ລັດຖະບານຣັດເຊຍສົ່ງເຄື່ອງບິນໄປຮັບສົບຂອງຜູ້ເສຍຊີວິດຈາກເຫດເຄື່ອງບິນໂດຍສານ ຂອງສາຍການບິນ “ໂຄກາລີມາເວຍ” ຕົກທີ່ທະເລໄຊນາຍຂອງອີຍິບ ເຮັດໃຫ້ມີຜູ້ເສຍຊີວິດ 224 ລາຍ ຂະນະທີ່ຫລາຍຝ່າຍເຕືອນບໍ່ຄວນເລັ່ງສະຫລຸບສາເຫດຂອງເຫດເສົ້າສະຫລົດເທື່ອນີ້ ມື້ວັນຈັນທີ່ 2 ພະຈິກ 2015 ສຳນັກຂ່າວຕ່າງປະເທດລາຍງານຈາກນະຄອນຫລວງໄຄໂລ ປະເທດອີຍິບ ເມື່ອວັນທີ່ 2 ພະຈິກ ກ່ຽວກັບຄວາມຄືບໜ້າຫລັງເກີດເຫດເສົ້າສະຫລົດຖ້ຽວບິນເຄຈີແອນ9268 ຂອງສາຍການບິນໂຄກາລີມາເວຍ ຕົກໃນເຂດພູເຂົາຂອງທະເລໄຊນາຍ ທາງຕອນເໜືອຂອງອີຍິບ ເມື່ອມື້ວັນເສົາທີ່ຜ່ານມາ ພາກຊີວິດຜູ້ຢູ່ເທິງເຄື່ອງທັງ 224 ຄົນ ຖ້ຽວບິນພິເສດຂອງລັດຖະບານຣັດເຊຍຮັບເອົາຮ່າງຂອງຜູ້ເສຍຊີວິດກຸ່ມທຳອິດ 144 ລາຍ ອອກເດີນທາງຈາກສະໜາມບິນຂອງກອງທັບອາກາດອີຍິບ ໃນເມືອງຄາເບດ ເດີນໜ້າກັບນະຄອນເຊນປີເຕີສ໌ເບີກແລ້ວ ເມື່ອມື້ວັນອາທິດ ຂະນະທີ່ປະທານາທິບໍດີອັບເດລ໌ ຟັດຕາ ອັນຊິຊີ ຜູ້ນຳອີຍິບ ຖະແຫລງຂໍໃຫ້ທຸກຝ່າຍຢ່າຢ້າວດ່ວນສະຫລຸບ “ສາເຫດທີ່ແທ້ຈິງ” ຂໍເຫດການເສົ້າສະຫລົດໃນເທື່ອນີ້ ພ້ອມທັງເຜີຍວ່າ ຜູ້ຊ່ຽວຊານຢູ່ລະຫວ່າງກວດສອບໂດຍອາໄສເບາະແສຈາກກ່ອງບັນທຶກຂໍ້ມູນການບິນ ຫລືກ່ອງດຳ ຊຶ່ງທີມກູ້ໄພສາມາດເກັບກູ້ໄດ້ຄົບແລ້ວທັງສອງກ່ອງ ດ້ານທ້າວວິກເຕີລ໌ ໂຊໂລເຊນໂກ ປະທານຄະນະກັນມາທິການການບິນລະຫວ່າງລັດຂອງທາງການຣັດເຊຍ ໃນຖານະຫົວໜ້າທີມສືບສວນ ກ່າວວ່າເສດຊາກຂອງເຄື່ອງບິນແຕກກະຈາຍອອກເປັນລັດສະໜີກວ້າງຫລາຍກິໂລແມັດ ແລະເຫັນພ້ອມກັບຜູ້ນຳອີຍິບວ່າ ທຸກຝ່າຍຍັງບໍ່ຄວນເລັ່ງສະຫລຸບສາເຫດການຕົກຂອງເຄື່ອງບິນ ໃນມື້ດຽວກັນ ສະຖານທີ່ລາດສະການທຸກແຫ່ງໃນຣັດເຊຍຫລຸດທົງຊາດລົງເຄິ່ງເສົາເພື່ອສະແດງຄວາມໄວ້ອາໄລໃຫ້ ແກ່ຜູ້ເສຍຊີວິດ ຂະນະທີ່ສະຖານີໂທລະທັດ ແລະ ວິທະຍຸທຸກແຫ່ງງົດລາຍການບັນເທີງ ໂດຍປະຊາຊົນຈຳນວນຫລາຍອອກມາຊຸມນຸມກັນທີ່ຈະຕຸລັດໃນເຂດໃຈກາງນະຄອນເຊນປີເຕີສ໌ເບີກ ເພື່ອຮ່ວມກັນຈູດທຽນໄວ້ອາໄລ ດ້ານກຸ່ມສາຍການບິນໃນຕະເວັນອອກກາງ ນຳໂດຍເອມິເຣດສ໌ ເອທິຮັດ ກາຕາລ໌ ແອລ໌ເວີຍ ຄູເວດ ອອກຖະແຫລງການໃນເວລາໄລ່ເລ່ຍກັນ ເລື່ອງການລະງັບບິນຜ່ານພາກເໜືອຂອງອີຍິບ ໂດຍສະເພາະທະເລໄຊນາຍ ຢ່າງໃດກໍຕາມ ສະເພາະເອທິຮັດຢືນຢັນຈະຍັງຄົງບິນຜ່ານທະເລໄຊນາຍ ແຕ່ລ້ຽງນ່ານຟ້າບາງຈຸດໃນພື້ນທີ່ ຖ້ຽວບິນ ເຄຈີແອນ9268 ຂອງສາຍການບິນໂຄກາລີມາເວຍ ໃຊ້ເຄື່ອງບິນແອລ໌ບັດເອ-321 ອອກເດີນທາງຈາກເມືອງຊາມເອນຊີກ ທະເລແດງຂອງອີຍິບ ເມື່ອມື້ວັນເສົາ ໂດຍມີຈຸດໝາຍຄືນະຄອນເຊນປີເຕີສ໌ເບີກໃນຣັດເຊຍ ມີຜູ້ໂດຍສານ 217 ຄົນ ແລະລູກເຮືອ 7 ຄົນ ຂາດການຕິດຕໍ່ກັບຫໍບັງຄັບການບິນໃນໄຊປັດຫລັງອອກເດີນທາງໄດ້ພຽງ 23 ນາທີ ເຫດການທີ່ເກີດຂື້ນຖືເປັນອຸບັດຕິເຫດທາງອາກາດເທື່ອຮ້າຍແຮງທີ່ສຸດໃນປະຫວັດສາດຂອງຣັດເຊຍ“
