ຍິງຊາວອິນເດຍມີອາການເຈັບທ້ອງ ຜົນສະແກນ MRI ພົບວ່າມີໂຕອ່ອນມາຢູ່ໃນຕັບ ເຊິ່ງເກີດຂຶ້ນໄດ້ຍາກມີພຽງ 45 ກໍລະນີ ໃນທົ່ວໂລກ
ຈາກກໍລະນີຍິງຊາວອິນເດຍ ອາຍຸ 35 ປີ, ທີ່ກຳລັງຖືພາ 12 ອາທິດ ມີອາການເຈັບບໍລິເວນທ້ອງ ແລະ ອາຈຽນບໍ່ຢຸດ, ຈຶ່ງໄດ້ເຂົ້າໄປກວດທີ່ໂຮງໝໍ, ຈາກຜົນ X-ray ທ້ອງບໍ່ມີອາການຜິດປົກກະຕິ ແຕ່ວ່າຈາກຜົນສະແກນ MRI ປະກົດວ່າ ລາວມີອາການຖືພານອກມົດລູກ ແລະ ໂຕອ່ອນໄດ້ໄປຈະເລີນເຕີບໂຕຢູ່ໃນຕັບ.
ການຖືພານອກມົດລູກເກີດຂຶ້ນເມື່ອໄຂ່ທີ່ໄດ້ຮັບການປະຕິສົນທິແລ້ວ ເຄື່ອນຕົວໄປຝັງຕົວໃນບໍລິເວນນອກມົດລູກ ບາງກໍລະນີ້ອາດຈະຄ້າງຢູ່ໃນທໍ່ນໍາໄຂ່ ຫຼື ອາດໄປຝັງຢູ່ທີ່ຜິວອະໄວຍະວະອື່ນ ໃນບາງກໍລະນີ້ອາດເປັນອັນຕະລາຍເຖິງແກ່ຊີວິດ.
ຜູ້ຊ່ຽວຊານໄດ້ອອກມາຕອບວ່າ ໃນກໍລະນີນີ້ ທີ່ໂຕອ່ອນໄປຝັງໂຕຢູ່ທີ່ຕັບໄດ້ເພາະວ່າຕັບມີການໄຫຼວຽນເລືອດທີ່ສົມບູນ ແຕ່ສຸດທ້າຍອະໄວຍະວະນີ້ກໍບໍ່ສາມາດລໍ່ລ້ຽງໂຕອ່ອນໃຫ້ເຕີບໂຕໄດ້.
ການຖືພານອກມົດລູກທີ່ຢູ່ໃນຕັບເປັນກໍລະນີທີ່ຫາໄດ້ຍາກເກີດຂຶ້ນໄດ້ພຽງ 1 ຕໍ່ 8,000,000 ຄົນ ເຊິ່ງໃນທົ່ວໂລກມີການຖືພາໃນຕັບເກີດຂຶ້ນພຽງ 45 ຄົນເທົ່ານັ້ນ. ສຸດທ້າຍ ຍິງຄົນນີ້ກໍຈຳເປັນຈະຕ້ອງໄດ້ຮັບການຜ່າຕັດເພື່ອນໍາໂຕອ່ອນອອກມາ ເພາະຖ້າປ່ອຍໃຫ້ຈະເລີນເຕີບໂຕຕໍ່,ຕັບອາດຈະເກີດຄວາມເສຍຫາຍ ແລະ ອາດຈະເຮັດໃຫ້ເຖິງແກ່ຊີວິດໄດ້.
ແຫຼ່ງຂໍ້ມູນ: BBC