ສຳນັກຂ່າວຕ່າງປະເທດ ລາຍງານໃນວັນທີ 19 ຕຸລາຜ່ານມານີ້ວ່າ ກຸ່ມສົນທິສັນຍາປ້ອງກັນແອັດແລນຕິກເໜືອ ຫລື ນາໂຕ້ ແລະ ພັນທະມິດ ເປີດການຊ້ອມຮົບທາງທະຫານຄັ້ງໃຫຍ່ທີ່ສຸດໃນຮອບທົດສະວັດ ຢູ່ເຂດຕອນກາງຂອງທະເລເມດິແຕຣານຽນ ໂດຍພິທີເປີດໄດ້ຈັດຂຶ້ນທີ່ຖານທັບອາກາດແຫ່ງໜຶ່ງ ທາງພາກໃຕ້ຂອງປະເທດອີຕາລີ ຊຶ່ງມີທະຫານເຂົ້າຮ່ວມໃນການຊ້ອມຮົບຄັ້ງນີ້ ປະມານ 36,000 ຄົນ ມີເຮືອກຳປັ່ນສູ້ຮົບ ແລະ ເຮືອບິນສູ້ຮົບຕ່າງໆເຂົ້າຮ່ວມ ໂດຍການຊ້ອມຮົບຈະດຳເນີນໄປເປັນເວລາ 5 ອາທິດ ນັບຕັ້ງແຕ່ວັນທີ 19 ຕຸລາ 2015 ເປັນຕົ້ນໄປ.
ທັງນີ້ ການຊ້ອມຮົບຄັ້ງໃຫຍ່ໃນຮອບທົດສະວັດຂອງກຸ່ມນາໂຕ້ ແລະ ພັນທະມິດດັ່ງກ່າວ ໄດ້ມີຂຶ້ນທ່າມກາງການເຂົ້າຮ່ວມໂຈມຕີກຸ່ມໄອເອັສ ຂອງກອງທັບຣັດເຊຍຢູ່ປະເທດຊີຣີ ອັນໄດ້ເຮັດໃຫ້ນາໂຕ້ມີຄວາມກັງວົນ ແລະ ອອກມາຢືນຢັນວ່າ ພວກເຂົາຈະປົກປ້ອງພັນທະມິດ 28 ປະເທດ ຈາກໄພຄຸກຄາມໃດໆກໍຕາມ ເນື່ອງຈາກພວກເຂົາມີກຳລັງພົນລວມກັນ ເໜືອກ່ວາແສນຍານຸພາບທາງການທະຫານຂອງຣັດເຊຍ.
