ມີການຄົ້ນພົບເມື່ອໄວໆນີ້ ວ່າຈະມີຂີ້ເຫຍື້ອຈາກອາວະກາດຕົກລົງມາພື້ນໂລກ ຫ່າງຈາກຕອນໃຕ້ຂອງຊາຍຝັ່ງສີລັງກາໄປປະມານ 100 ກິໂລແມັດ ໃນມື້ວັນອາທິດທີ່ 13 ເດືອນພະຈິກນີ້ ເວລາ 12 : 00 ນ. ຕາມເວລາທ້ອງຖິ່ນ ເຖິງຢ່າງໃດກໍຍັງບໍ່ອາດຢືນຢັນໄດ້ຊັດເຈນກ່ຽວກັບວິຖີໂຄຈອນທີ່ແນ່ນອນແລະຜົນກະທົບ ທີ່ຈະຕາມມາໄດ້
ເລື່ອງນີ້ຖືກສັງເກດເທື່ອທຳອິດໃນເດືອນກຸມພາ ປີ 2013 ໂດຍໂປຣແກຣມ “Catalina Sky Survey” ທີ່ຖືກຄິດຄົ້ນຂຶ້ນມາເພື່ອສຳຫລວດວັດຖຸອາວະກາດທີ່ຢູ່ໃກ້ໂລກ ເຊັ່ນດາວເຄາະນ້ອຍຫລືດາວຫາງ ໂດຍວັດຖຸດັ່ງກ່າວຖືກຕັ້ງຊື່ວ່າ “WT1190F” ເສັ້ນຜ່ານສູນກາງຂະໜາດບໍ່ຈັກແມັດ ມີມວນໜ້ອຍກວ່ານ້ຳປະມານສິບເທົ່າ ສັນນິດຖານວ່າບໍ່ແມ່ນວັດຖຸທີ່ເກີດຂື້ນໃນທຳມະຊາດ ແຕ່ອາດເປັນຖັງນ້ຳມັນຂອງຈະຫລວດ
ການໂຄຈອນໃນອາວະກາດຂອງມັນໄດ້ຮັບອິດທິພົນ ຈາກລັງສີຂອງດວງອາທິດ ເຊັ່ນດຽວກັບເຮືອໃບໄດ້ຮັບອິດທິພົນຈາກລົມ ຄວາມຫ່າງຂອງມັນກັບໂລກໃນຕອນນີ້ຢູ່ທີ່ປະມານ 36,000 – 600,000 ກິໂລແມັດ ຢ່າງໃດກໍຕາມ ມັນບໍ່ໄດ້ມີຂະໜາດທີ່ໃຫຍ່ເທົ່າໃດ ນັກວິທະຍາສາດຈຶ່ງຄາດຄະເນວ່າມັນອາດຈະຖືກເຜົາໄໝ້ຈາກຊັ້ນບັນຍາກາດຂອງໂລກຈົນໝົດ ກ່ອນຈະຕົກລົງມາຍັງພື້ນດິນກໍໄດ້ ແລະນັ້ນອາດຈະເຮັດໃຫ້ເກີດປະກາຍແສງສະຫວ່າງໃນເວລາຕອນສວຍ
ນັກວິທະຍາສາດຈາກສູນປະສານງານວັດຖຸອາວະກາດທີ່ຢູ່ໃກ້ ໂລກ (NEOCC) ເຊື່ອວ່າເຫດການນີ້ເປັນການພິສູດທີ່ດີຂອງການປະສານງານລະຫວ່າງນັກວິທະຍາສາດ ແລະເປັນການທົດສອບຄວາມພ້ອມກັບສຳລັບເຫດການຕ່າງໆ ທີ່ອາດເປັນໄປໄດ້ກ່ຽວກັບການໂຄຈອນຂອງດາວທຽມທີ່ໝົດອາຍຸການໃຊ້ງານ ຫລືວັດຖຸທີ່ຈະເຂົ້າມາຕຳກັບຊັ້ນບັນຍາກາດໃນອະນາຄົດ