ທີມນັກວິໄຈຈາກ Loma Linda University (ມະຫາວິທະຍາໄລ ໂລມາ ລິນດາ) ຈາກລັດແຄລິຟໍເນຍ ຂອງປະເທດສະຫະລັດອາເມຣິກາລະບຸວ່າ ຈາກຜົນການສຶກສາເບື້ອງຕົ້ນພົບວ່າ ການໄດ້ຮັບສານ “ໂກໂກ້” ຈະໄປສະສົມໃນສະໝອງ ຊຶ່ງຊ່ວຍໃນດ້ານຄວາມຈຳແລະການຮຽນຮູ້ ການຮັບປະທານ “ຊັອກໂກແລັດ“ ນັ້ນຈຶ່ງມີສ່ວນກ່ຽວພັນກັບປະໂຫຍດຂອງຮ່າງກາຍ ເຊັ່ນ ການຫລຸດຄວາມຄຽດ ການບຳລຸງຫົວໃຈ ນອກຈາກນີ້ງານວິໄຈຍັງລະບຸວ່າ “ມັນຊ່ວຍໃຫ້ສະຫມອງຂອງເຈົ້າສະຫລາດຂຶ້ນ ແລະເພີ່ມປະສິດທິພາບຄວາມຈຳອີກດ້ວຍ”
ດຣ.ລີເບີລ໌ ຫົວໜ້າທີມວິໄຈລະບຸວ່າ “ພວກເຮົາຕື່ນເຕັ້ນກັບຜົນການສຶກສາເທື່ອນີ້ຫລາຍ ເພາະອາດເປັນປະຕູໄປສູ່ການຊ່ວຍຟື້ນຟູຄວາມຈຳຂອງຜູ້ປ່ວຍທີ່ມີອາການຄວາມຈຳເສື່ອມ ແລະພະຍາດທີ່ກ່ຽວພັນກັບການແກ່ເຖົ້າ”
ເຮົາເຊື່ອວ່າ ການໄດ້ຮັບສານຊະນິດນີ້ ຈະຊ່ວຍໃຫ້ເກີດການຕື່ນຕົວຂອງປະສາດ ແລະ ຮັກສາໂປຣຕີນ ຊຶ່ງຈະຊ່ວຍໃຫ້ເຊລ໌ປະສາດຈະເລີນເຕີບໃຫ່ຍໄດ້ດີ ຊຶ່ງນັ້ນໝາຍເຖິງ ການເພີ່ມປະສິດທິພາບການເຮັດວຽກງານຂອງສະໝອງ ການສື່ສານຂອງສະໝອງ ການໄຫລວຽນເລືອດ ແລະຫລອດເລືອດໃນລະບົບຮັບຮູ້ຂອງສະໝອງອີກດ້ວຍ
ຊຶ່ງທັງໝົດນີ້ກ່ຽວພັນກັບຄວາມສາມາດດ້ານການໃຊ້ເຫດຜົນ ສະຕິປັນຍາ ຄວາມຈຳ ຄວາມຮັບຮູ້ ພາວະອາລົມ ແລະພຶດຕິກຳຂອງຄົນ ພວກເຮົາເຊື່ອວ່າ “ສານໂກໂກ້“ ມີຄວາມກ່ຽວພັນກັບລະບົບໄຟຟ້າໃນເສັ້ນປະສາດ ແຕ່ບໍ່ວ່າຈະເຄີຍມີການຢືນຢັນເລື່ອງນີ້ມາແລ້ວ ກໍຍັງຈະຕ້ອງມີການສຶກສາຫາຂໍ້ມູນກັນເພີ່ມເຕີມຕໍ່ໄປອີກຢູ່ດີ
