ເມື່ອວັນທີ 28 ຕຸລາ ທີ່ຜ່ານມາ ກຸ່ມການສົນທະນາແລກປ່ຽນຄວາມຄິດເຫັນ ດ້ານກົນໄກຄວາມຮ່ວມມືລ້ານຊ້າງ – ແມ່ຂອງ ທີ່ປະກອບໄປດ້ວຍຜູ້ຊ່ຽວຊານນັກວິຊາການ ແລະສື່ມວນຊົນຈາກຈີນ ໄດ້ຈັດການເສວະນາຂຶ້ນຮ່ວມກັບສື່ມວນຊົນລາວ ທີ່ນະຄອນຫຼວງວຽງຈັນ.

ທ່ານ ສະຫວັນຄອນ ຣາຊະມົນຕີ ລັດຖະມົນຕີຊ່ວຍວ່າການກະຊວງ ຖະແຫຼງຂ່າວ ວັດທະນະທຳ ແລະທ່ອງທ່ຽວ ລະບຸວ່າຈະສາມາດສ້າງກົນໄກທີ່ສົ່ງເສີມ ຂອບຄວາມຮ່ວມມືທາງເສດຖະກິດ ລ້ານຊ້າງ-ແມ່ຂອງ ເຊິ່ງເປັນຂອບຄວາມຮ່ວມມືໃໝ່ ລະຫວ່າງຈີນແລະປະເທດໃນອະນຸພູມິພາກ ລຸ່ມແມ່ນ້ຳຂອງ (ລາວ, ຫວຽດນາມ, ກຳປູເຈຍ, ມຽນມາ ແລະໄທ) ນີ້ໄດ້ໃນໄລຍະອັນໃກໆນີ້.

ທ່ານນາງ ຈິນເຟິ່ງ ອະດີດເອກອັກຄະລັດຖະທູດຈີນ ປະຈຳກຳປູເຈຍກ່າວວ່າ ປະເທດໃນລຸ່ມແມ່ນ້ຳຂອງ ເປັນປະເທດຫຸ້ນສ່ວນທີ່ສຳຄັນ ໃນການສ້າງຊຸມຊົນທີ່ໄດ້ຜົນປະໂຫຍດຮ່ວມກັນ ລວມເຖິງຍັງເປັນການຊຸກຍູ້ການກຳເນີດໂຄງການ  “One Belt, One Road” ແລະການອະພິປາຍເລື່ອງໂຄງການລ້ານຊ້າງ – ນ້ຳຂອງ ນັ້ນ ຈະຊ່ວຍໃຫ້ທຸກຝ່າຍຊ່ວຍກັນສ້າງ ພື້ນຖານຄວາມຮ່ວມມືທີ່ດີຕໍ່ກັນ ແລະເຮັດໃຫ້ພື້ນທີ່ຄວາມຮ່ວມມືນີ້ ກາຍເປັນຈຸດທີ່ສຳຄັນຈຸດໜຶ່ງຂອງໂຄງການ  “One Belt, One Road” ຂອງຈີນ.

ຈິນເຟິ່ງກ່າວວ່າຈະມີການຈັດປະຊຸມ ລັດຖະມົນຕີຕ່າງປະເທດເພື່ອຫາລື ເລື່ອງຄວາມຮ່ວມມື ລ້ານຊ້າງ-ແມ່ນ້ຳຂອງຂຶ້ນ ເປັນຄັ້ງທຳອິດ ຢູ່ມົນທົນຢູນນານ ໃນໄລຍະກາງເດືອນພະຈິກ ເພື່ອໃຫ້ທີ່ປະຊຸມສ້າງກົນໄກດັ່ງກ່າວຂຶ້ນ ຢ່າງເປັນທາງການ.