ບຸນອອກພັນສາປະວໍລະນາ ແລະ ບຸນຊ່ວງເຮືອປະເພນີ ປະຈຳປີ 2015 ທີ່ນ້ຳຂອງ ເມືອງຈັນທະບູລີ ສະເພາະປີນີ້ ນະຄອນຫຼວງວຽງຈັນ ໄດ້ຈັດໃຫ້ມີຫຼາຍກິດຈະກຳ ເພື່ອສ້າງບັນຍາກາດ ເຮັດໃຫ້ພາຍໃນງານມີຄວາມເບີກບານມ່ວນຊື່ນ ຮັກສາໄດ້ວັດທະນະທຳ ຮີດຄອງປະເພນີອັນດີງາມຂອງຊາດ ທັງເປັນການໂຄສະນາສົ່ງເສີມການທ່ອງທ່ຽວ ທາງດ້ານວັດທະນະທຳ ແລະ ວິຖີການດຳລົງຊີວິດຂອງປະຊາຊົນລາວບັນດາເຜົ່າຕໍ່ຊາວຕ່າງປະເທດ ເພື່ອເປັນການດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມນະຄອນຫຼວງວຽງຈັນ ໃຫ້ນັບມື້ຫຼາຍຂຶ້ນເລື້ອຍໆ.
ບຸນອອກພັນສາປະວໍລະນາ ແລະ ບຸນຊ່ວງເຮືອປະເພນີ ປະຈຳປີ 2015 ໄດ້ເລີ່ມຈັດຕັ້ງລະຫວ່າງວັນທີ 22-28 ຕຸລາ 2015 ຕາມແຄມຂອງເຂດທ່າວັດຈັນ ເຊິ່ງການຈັດຕັ້ງ ກໍ່ຄືຄະນະກຳມະການຈັດງານບຸນດັ່ງກ່າວ ໄດ້ກຳນົດເອົາເປັນບ່ອນຂາຍສິນຄ້າທັງພາຍໃນ ແລະ ຕ່າງປະເທດ ສຳລັບວັນທີ 27 ຕຸລາ ທີ່ເປັນມື້ບຸນອອກພັນສາຕອນເຊົ້າ ການນຳພັກ-ລັດໄດ້ຮ່ວມກັນໃສ່ບາດຖວາຍສັງຄະທານທີ່ວັດອົງຕື້ ແລະ ປະມານ 8-9 ໂມງ ມີກິດຈະກຳຊ່ວງເຮືອປະເພນີຍິງທີ່ນ້ຳຂອງເຂດບ້ານສີຖານເໜືອ ເມືອງສີໂຄດຕະບອງ ເຊິ່ງເປັນຜາມໄຊໃໝ່ ຢູ່ໃກ້ກັບຮ້ານອາຫານວຽງຂອງ (ໃກ້ຈະຮອດຮ້ານອາຫານຂອງວີວ ປະມານ 500 ແມັດ) ເນື່ອງຈາກຈຸດຜາມໄຊເກົ່າທີ່ທ່າວັດຈັນນັ້ນ ປີນີ້ສະພາບນ້ຳຂອງແຫ້ງ ບໍ່ອາດສາມາດຈະເປັນສະຖານທີ່ແຂ່ງຂັນຊ່ວງເຮືອໄດ້ ດັ່ງນັ້ນ ຄະນະກຳມະການຈັດງານບຸນ ຈຶ່ງໄດ້ຍ້າຍໄປແຂ່ງຂັນບ່ອນໃໝ່ທີ່ມີຄວາມຮັບປະກັນ ຈຶ່ງແຈ້ງມາຍັງສັງຄົມ ກໍ່ຄືຜູ້ມັກຊົມມັກເຊຍກີລາປະເພນີເຮືອຊ່ວງ ທີ່ຈະໄປເຂົ້າຮ່ວມຊົມການແຂ່ງຂັນຊ່ວງເຮືອທັງສອງມື້ຄື: ວັນທີ 27-28 ຕຸລາ 2015 ໃຫ້ໄປຈຸດຜາມໄຊໃໝ່.
ສ່ວນຕອນຄ່ຳປະມານ 7-9 ໂມງຂອງວັນທີ 27 ຕຸລາ ກໍ່ຄືຕອນຄ່ຳຂອງມື້ບຸນອອກພັນສາຢູ່ຈຸດຜາມໄຊເກົ່າ (ເຂດທ່າວັດຈັນ) ຈະມີສອງກິດຈະກຳຄື: ຈູດບັ້ງໄຟດອກ ແລະ ແຂ່ງຂັນຕີມວຍລາຍລາວ ເພື່ອສ້າງບັນຍາກາດໃຫ້ຜູ້ທີ່ເຂົ້າທ່ຽວຊົມງານບຸນໄດ້ຊົມໄດ້ເບິ່ງ ກິດຈະກຳດີໆ ທັງນີ້ກໍ່ເພື່ອສ້າງບັນຍາກາດເຮັດໃຫ້ງານບຸນມີຄວາມເບີກບານມ່ວນຊື່ນ ແລະ ສ້າງຄວາມປະທັບໃຈໃຫ້ແກ່ຜູ້ທີ່ເຂົ້າທ່ຽວຊົມ.
ແຫລ່ງຂ່າວ:
