ວັນທີ 28 ພະຈິກ 2013 ນີ້ ອົງການຮ່ວມມືອະນຸຮັກສິ່ງແວດລ້ອມສາທາລະນະລັດເກົາຫຼີ ໄດ້ມອບເຄື່ອງຊ່ວຍເຫຼືອໃຫ້ແກ່ ສປປ ລາວ ມູນຄ່າ 17.906 ໂດລາສະຫະລັດ ຫຼື ປະມານ 136 ລ້ານກີບ ຊຶ່ງພິທີມອບ-ຮັບໄດ້ຈັດຂຶ້ນທີ່ໂຮງຮຽນປະຖົມສົມບູນ ບ້ານດົງສະຫວາດ ເມືອງສີສັດຕະນາກ ນະຄອນຫຼວງວຽງຈັນ ກ່າວມອບໂດຍແມ່ນທ່ານ ລິມ ແຊ ວັນ ປະທານອົງການຮ່ວມມືອະນຸຮັກສິ່ງແວດລ້ອມ ສ.ເກົາຫຼີ ແລະ ກ່າວຮັບໂດຍແມ່ນທ່ານ ໄຊທານີ ໄຊຍະສານ ຮອງຫົວໜ້າພະແນກສຶກສາທິການ ແລະ ກີລາ ນະຄອນຫຼວງວຽງຈັນ ມີທ່ານທູດເກົາຫຼີ ປະຈຳ ສປປ ລາວ ທ່ານ ພອນໄຊ ອິນທະລືໄຊ ຫົວໜ້າສະມາຄົມພັດທະນາເດັກນ້ອຍ ແລະ ໄວໜຸ່ມດົງສະຫວາດ ຕາງໜ້າອຳນາດການປົກຄອງ ເມືອງສີສັດຕະນາກ ອຳນາດການປົກຄອງບ້ານ ອຳນວຍການໂຮງຮຽນ ຄູ-ອາຈານ ພໍ່ແມ່ຜູ້ປົກຄອງນັກຮຽນ ແລະ ນັກຮຽນ ເຂົ້າຮ່ວມ.
ເຄື່ອງຊ່ວຍເຫຼືອທີ່ທາງອົງການຮ່ວມມືອະນຸຮັກສິ່ງແວດລ້ອມເກົາຫຼີ ນຳມາມອບໃຫ້ນະຄອນຫຼວງວຽງຈັນໃນຄັ້ງນີ້ ປະກອບມີ: ລົດຖີບ LA ຈຳນວນ 200 ຄັນ ເຄື່ອງນຸ່ງຫົ່ມຈຳນວນ 700 ຜືນ ແລະ ອຸປະກອນແຕ້ມຮູບຈຳນວນ 200 ຊຸດ ຊຶ່ງເຄື່ອງຊ່ວຍເຫຼືອຈຳນວນດັ່ງກ່າວນີ້ ແມ່ນຈະໄດ້ແຈກຢາຍໃຫ້ນັກຮຽນຜູ້ທີ່ຂາດພາຫະນະທຽວໂຮງຮຽນ ຈຳນວນ 10 ໂຮງຮຽນຄື: ໂຮງຮຽນປະຖົມດົງສະຫວາດ ດອນກອຍ ດອນນົກຂຸ້ມ ຈອມເພັດ ນາໄຫ ໂຮງຮຽນມັດທະຍົມສີນາກນ້ອຍ ສາລະຄຳ ພັນໝັ້ນ ນາຂ່າ ແລະ ໂຮງຮຽນໂນນສະອາດ ແລະ ຈຸດປະສົງຂອງການຊ່ວຍເຫຼືອຂອງ ອົງການຮ່ວມມືອະນຸຮັກສິ່ງແວດລ້ອມເກົາຫຼີຄັ້ງນີ້ ກໍເພື່ອຊ່ວຍເຮັດໃຫ້ການອະນຸຮັກສິ່ງແວດລ້ອມ ແລະ ການສ້າງສາຍສຳພັນທີ່ດີກັບ ສປປ ລາວ ເຮົາ.