ການປະຄົບຮ້ອນຫລືເຢັນເປັນວິທີໜຶ່ງໃນການປະຖົມພະຍາບານ ເພື່ອບັນເທົາອາການແຕ່ອາການແບບໃດທີ່ເຮົາຄວນຈະເລືອກປິ່ນປົວແບບຮ້ອນຫລືເຢັນການເລືອກໃຊ້ຄວາມຮ້ອນຫລືຄວາມເຢັນ

1 ປະຄົບເຢັນ
ເໝາະກັບອາການບາດເຈັບຮຸນແຮງຮ່ວມກັບອາການບວມ ຄວາມເຢັນຈະເຮັດໃຫ້ເສັ້ນເລືອດຫົດຕົວ ຊ່ວຍຫລຸດອາການບວມໄດ້ ຄວນປະຄົບດ້ວຍນ້ຳກ້ອນຫລືນ້ຳເຢັນທັນທີ (ພາຍໃນ 24-48 ຊົ່ວໂມງ) ປະຄົບດົນ 20-30 ນາທີ ມື້ລະ 2-3 ເທື່ອ
ອາການທີ່ຄວນປະຄົບເຢັນ ເຊັ່ນ ປວດຫົວ ມີໄຂ້ສູງ ປວດແຂ້ວ ປວດບວມຂໍ້ຕີນ ຂໍ້ຕີນພິກ ຂໍ້ເຄັດ ຫລື ປວດບວມບໍລິເວນອື່ນ ໆ ທີ່ເກີດຈາກການໄດ້ຮັບບາດເຈັບຫລືຫາກໍ່ມີອາການໃໝ່ ໆ

2 ປະຄົບຮ້ອນ

ການປະຄົບຮ້ອນຈະເລີ່ມໃຊ້ຫລັງຈາກມີອາການຜ່ານໄປແລ້ວ 48 ຊົ່ວໂມງ ໃຫ້ປະຄົບເທື່ອລະ 15-20 ນາທີ ມື້ລະ 2-3 ເທື່ອ ຄວາມຮ້ອນຈະເຮັດໃຫ້ຫລອດເລືອດຂະຫຍາຍຕົວ ການໄຫລວຽນເລືອດດີຂຶ້ນ ເພື່ອຫຼຸດອາການປວດແລະຜ່ອນຄາຍກ້າມເນື້ອ

ອາການທີ່ຄວນປະຄົບຮ້ອນ ເຊັ່ນ ປວດກ້າມເນື້ອບໍລິເວນຄໍ ບ່າ ຫລັງ ສົ້ນນ່ອງ ພາຍຫລັງຈາກການເຮັດວຽກງານ ຫລືພາຍຫລັງຈາກການຫລິ້ນກິລາ, ປວດປະຈຳເດືອນ

ອຸນຫະພູມທີ່ເໝາະສົມບໍ່ຄວນເກີນ 45 ອົງສາເຊນຊຽດ ສິ່ງສຳຄັນທີ່ຕ້ອງຄຳນຶງເຖິງ ຄື ບໍ່ຄວນປະຄົບດ້ວຍຄວາມຮ້ອນທີ່ຫລາຍເກີນໄປ ເພາະຈະເຮັດໃຫ້ຮູ້ສຶກແສບຮ້ອນບໍລິເວນທີ່ປະຄົບ ບໍ່ຄວນປະຄົບດົນຫລືຖີ່ເກີນໄປ ແລະຕ້ອງບໍ່ປະຄົບຮ້ອນໃນບໍລິເວນທີ່ມີບາດແຜເປີດຫລືມີເລືອດອອກ ເພາະຈະຍິ່ງເຮັດໃຫ້ມີການອັກເສບເພີ່ມຫລາຍຂຶ້ນ

ຂໍ້ຄວນລະວັງ

1. ໂລກຄວາມດັນເລືອດສູງ ຄວນໃຊ້ຄວາມເຢັນດ້ວຍຄວາມລະມັດລະວັງ ເພາະຄວາມເຢັນມີຜົນຕໍ່ການຫົດຕົວຂອງຫລອດເລືອດສ່ວນປາຍ ເຮັດໃຫ້ຫົວໃຈເຮັດວຽກໜັກຂຶ້ນໄດ້

2. ໂລກມະເຮັງທີ່ຍັງມີການດຳເນີນຂອງພະຍາດຢູ່ ເພື່ອຄວາມປອດໄພຄວນງົດໃຊ້ຄວາມຮ້ອນ

3. ໃນບາງຄົນອາດເປັນໂລກແພ້ຄວາມເຢັນ ຈະເກີດຜື່ນແດງຢ່າງຮຸນແຮງພາຍຫລັງສຳຜັດຄວາມເຢັນ