“ຈາກຄຸນສົມບັດຕໍ່ໄປນີ້ຖ້າໃຜມີຄົບທຸກຂໍ້ ເຊື່ອໄດ້ວ່າຈະຊອກວຽກໃນຝັນໄດ້ບໍ່ຍາກ ແລະ ໂອກາດທີ່ຈະ ຈະເລີນກ້າວໜ້າກໍ່ມີຫຼາຍເຊັ່ນກັນ ແຕ່ຖ້າມີບໍ່ຄົບກໍ່ບໍ່ເປັນຫຍັງ ເລື່ອງແບບນີ້ຮຽນຮູ້ ແລະ ຝຶກຝົນກັນໄດ້ ບໍ່ມີສິ່ງໃດຊ້າເກີນໄປທີ່ຈະຝຶກ”
ບໍ່ສະເພາະແຕ່ຜູ້ສະມັກງານເທົ່ານັ້ນທີ່ຕ້ອງເຮັດໃຫ້ HR ປະທັບໃຈໃນການສຳພາດງານ HR ເອງກໍ່ຕ້ອງສ້າງຄວາມປະທັບໃຈໃຫ້ຜູ້ສະມັກງານເຊັ່ນກັນ ຫຼາຍຄັ້ງທີ່ຜູ້ສະມັກງານ ເປັນຝ່າຍບໍ່ປະທັບໃຈ ແລະ ມີຄວາມໃນໃຈທີ່ຢາກບອກໃຫ້ຜູ້ສຳພາດຮູ້ເຖິງຄວາມຮູ້ສຶກຂອງພວກເຂົາ ວ່າມີຫຍັງແດ່ທີ່ເຮັດໃຫ້ຜູ້ສະມັກງານຮັບບໍ່ໄດ້ ແລະ HR ຄວນຈະຕ້ອງປັບປຸງໃນດ້ານຕ່າງໆ ດັ່ງນີ້:
- ເວລາຂອງຜູ້ສະມັກງານທີ່ມີຄ່າຄືກັນ
ບັນຫາທີ່ຜູ້ສະມັກງານພົບສະເໝີຄື: ຖືກປ່ອຍໃຫ້ນັ່ງລໍຖ້າດົນເກີນໄປ ເມື່ອນັດຜູ້ສະມັກງານມາສຳພາດງານແລ້ວ ຜູ້ສຳພາດຄວນເຄຍຄິວໃຫ້ວ່າງເຊັ່ນກັນ ຄວນຄຳນຶງເຖິງໃຈເຂົາໃຈເຮົາ ເຮົາຍັງຢາກໃຫ້ຜູ້ສະມັກງານມາຕົງເວລາ ຜູ້ສະມັກກໍ່ຢາກໃຫ້ຜູ້ສຳພາດຕົງເວລາຄືກັນ ບາງບໍລິສັດໃຫ້ນັ່ງລໍຖ້າດົນໆ ແຕ່ສຳພາດບໍ່ຮອດ 10 ນາທີ ຫຼື ບາງຄັ້ງບໍລິຫານເວລາບໍ່ດີ ກໍ່ປ່ອຍໃຫ້ຜູ້ສະມັກລໍຖ້າດົນເປັນຊົ່ວໂມງ ຈຶ່ງຈະໄດ້ສຳພາດ ຫຼັງສຳພາດຍັງບອກໃຫ້ມີການທົດສອບຕໍ່ ເສຍດາຍເວລານັ່ງລໍຖ້າ ແລະ ເຮັດໃຫ້ເກີດຄວາມຮູ້ສຶກບໍ່ປະທັບໃຈບໍລິສັດອີກດ້ວຍ.
- ຄວນອ່ານຊີວະປະຫວັດຫຍໍ້ກ່ອນເອີ່ນມາສຳພາດ
ມີບໍລິສັດຈຳນວນບໍ່ໜ້ອຍ ທີ່ເອີ້ນຜູ້ສະມັກງານມາສຳພາດງານ ໂດຍບໍ່ໄດ້ຄັດເລືອກຊີວະປະຫວັດຫຍໍ້ເລີຍວ່າ ຄຸນສົມບັດກົງກັບທີ່ກຳລັງຊອກຫາຢູ່ ຫຼື ບໍ່ ເຮັດໃຫ້ຜູ້ສະມັກງານຖືກປະຕິເສດດ້ວຍເຫດຜົນທີ່ບໍ່ໜ້າໃຫ້ອະໄພ ເຊັ່ນ: ຮັບສະເພາະຜູ້ຊາຍ, ຈົບບໍ່ຖືກກັບສາຍງານທີ່ຕ້ອງການ, ເກຣດສະເລ່ຍບໍ່ເຖິງ, ຮັບບາງສະຖາບັນເທົ່ານັ້ນ, ບໍ່ມີປະສົບການດ້ານທີ່ຕ້ອງການມາກ່ອນ ຊຶ່ງຂໍ້ມູນເຫຼົ່ານີ້ຜູ້ສະມັກງານຂຽນໄວ້ໃນຊີວະປະຫວັດຫຍໍ້ແລ້ວ ຖ້າບໍ່ກົງກັບທີ່ຕ້ອງການກໍ່ບໍ່ຄວນເອີ້ນມາສຳພາດຕັ້ງແຕ່ຕົ້ນ.
- ຢ່າເຮັດແບບນີ້ກັບໃຜອີກເລີຍ
ບາງບໍລິສັດຕອບຮັບຜູ້ສະມັກງານເຂົ້າເຮັດວຽກແລ້ວ ນັດເຊັນສັນຍາ ນັດມື້ເລີ່ມເຮັດວຽກ ຕົກລົງເງິນເດືອນ ແລະ ສະຫວັດດີການກັນເປັນຢ່າງດີແລ້ວ ເຮັດໃຫ້ຜູ້ສະມັກງານວາງໃຈວ່າໄດ້ວຽກໃໝ່ເຮັດແນ່ນອນ ຈຶ່ງໄປລາອອກຈາກບ່ອນເຮັດວຽກເກົ່າຮຽບຮ້ອຍ ແຕ່ບໍລິສັດໂທມາແຈ້ງວ່າຮັບເຂົ້າເຮັດວຽກບໍ່ໄດ້ແລ້ວ ອ້າງວ່າບໍ່ມີງົບປະມານ ຜູ້ບໍລິຫານບໍ່ຍອມເຊັນອະນຸມັດ ຢ່າເຮັດກັບຜູ້ສະມັກງານຢ່າງໄຮ້ຄວາມຮັບຜິດຊອບແບບນີ້ເລີຍ.
- ຢ່າຕໍ່ເງິນເດືອນ
ຜູ້ສະມັກງານທີ່ລະບຸເງິນເດືອນໄວ້ໃນ ຊີວະປະຫວັດຫຍໍ້ ມີຄວາມຄາດຫວັງວ່າບໍລິສັດທີ່ເອີ້ນພວກເຂົາໄປສຳພາດງານຈະຍອມຮັບໃນອັດຕາເງິນເດືອນທີ່ພວກເຂົາສະເໜີໄປ ຫຼື ສາມາດຕໍ່ລອງໄດ້ເລັກໜ້ອຍ ສ່ວນຫຼາຍແລ້ວການສຳພາດເປັນໄປດ້ວຍດີ ຈົນເຖິງການເຈລະຈາເລື່ອງເງິນເດືອນ ກັບຖືກຕໍ່ເງິນເດືອນຈົນຕ່ຳ ໜ້ອຍກວ່າເງິນເດືອນຢູ່ບໍລິສັດເກົ່າທີ່ຜູ້ສະມັກງາຍເຄີຍໄດ້ດ້ວຍຊ້ຳ ເຮັດໃຫ້ຜູ້ສະມັກງານສ່ວນຫຼາຍປະຕິເສດ ແລະ ຮູ້ສຶກເສຍເວລາກັບການມາສຳພາດງານໃນຄັ້ງນີ້ ເພາະສະນັ້ນ ຖ້າບໍລິສັດມີບັນຫາເລື່ອງເງິນເດືອນ ຄວນແຈ້ງຜູ້ສະມັກງານກ່ອນໃນຕອນທີ່ໂທໄປນັດສຳພາດ ວ່າສາມາດຈ່າຍໄດ້ເງິນເດືອນໃຫ້ໄດ້ປະມານເທົ່າໃດ ຖ້າຜູ້ສະມັກງານຕົກລົງແລ້ວຄ່ອຍນັດມາສຳພາດ ຈະໄດ້ບໍ່ເສຍເວລາກັນທັງສອງຝ່າຍ.
- ໃຫ້ກຽດຜູ້ສະມັກງານ
HR ທີ່ຄິດວ່າຕົນເອງເປັນຜູ້ຍິ່ງໃຫຍ່ ມີອຳນາດຕັດສິນຊະຕາຊີວິດຂອງຜູ້ສະມັກງານໄດ້ ຈຶ່ງວາງທ່າ ເວົ້າຈາບໍ່ດີ ບໍ່ຮັກສານ້ຳໃຈຜູ້ສະມັກງານ ຄິດວ່າຕົວເອງມີສິດເລືອກຢູ່ຝ່າຍດຽວ ໂດຍບໍ່ຄິດວ່າຜູ້ສະມັກງານກໍ່ມີສິດເລືອກເທົ່າໆກັບຕົນເອງຄືກັນ ແລະ ບໍລິສັດດີໆກໍ່ຍັງມີໃຫ້ເລືອກອີກຫຼາຍເຊັ່ນກັນ ບໍລິສັດອາດເສຍໂອກາດທີ່ຈະໄດ້ຄົນມີຄວາມສາມາດມາຮ່ວມງານນຳ ພຽງເພາະຜູ້ສະມັກງານບໍ່ປະທັບໃຈຜູ້ສຳພາດງານກໍ່ເປັນໄປໄດ້.
HR ກໍ່ຄືໜ້າຕາຂອງບໍລິສັດ ພຶດຕິກຳຂອງ HR ຈະສະທ້ອນພາບລັກຂອງບໍລິສັດ ທີ່ຈະຖືກບອກຕໍ່ໆກັນໄປໃນທາງທີ່ດີ ຫຼື ບໍ່ດີກໍ່ໄດ້ ຂຶ້ນກັບການວາງຕົວຂອງ HR ເຊັ່ນກັນ