ເມື່ອບໍ່ດົນນີ້, ເຈົ້າໜ້າທີ່ ປກສ ເມືອງປາກທາ ແຂວງບໍ່ແກ້ວ ໄດ້ຈັບຕົວຜູ້ຄ້າຢາເສບຕິດລາຍໃຫຍ່ຄື ທ້າວ ທາຍລີວັນ ແຊ່ຈ່າວ ອາຍຸ 29 ປີ ແລະ ທ້າວຈານຕອງ ອາຍຸ 40 ປີ ຢູ່ບ້ານຫ້ວຍແມງ ເມືອງປາກທາ ພ້ອມຂອງກາງຢາບ້າຈຳນວນ 120,000 ເມັດ.
ຜ່ານການສືບສວນ-ສອບສວນຂອງເຈົ້າໜ້າທີ່ ພວກກ່ຽວຮັບສາລະພາບວ່າ: ຢາເສບຕິດດັ່ງກ່າວ ແມ່ນຊື້ມາຈາກເຄືອຂ່າຍຄ້າຢາເສບຕິດ ຢູ່ເມືອງຫ້ວຍຊາຍ ແຂວງບໍ່ແກ້ວ ເພື່ອຈະເອົາໄປສົ່ງໃຫ້ລູກຄ້າຢູ່ບ້ານປໍ ເມືອງວຽງແກ່ນ ຈັງຫວັດຊຽງລາຍ ປະເທດໄທ ແຕ່ຖືກເຈົ້າໜ້າທີ່ຈັບຕົວໄດ້ກ່ອນ. ປັດຈຸບັນຄະດີຢາເສບຕິດລາຍນີ້ ພວມຢູ່ໃນຂັ້ນຕອນຂະຫຍາຍຜົນຫາຜູ້ຮ່ວມຂະບວນການ ມາດຳເນີນຄະດີຕາມລະບຽບກົດໝາຍໂດຍໄວ.
ຂ່າວຍັງໃຫ້ຮູ້ຕື່ມວ່າ: ເມື່ອທ້າຍອາທິດຜ່ານມາ, ເຈົ້າໜ້າທີ່ ປກສ ແຂວງຄໍາມ່ວນ ສາມາດຈັບຕົວຜູ້ຄ້າຂາຍຢາເສບຕິດຕົວອັນຕະລາຍ ມາດໍາເນີນຄະດີຕາມລະບຽບກົດໝາຍຄື: ທ້າວ ວັນລົບ ອາຍຸ 38 ປີ ແລະ ທ້າວ ຕູ້ ອາຍຸ 38 ປີຢູ່ບ້ານໜອງສະພັງທົ່ງ ເມືອງໜອງບົກ ແຂວງຄໍາມ່ວນ ພ້ອມຂອງກາງຢາບ້າເກືອບ 200 ເມັດ ໂດຍທັງສອງຖືກເຈົ້າໜ້າທີ່ຈັບຕົວໄດ້ ໃນຂະນະເອົາຢາເສບຕິດ ໄປສົ່ງໃຫ້ລູກຄ້າຢູ່ເຂດບ້ານໜອງສະພັງທົ່ງ.
ແຫລ່ງຂ່າວ:
