສປປ ລາວ ຈະສະເຫລີມສະຫລອງ ວັນຊາດ ທີ 2 ທັນວາ ຄົບຮອບ 40 ປີ. ດາວທຽມດວງດັ່ງກ່າວມີຊື່ວ່າ Laosat-1 ຈະຖືກສົ່ງຂຶ້ນສູ່ອາວະກາດ ແລະ ໂຄຈອນຢູ່ມູມ 128,5 ອົງສາຕາເວັນອອກ ເປັນດາວທຽມສື່ສານ ທີ່ສາມາດໃຫ້ການບໍລິການທາງວິທະຍຸ, ໂທລະພາບ ແລະ ໂທລະຄົມມະນາຄົມພາກພື້ນດິນ ໂດຍນຳໃຊ້ຄື້ນຄວາມຖີ່ C ແລະ KU-Band ລວມມີ 22 ຊ່ອງສັນຍານ.
ຕາມຂໍ້ມູນຈາກກະຊວງໄປສະນີ ໂທລະຄົມມະນາຄົມ ແລະ ການສື່ສານ ໃຫ້ຮູ້ວ່າ: ພາຍຫລັງສຳເລັດການສົ່ງດາວທຽມ Laosat-1 ຂຶ້ນສູ່ວົງໂຄຈອນ ຈະມີການສ້າງຕັ້ງບໍລິສັດຮ່ວມທຶນ ເຊິ່ງປະກອບມີລັດຖະບານລາວ ແລະ ບໍລິສັດ ຜູ້ມີປະສົບການດ້ານການບໍລິການດາວທຽມລະດັບສາກົນ ຄື: ລັດຖະບານລາວ 45% ບໍລິສັດ China-Pacific Mobile Telecommunications Satellite (APMT) ຂອງຈີນ 35% ບໍລິສັດ Space Star Technology (SSTC) ຂອງຈີນ 15% ແລະ ບໍລິສັດ Asia pacific Satellite Technology (APST) (ຮົງກົງ) 5% ການລົງນາມໃນສັນຍາຮ່ວມທຶນດັ່ງກ່າວ ແມ່ນເພື່ອຄວາມສະດວກໃຫ້ບໍລິສັດຮ່ວມທຶນມີຄວາມສະດວກ ໃນວຽກບໍລິການ ການສື່ສານຜ່ານດາວທຽມປະເພດຕ່າງໆຢູ່ພາຍໃນ ແລະ ຕ່າງປະເທດ ເຊັ່ນ: ການສື່ສານ ສຳລັບວຽກງານຂອງລັດ, ການໃຫ້ເຊົ່າຊ່ອງດາວທຽມການບໍລິການໂທລະພາບຜ່ານດາວທຽມ, ການສື່ສານສຳລັບເຂດຊົນນະບົດ ແລະ ຫ່າງໄກສອກຫລີກ, ການສຶກສາ ແລະ ການແພດທາງໄກ, ລະບົບໂທລະຄົມມະນາຄົມ ແລະ ອິນເຕີເນັດການສື່ສານ ໃນວຽກງານບັນເທົາທຸກ ແລະ ຟື້ນຟູຈາກໄພພິບັດ.
ແຫລ່ງຂ່າວ:
