ນ້ຳເກືອບຈະໝົດແລ້ວຫລືຍັງມີນ້ຳຢູ່ເກືອບເຕັມແກ້ວ? ສິ່ງທີ່ເຈົ້າເຫັນອາດຈະໄດ້ຮັບອິດທິພົນມາຈາກສະໝອງສ່ວນ orbitofrontal cortex ຄົົນທີ່ເບີ່ງໂລກໃນແງ່ດີມີແນວໂນ້ມທີ່ຈະມີຄວາມກັງວົນໜ້ອຍກວ່າ
ການ ສຶກສາເມື່ອໄວໆນີ້ໄດ້ເຊື່ອມໂຍງຄວາມກັງວົນ ສະໝອງສ່ວນ Orbitofrontal Cortex (OFC) ແລະການເບີ່ງໂລກໃນແງ່ດີເຂົ້ານຳກັນ (OFC ເປັນສ່ວນຫນຶ່ງຂອງສະໝອງສ່ວນໜ້າ (Prefrontal cortex)) ໂດຍມີການຄົ້ນພົບວ່າຜູ້ໃຫຍ່ທີ່ມີສຸກຂະພາບດີ ມັກຈະມີສ່ວນຂອງ OFC ທີ່ໃຫຍ່ກວ່າ ຊຶ່ງມີແນວໂນ້ມທີ່ຈະເບີ່ງໂລກໃນແງ່ດີຫລາຍກວ່າແລະມີຄວາມກັງວົນໜ້ອຍກວ່າ
ການ ວິເຄາະຫລ້າສຸດໄດ້ຖືກລາຍງານໄວ້ໃນວາລະສານ Social, Cognitive and Affective Neuroscience ໄດ້ນຳສະເໜີຫລັກຖານຊິ້ນທຳອິດທີ່ວ່າ ການເບີ່ງໂລກໃນແງ່ດີນັ້ນມີບົດບາດປານກາງໃນຄວາມສຳພັນລະຫວ່າງຂະໜາດຂອງ OFC ແລະຄວາມກັງວົນ
ນັກວິທະຍາສາດໄດ້ລາຍງານວ່າ “ປະຊາກອນ 44 ລ້ານຄົນໃນສະຫະລັດອາເມຣິກາຕ້ອງທົນທຸກທໍລະມານກັບພະຍາດວິຕົກກັງວົນ ຊຶ່ງພະຍາດນີ້ໄດ້ລົບກວນການດຳເນີນຊີວິດແລະໄດ້ສ້າງພາລະ ຄິດເປັນຄ່າໃຊ້ຈ່າຍປະມານ 42-47 ພັນລ້ານຫລຽນສະຫະລັດຕໍ່ປີ”
OFC ນີ້ຄືສ່ວນຂອງສະໝອງທີ່ຢູ່ຕິດຢູ່ດ້ານຫລັງດວງຕາທັງສອງ ເປັນທີ່ຮູ້ກັນດີວ່າມັນມີບົດບາດຕໍ່ຄວາມຮູ້ສຶກວິຕົກກັງວົນ OFC ຖືໄດ້ວ່າເປັນສູນລວມຂໍ້ມູນທັງໃນດ້ານສະຕິປັນຍາແລະທາງອາລົມ ແລະມີສ່ວນສຳຄັນໃນການຄວບຄຸມພຶດຕິກຳການສະແດງອອກ ການສຶກສາໃນອະດີດໄດ້ຄົ້ນພົບເຖິງຄວາມເຊື່ອມໂຍງລະຫວ່າງຂະໜາດຂອງ OFC ຂອງແຕ່ລະຄົນແລະຄວາມໄວຕໍ່ການຮັບຮູ້ຄວາມຮູ້ສຶກວິຕົກກັງວົນ ຍົກຕົວຢ່າງເຊັ່ນ ໃນງານວິໄຈທີ່ເປັນທີ່ຮູ້ຈັກກັນດີ ທີ່ເຮັດການສຶກສາພາບສະແກນຂອງສະໝອງຂອງຜູ້ໃຫຍ່ໃນໄລຍະໜຸ່ມສາວ ໃນໄລຍະກ່ອນແລະຫລັງແຜ່ນດິນໄຫວເທື່ອໃຫຍ່ໃນປີ 2011 ແລະສຶນາມິໃນປະເທດຍີ່ປຸ່ນ ຄະນະວິໄຈຄົ້ນພົບວ່າໃນບາງກໍລະນີສຶກສາ OFC ເກີດການຫົດຕົວຢ່າງເຫັນໄດ້ແຈ້ງພາຍໃນໄລຍະເວລາ 4 ເດືອນຫລັງຈາກເຫດການທີ່ຜ່ານມາ ແລະ ຍິ່ງເກີດການຫົດຕົວຂອງ OFC ຫລາຍຂຶ້ນ ກໍເບິ່ງຄືວ່າຈະຍິ່ງກວດພົບຄວາມຜິດປົກກະຕິທີ່ເກີດຫລັງຄວາມຄຽດທີ່ສະເທືອນໃຈຫລາຍ ຂຶ້ນຕາມໄປດ້ວຍ ຫລື post-traumatic stress disorder
ນອກຈາກນີ້ຜົນການວິໄຈອື່ນຍັງໄດ້ຢືນຢັນອີກວ່າ ຄົົນທີ່ເບີ່ງໂລກໃນແງ່ດີມີແນວໂນ້ມທີ່ຈະຮູ້ສຶກວິຕົກກັງວົນໜ້ອຍກວ່າແລະຄວາມຄິດເຊີງບວກ ຍັງຊ່ວຍເພີ່ມການເຮັດວຽກງານຂອງ OFC ໄດ້ອີກດ້ວຍ
ຄະນະວິໄຈຈາກໂຄງການວິໄຈ ຫລ້າສຸດໄດ້ຕັ້ງສະມຸດຕິຖານວ່າ “OFC ທີ່ໃຫຍ່ກວ່າອາດຈະເຮັດຫນ້າທີ່ຄືກັບຕົວຮັບແຮງກະທົບຈາກຄວາມວິຕົກກັງວົນໃນບາງສ່ວນ ໂດຍການຊຸກຍູ້ໃຫ້ຄິດໃນແງ່ດີຫລາຍຂຶ້ນ”
ນັກວິໄຈ Sanda Dolcos ຈາກມະຫາວິທະຍາໄລ Illinois ຊຶ່ງເປັນຫົວໜ້າໂຄງການວິໄຈນີ້ທີ່ເຮັດວຽກຮ່ວມກັບນັກສຶກສາ Yifan Hu ແລະ ສາດສະດາຈານ Florin Dolcos ຜູ້ຊ່ຽວຊານທາງຈິດວິທະຍາ ໄດ້ກ່າວວ່າ “ການສຶກສາກ່ຽວກັບຄວາມວິຕົກກັງວົນໂດຍສ່ວນໃຫຍ່ຈະເນັ້ນຄວາມສົນໃຈໄປທີ່ຜູ້ຄົົນທີ່ຖືກ ພິຈາລະນາວ່າເຂົ້າຂ່າຍເປັນພະຍາດຄວາມວິຕົກກັງວົນ ແຕ່ພວກເຮົາຕ້ອງການສຶກສາໃນທິດທາງກົງກັນຂ້າມ ກ່າວຄື ຖ້າມີການຫົດຕົວຂອງ OFC ເກີດຂຶ້ນ ແລະການຫົດຕົວນີ້ມີຜົນຕໍ່ຄວາມຜິດປົກກະຕິຕໍ່ຄວາມວິຕົກກັງວົນ ມັນຈະສື່ເຖິງຫຍັງໃນປະຊາກອນທີ່ມີ OFC ທີ່ໃຫຍ່ກວ່າ ແລະມັນສາມາດມີບົດບາດໃນການປ້ອງກັນໄດ້ຫລືບໍ່”
ອີກທັງນັກວິໄຈຕ້ອງ ການຈະຮູ້ອີກວ່າ ການເບີ່ງໂລກໃນແງ່ດີຈະເປັນສ່ວນຫນຶ່ງຂອງກົນໄກທີ່ເຊື່ອມໂຍງເຂົ້າກັບບໍລິມາດຂອງ OFC ທີ່ໃຫຍ່ແລະການຫລຸດລົງຂອງຄວາມວິຕົກກັງວົນຫລືບໍ່
ຄະນະວິໄຈໄດ້ລວບລວມຜົນ ສະແກນສະໝອງຂອງຜູ້ໃຫຍ່ໄວໜຸ່ມສາວທັງໝົດ 61 ລາຍແລະທຳການວິເຄາະໂຄງສ້າງພາຍໃນສະໝອງຫລາຍບໍລິເວນລວມໄປເຖິງສ່ວນຂອງ OFC ດ້ວຍ ນັກວິໄຈໄດ້ຄິດໄລ່ສ່ວນບໍລິມາດຂອງສະໝອງສ່ວນສີເທົາໃນແຕ່ລະບໍລິເວນ ທຽບກັບບໍລິມາດທັງໝົດຂອງສະໝອງ ຜົນການທົດສອບໃນການສຶກສາເທື່ອນີ້ຍັງໄດ້ຄວບຄຸມເຖິງການເບີ່ງໂລກໃນແງ່ດີແລະຄວາມວິຕົກກັງວົນ ຄວາມກົດດັນ ແລະຄວາມຄິດເຊີງບວກ (ຄວາມກະຕືລືລົ້ນແລະຄວາມສົນໃຈ) ແລະເຊີງລົບ (ບໍ່ພໍໃຈແລະໂມໂຫ)
ການວິເຄາະເຊີງສະຖິຕິແລະການສຶກສາ ຕົ້ນແບບເຮັດໃຫ້ໄດ້ຂໍ້ສະຫລຸບທີ່ວ່າສ່ວນຂອງ OFC ໃນສະໝອງຊີກຊ້າຍທີ່ໜາກວ່າຈະຕອບສະໜອງຕໍ່ການເບີ່ງໂລກໃນແງ່ດີຫລາຍຂຶ້ນແລະມີຄວາມວິຕົກກັງວົນຫລຸດລົງ ໂຄງສ້າງຕົ້ນແບບຍັງໄດ້ບອກເຖິງການເບີ່ງໂລກໃນແງ່ດີມີບົດບາດປານກາງໃນການຫລຸດຄວາມ ກັງວົນໃນໝູ່ຄົົນທີ່ມີສ່ວນຂອງ OFC ທີ່ໃຫຍ່ກວ່າ ນອກເໜືອຈາກນີ້ ການວິເຄາະທີ່ຖືກຂະຫຍາຍອອກໄປໄດ້ສະແດງໃຫ້ເຫັນເຖິງຄວາມເປັນໄປບໍ່ໄດ້ຂອງລັກສະນະ ເຊີງບວກອື່ນໆໃນການຫລຸດຄວາມກັງວົນລົງ ແລະບໍ່ມີສ່ວນອື່ນໃດໃນສະໝອງທີ່ປາກົດໃຫ້ເຫັນວ່າມັນມີສ່ວນກ່ຽວພັນກັນໃນການຫລຸດ ຄວາມວິຕົກກັງວົນດ້ວຍການກະຕຸ້ນແລະຊຸກຍູ້ການເບີ່ງໂລກໃນແງ່ດີໄດ້
Sanda Dolcos ໄດ້ກ່າວວ່າ “ເຈົ້າສາມາດຍອມຮັບກັນໄດ້ວ່າ ມັນມີຄວາມສຳພັນກັນລະຫວ່າງ OFC ແລະຄວາມວິຕົກກັງວົນ ແລ້ວສິ່ງທີ່ເຮັດໃຫ້ຄວາມກັງວົນຫລຸດລົງມັນຄືຫຍັງ ຕົ້ນແບບຂອງພວກເຮົາກຳລັງບອກວ່າສິ່ງທີ່ເຮົາກຳລັງສຶກສາຢູ່ໃນຂະນະນີ້ເປັນພຽງແຕ່ ບາງສ່ວນຂອງການເບີ່ງໂລກໃນແງ່ດີ ດັ່ງນັ້ນການເບີ່ງໂລກໃນແງ່ດີກໍເປັນໜຶ່ງໃນປັດໄຈທີ່ສາມາດຖືກໃຊ້ເປັນເປົ້າໝາຍ ໄດ້”
Hu ໄດ້ກ່າວວ່າ “ການເບີ່ງໂລກໃນແງ່ດີໄດ້ຖືກສຶກສາມາແລ້ວຢ່າງຍາວນານໃນດ້ານຂອງຈິດວິທະຍາ ແຕ່ສິ່ງທີ່ພວກເຮົາໄດ້ເລີ່ມສຶກສາກັນນີ້ໄດ້ໃຫ້ຄວາມສຳຄັນກັບຫນ້າທີ່ແລະໂຄງສ້າງ ພາຍໃນສະໝອງທີ່ມີຜົນຕໍ່ການເບີ່ງໂລກໃນແງ່ດີ ພວກເຮົາຢາກຈະຮູ້ວ່າຖ້າພວກເຮົາໄດ້ໃຊ້ຊີວິດຕາມການເບີ່ງໂລກໃນແງ່ບວກຢ່າງຈິງຈັງ ຕະຫລອດເວລາແລ້ວ ມັນຈະຖິ້ມຮ່ອງຮອຍທີ່ມີລັກສະນະຈຳເພາະຂຶ້ນໃນສະໝອງຫລືບໍ່”
Florin Dolcos ໄດ້ກ່າວເຖິງການທົດສອບໃນອະນາຄົດວ່າ “ພວກເຮົາຄວນທີ່ຈະສຶກສາວ່າການສົ່ງເສີມການເບີ່ງໂລກໃນແງ່ດີແລະການຫລຸດຄວາມວິຕົກກັງວົນ ໂດຍການຝຶກຝົນຜູ້ຄົນດ້ວຍບົດທົດສອບທີ່ເຊື່ອມກັບ OFC ໂດຍກົງຫລືການຫາຫົນທາງທີ່ຈະຊຸກຍູ້ຄວາມຄິດເຊີງບວກໂດຍກົງນັ້ນສາມາດເຮັດໄດ້ຫລື ບໍ່ ຖ້າຫາກເຈົ້າສາມາດຝຶກຝົນການຕອບສະໜອງຂອງຜູ້ຄົນໄດ້ ທິດສະດີທີ່ມີມາຢ່າງຍາວນານ ຄວາມສາມາດຂອງຜູ້ຄົົນທີ່ຈະຄວບຄຸມການຕອບສະໜອງຂອງພວກເຂົາໃນແຕ່ລະເຫດການຕໍ່ ເຫດການຈະຖືກຝັງລົງໃນໂຄງສ້າງຂອງສະໝອງຂອງພວກເຂົາໄດ້ໃນທີ່ສຸດ”