![12239569_1642879072628686_2549557079328580140_n](http://www.laopost.com/wp-content/uploads/2015/11/12239569_1642879072628686_2549557079328580140_n.jpg)
ຮູບຫຼໍ່ທ່ານ ສີທົນ ກົມມະດຳ ທີ່ເປັນການນຳສຳຄັນທ່ານໜຶ່ງ ໃນຂະບວນການຕໍ່ສູ້ປົດປ່ອຍຊາດ ຈະມີພິທີສົມໂພດໃນວັນທີ 20 ພະຈິກ 2015 ນີ້ ທີ່ເມືອງປາກຊ່ອງ ແຂວງຈຳປາສັກ.
ເພື່ອກະກຽມໃຫ້ແກ່ພິທີສົມໂພດ, ໃນວັນທີ 30 ຕຸລາ 2015 ທີ່ຜ່ານມາ ທ່ານ ບົວລິນ ວົງພະຈັນ ຮອງເຈົ້າແຂວງຈຳປາສັກ ໄດ້ເຄື່ອນໄຫວພົບປະກັບການນຳຂອງເມືອງ ໂດຍມີທ່ານ ຄຳສີ ປ່ຽງວໍລະວົງ ເຈົ້າເມືອງເມືອງປາກຊ່ອງ ພ້ອມດ້ວຍອະນຸກຳມະການຮັບຜິດຊອບ ການຈັດງານຂອງເມືອງຕ້ອນຮັບ.
ໂອກາດນີ້ ທ່ານຮອງເຈົ້າແຂວງໄດ້ຮັບຟັງ ການລາຍງານຄວາມພ້ອມຂອງ ອະນຸກຳມະການຕ່າງໆເປັນຕົ້ນ: ອະນຸກຳມະການສະຖານທີ່, ເນື້ອໃນ, ຂະບວນການກິລາ, ສິລະປະ, ສາສະໜາ, ປະດັບປະດາ, ຮັບແຂກ, ພິທີການ, ປ້ອງກັນຄວາມສະຫງົບ, ເສດຖະກິດ-ສັງຄົມ, ສຸຂະພາບ, ຈັດວາງສະແດງສິນຄ້າ ແລະ ອະນຸກຳມະການ ເກັບກຳຂຽນບົດຂຽນຂ່າວເຊິ່ງເຫັນວ່າ ການເຄື່ອນໄຫວຂອງແຕ່ລະອະນຸກຳມະການ ມີຄວາມຄືບໜ້າ ແລະ ມີຄວາມພ້ອມ. ຫຼັງຈາກຮັບຟັງການລາຍງານແລ້ວ ທ່ານຮອງເຈົ້າແຂວງ ໄດ້ລົງໄປເບິ່ງ ສະຖານທີ່ຈັດພິທີຢູ່ທີ່ອະນຸສາວະລີ ທ່ານ ສີທົນ ກົມມະດຳຕື່ມອີກ.
ຂ່າວ-ພາບ: ສອນໄຊ ຖວທ ເມືອງປາກຊ່ອງ
ລາຍງານໂດຍ: ໜັງສືພິມຈຳປາໃໝ່