ກະຊວງຍຸຕິທຳ ໂດຍໄດ້ຮັບການສະໜັບສະໜູນຈາກສະຖານທູດ ສາທາລະນະລັດສິງກະໂປ ປະຈຳລາວ ຈັດອົບຮົມວຽກງານ ແກ້ໄຂຂໍ້ຂັດແຍ່ງທາງດ້ານເສດຖະກິດຂຶ້ນ ລະຫວ່າງວັນທີ 16-17 ພະຈິກ 2015 ທີ່ສູນການຮ່ວມມືສາກົນ ລາວ-ຍີ່ປຸ່ນ (ຫຼັກ 5) ນະຄອນຫຼວງວຽງຈັນ ເຊິ່ງມີທ່ານ ບຸນສະຫວາດ ບຸບຜາ ລັດຖະມົນຕີຊ່ວຍວ່າການກະຊວງຍຸຕິທຳ ທ່ານ ໂດມີນິກ ກອກ ເອກອັກຄະລັດຖະທູດສິງກະໂປ ປະຈຳລາວ ພ້ອມດ້ວຍຜູ້ຕາງໜ້າຈາກຂະແໜງການກ່ຽວຂ້ອງ ທັງພາກລັດ-ເອກະຊົນ ແລະ ອົງການຈັດຕັ້ງສາກົນ ທີ່ຈັດຕັ້ງປະຕິບັດວຽກງານແກ້ໄຂຂໍ້ຂັດແຍ່ງດ້ານເສດຖະກິດເຂົ້າຮ່ວມ.
ທ່ານລັດຖະມົນຕີຊ່ວຍວ່າການກະຊວງຍຸຕິທຳ ໄດ້ກ່າວວ່າ: ເປົ້າໝາຍສຳຄັນຂອງການອົບຮົມຄັ້ງນີ້ ເພື່ອເປັນການຖອດຖອນບົດຮຽນ ແລະ ແລກປ່ຽນປະສົບການກ່ຽວກັບການດຳເນີນການແກ້ໄຂຂໍ້ຂັດແຍ່ງທາງດ້ານເສດຖະກິດ ແບບມີທາງເລືອກ ໂດຍສະເພາະແມ່ນ ການແກ້ໄຂຂໍ້ຂັດແຍ່ງທາງດ້ານການຄ້າສາກົນ ທາງດ້ານການລົງທຶນ ດ້ວຍການໄກ່ເກ່ຍ ແລະ ການຕັດສິນ ໂດຍຄະນະກຳມະການທັງນີ້ ເພື່ອເພີ່ມທະວີຄວາມເປັນເອກະພາບໃນການປັບປຸງ ແລະ ດຳເນີນວຽກງານຂອງຂະແໜງການແກ້ໄຂຂໍ້ຂັດແຍ່ງ ໃຫ້ມີຄວາມເປັນເອກະພາບ ແລະ ສອດຄ່ອງໃນການປະຕິບັດວຽກງານຕົວຈິງ ເຊິ່ງຕະຫຼອດໄລຍະ 2 ວັນ ຜູ້ເຂົ້າຮ່ວມຈະໄດ້ຮັບຮູ້ ແລະ ເຂົ້າໃຈແຈ້ງເຖິງບັນດາລະບຽບການ ວິທີການ ຂັ້ນຕອນ ລວມທັງເຕັກນິກ ແລະ ທັກສະຂອງຂະບວນການດຳເນີນການໄກ່ເກ່ຍ ແລະ ດຳເນີນການຕັດສິນ ໂດຍຄະນະກຳມະການນອກລະບົບສານປະຊາຊົນຕື່ມອີກ.
ແຫ່ລງຂ່າວ
