ກອງປະຊຸມລະຫວ່າງຄະນະປະຈຳສະພາແຫ່ງຊາດ ກັບຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທົ່ວປະເທດ ປະຈຳປີ 2015 ຈັດຂຶ້ນລະຫວ່າງວັນທີ 5-7 ພະຈິກ 2015 ຢູ່ທີ່ຫ້ອງປະຊຸມໃຫຍ່ສະພາແຫ່ງຊາດ ໂດຍເປັນປະທານຂອງທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ.
ໂອກາດດັ່ງກ່າວທ່ານ ສົມພັນ ແພງຄຳມີ ໄດ້ກ່າວວ່າ: ກອງປະຊຸມຄັ້ງນີ້ ຖືວ່າມີຄວາມໝາຍຄວາມສຳຄັນເປັນຢ່າງຍິ່ງ ເນື່ອງຈາກຜູ້ເຂົ້າຮ່ວມຈະໄດ້ພ້ອມກັນຕີລາຄາຄືນ ການເຄື່ອນໄຫວວຽກງານ 5 ປີຂອງຄະນະສະມາຊິກສະພາແຫ່ງຊາດ ແລະ ການຊີ້ນຳ-ນຳພາຂອງຄະນະປະຈຳສະພາແຫ່ງຊາດ ຕໍ່ເຂດເລືອກຕັ້ງຕ່າງໆໃນໄລຍະຜ່ານມາ ຫາລື ແລະ ກຳນົດແຜນຍຸດທະສາດ ໃນການພັດທະນາລະບົບສະພາ ແຕ່ນີ້ຫາປີ 2020 ປີ 2025 ແລະ ປີ 2030 ພ້ອມນັ້ນ ກອງປະຊຸມຍັງເປັນເຈົ້າການຢ່າງຕັ້ງໜ້າ ເຂົ້າໃນການຫາລື ແລະ ກຳນົດແຜນວຽກ ເພື່ອຮັບໃຊ້ແກ່ການເລືອກຕັ້ງສະມາຊິກສະພາ ຊຸດທີ VIII ແລະ ສະມາຊິກສະພາປະຊາຊົນຂັ້ນແຂວງ ລວມທັງວຽກງານຄົ້ນຄວ້າ-ທາບທາມ 3 ຮ່າງກົດໝາຍຄື: ກົດໝາຍວ່າດ້ວຍສະພາແຫ່ງຊາດ ກົດໝາຍວ່າດ້ວຍສະພາປະຊາຊົນຂັ້ນແຂວງ ແລະ ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງຕື່ມອີກ.
ແຫລ່ງຂ່າວ:
