ສຳນັກຂ່າວຕ່າງປະເທດ ເຜີຍແຜ່ພາບການຊ້ອມຮົບສະແດງແສນຍານຸພາບຂອງ ອົງການສົນທິສັນຍາປ້ອງກັນແອັດແລນຕິກເໜືອ ຫລື ນາໂຕ້ ຄັ້ງໃຫຍ່ທີ່ສຸດ ໃນຮອບ 10 ປີ ດ້ວຍການລະດົມກຳລັງທະຫານເຂົ້າຮ່ວມ 36,000 ຄົນ ຈາກບັນດາປະເທດສະມາຊິກ ແລະ ພັນທະມິດ ພາຍໃຕ້ຊື່ປະຕິບັດການ Trident Juncter ພາຍໃນບໍລິເວນເຂດຕອນກາງຂອງ ທະເລເມດິແຕຣານຽນ ທີ່ເລີ່ມຕົ້ນມາຕັ້ງແຕ່ວັນຈັນທີ 19 ຕຸລາ ແລະ ຈະດຳເນີນໄປຈົນເຖິງວັນທີ 6 ພະຈິກ ຈຶ່ງຈະສຳເລັດ.
ທັງນີ້ ການຊ້ອມຮົບຄັ້ງມະໂຫລານດັ່ງກ່າວ ເກີດຂຶ້ນເພື່ອຫວັງຂົ່ມຂວັນຣັດເຊຍ ແລະ ສະແດງໃຫ້ເຫັນວ່າ ທະຫານຂອງສະມາຊິກນາໂຕ້ກ່ວາ 30 ປະເທດ ມີຄວາມກຽມພ້ອມ ທີ່ຈະປະເຊີນໜ້າກັບຣັດເຊຍ ທີ່ກຳລັງສົ່ງທະຫານ ແລະ ອາວຸດເຂົ້າໄປຊ່ວຍລັດຖະບານ ທ່ານ ບາຊາ ອັນ-ອັດຊາດ ແຫ່ງ ປະເທດຊີຣີ ໃນການຕໍ່ສູ້ກັບກຸ່ມລັດອິດສະລາມ ຫລື ໄອເອັສ.
ທ່ານ ພົນເອກ ອະເລັກຊານເດີ້ ເວີໂບ ຮອງເລຂາທິການນາໂຕ້ ໄດ້ກ່າວກັບສື່ມວນຊົນວ່າ ນາໂຕ້ມີຄວາມກັງວົນຢ່າງສູງ ຕໍ່ກັບການທີ່ຣັດເຊຍເຂົ້າມາຕັ້ງຖານທັບ ໃນປະເທດຊີຣີ, ຢ່າງໃດກໍຕາມ ຊາດພັນທະມິດນາໂຕ້ ແມ່ນມີຄວາມກຽມພ້ອມ ແລະ ມີປະສິດທິພາບໃນການປົກປ້ອງຊາດພັນທະມິດ ຈາກການຖືກໂຈມຕີ ຂອງຝ່າຍກົງກັນຂ້າມ.
