ກອງທຶນເພື່ອການຮ່ວມມື ແລະ ພັດທະນາເສດຖະກິດ ສ ເກົາຫຼີ (EDCF) ໄດ້ອະນຸມັດເງິນກູ້ຢືມ 80,8 ລ້ານໂດລາສະຫະລັດ ຫຼື ປະມານ 646,4 ຕື້ກີບ ໃຫ້ແກ່ລັດຖະບານ ສປປ ລາວ ເພື່ອນຳໃຊ້ໃນການພັດທະນາ ໂຄງການເຂື່ອນໄຟຟ້າເຊປຽນ-ເຊນ້ຳນ້ອຍ ໂດຍພິທີລົງນາມກູ້ຢືມດັ່ງກ່າວ ໄດ້ຈັດຂຶ້ນວັນທີ 27 ຕຸລາ 2015 ຢູ່ກະຊວງການເງິນ ລະຫວ່າງທ່ານ ດຣ. ລຽນ ທິແກ້ວ ລັດຖະມົນຕີວ່າການ ກະຊວງການເງິນ ແລະ ທ່ານ ຊ໋ອງ ເຮ ຢິມ ຮອງປະທານ EDCF ໂດຍຊ້ອງໜ້າທ່ານ ດຣ. ສີນາວາ ສຸພານຸວົງ ລັດຖະມົນຕີຊ່ວຍວ່າການກະຊວງພະລັງງານ ແລະ ບໍ່ແຮ່ ທ່ານ ກິມ ຊູ ວອນ ເອກອັກຄະລັດຖະທູດ ສ ເກົາຫຼີ ປະຈຳ ສປປ ລາວ ແລະ ພາກສ່ວນກ່ຽວຂ້ອງ.
ທ່ານ ດຣ. ລຽນ ທິແກ້ວ ໄດ້ກ່າວວ່າ: ໂຄງການເຂື່ອນໄຟຟ້າ ເຊປຽນ-ເຊນ້ຳນ້ອຍ ຕັ້ງຢູ່ແຂວງຈຳປາສັກ ມີກຳລັງຕິດຕັ້ງ 410 ເມກາວັດ ເຊິ່ງຈະຂາຍໄຟຟ້າໃຫ້ຣາຊະອານາຈັກໄທ 90% ແລະ ຂາຍໃຫ້ລັດວິສາຫະກິດໄຟຟ້າລາວ 10% ເຊິ່ງໂຄງການນີ້ ໄດ້ເລີ່ມກະກຽມມາແຕ່ປີ 2008 ແລະ ໄດ້ສຳເລັດການລົງນາມສັນຍາພັດທະນາໂຄງການໃນປີດຽວກັນ ລະຫວ່າງລັດຖະບານລາວ ແລະ ຜູ້ພັດທະນາໂຄງການ ໃນຮູບແບບກໍ່ສ້າງດຳເນີນງານ ແລະ ມອບໂອນ ມີມູນຄ່າ 1.020 ລ້ານໂດລາສະຫະລັດ ຫຼື ປະມານ 8.160 ຕື້ກີບ ແລະ ສຳເລັດການລົງນາມສັນຍາຊື້-ຂາຍໄຟຟ້າ ກັບການໄຟຟ້າຝ່າຍຜະລິດແຫ່ງປະເທດໄທ ໃນເດືອນກຸມພາ 2013 ເຊິ່ງລັດວິສາຫະກິດຖືຮຸ້ນລາວ ເປັນຜູ້ຕາງໜ້າໃຫ້ລັດຖະບານຖືຮຸ້ນໃນໂຄງການ 24% ຂອງບ້ວງການປະກອບຮຸ້ນໃນໂຄງການ ແລະ ມີຜູ້ພັດທະນາຈາກ ສ ເກົາຫຼີ ເຂົ້າຮ່ວມລົງທຶນນຳ.
ໂຄງການເຂື່ອນໄຟຟ້າເຊປຽນ-ເຊນ້ຳນ້ອຍ ເປັນໂຄງການທີ່ສຳຄັນຂອງລັດຖະບານລາວ ໃນການພັດທະນາຂະແໜງພະລັງງານ ເຊິ່ງຈະປະກອບສ່ວນໃຫ້ການພັດທະນາເສດຖະກິດ-ສັງຄົມຂອງລາວ ຂະຫຍາຍຕົວຢ່າງຕໍ່ເນື່ອງ ແລະ ຈະເປັນຖານລາຍຮັບທີ່ໜັກແໜ້ນ ທັງເປັນປັດໄຈໃຫ້ ສປປ ລາວ ຫຼຸດພົ້ນອອກຈາກສະຖານະພາບປະເທດດ້ອຍພັດທະນາອີກດ້ວຍ.
ແຫລ່ງຂ່າວ:
