ປະເທດສະວິດ ແລະ ເຢຍລະມັນ ໃຫ້ການສະໜັບສະໜູນລັດຖະບານລາວ ເພື່ອປະຕິຮູບລະບົບອະຊີວະສຶກສາຂອງປະເທດ ເຂົ້າໃນແຜນງານ “ການສຶກສາວິຊາຊີບຢູ່ ສປປ ລາວ” (VELA) ຈະປະກອບເຂົ້າໃນຂະບວນການປະຕິຮູບ ສ້າງໃຫ້ບັນດາໂຮງຮຽນອະຊີວະສຶກສາບັນລຸເປົ້າໝາຍ ຕາມຄວາມຕ້ອງການຂອງຕະຫຼາດແຮງງານຢູ່ ສປປ ລາວ.
ແຜນງານດັ່ງກ່າວຈະໃຊ້ງົບປະມານທັງໝົດ 164.800 ລ້ານກີບ ປະມານ 20,6 ລ້ານໂດລາສະຫະລັດ ຈະເລີ້ມຈັດຕັ້ງປະຕິບັດໄປຈົນເຖິງປີ 2017 ທີ່ຈະມາເຖິງນີ້ ເຊິ່ງໄດ້ຮັບການຈັດຕັ້ງປະຕິບັດໂດຍ ຈີໄອເຊັດ (GIZ) ໂດຍການສະໜັບສະໜູນຂອງອົງການຮ່ວມມືສະວິດ ເພື່ອການພັດທະນາ (SDC) ແລະ ກະຊວງແຫ່ງຊາດເຢຍລະມັນ ເພື່ອການຮ່ວມມື ແລະ ພັດທະນາດ້ານເສດຖະກິດ (BMZ).
ພິທີເຊັນສັນຍາໃຫ້ການສະໜັບສະໜູນໃນຄັ້ງນີ້ ໄດ້ມີຂຶ້ນໃນທ້າຍເດືອນພະຈິກ 2013 ທີ່ຜ່ານມາ ຢູ່ນະຄອນຫຼວງວຽງຈັນ ໂດຍມີບັນດາການນຳຂັ້ນສູງຂອງກະຊວງສຶກສາທິການ ແລະ ກີລາ ກະຊວງແຮງງານ ແລະ ສະຫວັດດີການ-ສັງຄົມ ກະຊວງແຜນການ ແລະ ການລົງທຶນ ສະພາອຸດສາຫະກຳ ແລະ ການຄ້າແຫ່ງຊາດລາວ ອົງການຮ່ວມມືສະວິດເພື່ອການພັດທະນາ ສະຖານທູດເຢຍລະມັນ ແລະ ຈີໄອເຊັດ ເຂົ້າຮ່ວມເປັນສັກຂີພິຍານ.