ຂປລ. ທ່ານນາຍົກລັດຖະມົນຕີ ໄດ້ເນັ້ນໜັກໃນກອງປະຊຸມ ເຜີຍແຜ່ແນະນໍາການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມແຫ່ງລັດ ສົກປີ 2015-2016 ໃນວັນທີ 13 ຕຸລາ 2015 ນີ້ວ່າ: ເພື່ອຮັບປະກັນ ໃຫ້ການຂະຫຍາຍຕົວ ຂອງເສດຖະກິດ ກ່ອນອື່ນໝົດຕ້ອງຮັບປະກັນ ຄວາມຕໍ່ເນື່ອງ, ສົມດຸນ ແລະ ຍືນຍົງ ພື້ນຖານເສດຖະກິດ ຕ້ອງມີຄວາມເຂັ້ມແຂງ ແຕ່ຕ້ອງເຮັດໃຫ້ການຜະລິດພາຍໃນ ມີຄວາມເຂັ້ມແຂງ, ຕ້ອງຫັນການເຕີບໂຕເສດຖະກິດ ໄປສູ່ຄຸນນະພາບທີ່ສູງຂຶ້ນ ແລະ ບັນຫາທີ່ຈະຕ້ອງເອົາໃຈໃສ່ກວ່າໝູ່ ແມ່ນດ້ານລາຍຮັບຕົວຈິງ ຂອງຄອບຄົວໄດ້ເພີ່ມຂຶ້ນ ສົມຄູ່ກັບການເຕີບໂຕ ຂອງ GDP ແລ້ວຫລືບໍ່.
ໃນໂອກາດດັ່ງກ່າວ, ທ່່ານ ທອງສິງ ທໍາມະວົງ ນາຍົກລັດຖະມົນຕີ ຍັງໄດ້ເນັ້ນໃຫ້ທຸກພາກສ່ວນ ເອົາໃຈໃສ່ຄື: ສົກປີ 2015-2016 ນີ້ຕ້ອງຖືເປັນບຸລິມະສິດ ກ່ຽວກັບວຽກງານຕິດຕາມ, ກວດກາ ແລະ ຄຸ້ມຄອງໂຄງການ ການລົງທຶນທີ່ໄດ້ ອະນຸມັດໄປແລ້ວໃຫ້ດີກວ່າເກົ່າ. ຕ້ອງເຮັດໜ້າທີ່ຄຸ້ມຄອງມະຫາພາກ, ສ້າງເງື່ອນໄຂ ອໍານວຍຄວາມສະ ດວກ ແລະ ມອບສິດຢ່າງຈະແຈ້ງໃຫ້ທ້ອງຖິ່ນ, ຕ້ອງມີກົນໄກ ປະສານງານທີ່ຊັດເຈນ, ກ່ຽວກັບການຈັດຕັ້ງປະຕິບັດຄໍາສັ່ງ ຂອງນາຍົກລັດຖະມົນຕີ ສະບັບເລກທີ 13/ນຍ, ລົງວັນທີ 11/06/2012 ເຫັນວ່າມີຄວາມຄືບໜ້າ ແລະ ກໍສາມາດກໍາໄດ້ ຫລາຍບັນຫາທີ່ຫຍໍ້ທໍ້ ຈຶ່່ງສະເໜີໃຫ້ສືບຕໍ່ຈັດຕັ້ງປະຕິບັດ ຄໍາສັ່ງອອກໄປອີກຄື: ຕໍ່ການໂຈະການອະນຸ ມັດ ຂໍສໍາປະທານໃໝ່ ທາງດ້ານບໍ່ແຮ່, ປູກຢາງພາລາ ແລະ ໄມ້ວິກ ຮອດປີ 2020; ການອະນຸມັດການລົງທຶນ ຕ້ອງຮັບປະກັນປະສິດທິພາບ ແລະ ຄຸນນະພາບຂອງການລົງທຶນ, ຕ້ອງຄັດເລືອກເອົາຜູ້ລົງທຶນ ທີ່ມີປະສົບການ, ມີຄວາມສາມາດ, ມີທຶນຮອນແທ້ ແລະ ເປັນທີ່ຍອມຮັບຂອງສາກົນ ບໍ່ອະນຸມັດຊະຊາຍຈົນຄຸ້ມຄອງບໍ່ໄດ້ ເພື່ອຮັບປະກັນຜົນປະໂຫຍດ ຂອງປະເທດຊາດ ໃນໄລຍະຍາວ, ຫລີກລ້ຽງບັນຫາຜູ້ລົງທຶນ ມາຈັບຈອງໂຄງການເພື່ອຂາຍຕໍ່ ຫລື ແກ່ຍາວເວລາ; ພ້ອມນັ້ນ ກໍຕ້ອງເຮັດໜ້າທີ່ດຶງດູດ ການລົງທຶນ ແລະ ນໍາຜົນປະໂຫຍດ ມາສູ່ປະຊາຊົນຢ່າງແທ້ຈິງ, ສ້າງເງື່ອນໄຂທີ່ສະດວກກວ່າ, ໄວກວ່າ ແລະ ໂປ່ງໄສກວ່າ ທັງຈະແຈ້ງຊັດເຈນ ບົນພື້ນຖານລະບຽບກົດໝາຍ ໂດຍອີງໃສ່ສະພາບການໃນໄລຍະໃໝ່ ທີ່ມີການເຊື່ອມໂຍງ ກໍຄື ການແຂ່ງຂັນໃນອານຸພາກພື້ນ ລວມທັງການເຂົ້າເປັນ ປະຊາຄົມເສດຖະກິດອາຊຽນ.
ສໍາລັບ ກົນໄກປະສານງານ ແລະ ການຕິດຕາມການປະຕິບັດ ແຜນພັດທະນາ ເສດຖະກິດ-ສັງຄົມ ເຫັນວ່າມີຄວາມສໍາຄັນ ຫລາຍຍ້ອນການຈັດຕັ້ງປະຕິບັດ ບັນດາທິດທາງໜ້າທີ່ ແລະ ຄາດໝາຍສູ້ຊົນ ຕ້ອງສອດຄ່ອງກົມກຽວ, ສ້າງໃຫ້ໄດ້ກໍາລັງແຮງສັງລວມ, ຫລີກລ້ຽງການຖິ້ມ ຄວາມຮັບຜິດຊອບໃຫ້ກັນ ຫລື ການເຮັດຊໍ້າຊ້ອນກັນ; ກ່ຽວກັບການຈັດຕັ້ງປະຕິບັດ ວຽກງານ 3 ສ້າງ ເຊິ່ງເປັນບັນຫາສໍາຄັນ ໂດຍສະເພາະ ການແບ່ງຄວາມຮັບຜິດຊອບ ນັບທັງການປະຕິບັດນິຕິກໍາ, ກົນໄກປະສານງານ ແລະ ອື່ນໆ ຈຶ່ງຮຽກຮ້ອງໃຫ້ພາກສ່ວນທີ່ກ່ຽວຂ້ອງ ຕ້ອງຕີລາຄາ ຢ່າງພາວະວິໄສບົນພື້ນຖານຂໍ້ມູນ ແລະ ສະພາບຄວາມເປັນຈິງ; ພ້ອມນັ້ນ ກໍໃຫ້ເອົາໃຈໃສ່ວຽກຄົ້ນຄວ້າ ວິໄສທັດຮອດປີ 2030, ຍຸດທະສາດການພັດທະນາ ເສດຖະກິດ-ສັງຄົມ ຮອດປີ 2025 ຂອງຂະແໜງການ ແລະ ທ້ອງຖິ່ນ ໂດຍອີງໃສ່ທ່າແຮງບົ່ມຊ້ອນຂອງຕົນ ນັບທັງກາລະໂອກາດຂອງພາກພື້ນ ແລະ ສາກົນ ທີ່ຈະເປັນປະໂຫຍດ ເພື່ອຮັບປະກັນການພັດທະນາໃນໄລຍະຍາວ ເຮັດໃຫ້ເສດຖະກິດມີການເຕີບໂຕ ທີ່ມີຄຸນນະພາບ, ມີສະຖຽນລະພາບ, ມີການກະຈາຍລາຍໄດ້, ຍົກລະດັບຊີວິດການເປັນຢູ່ ຂອງປະຊາຊົນໃຫ້ດີຂຶ້ນ ເທື່ອລະກ້າວ. ໃນນັ້ນກໍໃຫ້ສຸມໃສ່ປັບປຸງ ແລະ ສ້າງຖານຂໍ້ມູນສະຖິຕິແຕ່ຂັ້ນບ້ານ, ຂັ້ນເມືອງ ແລະ ຂັ້ນແຂວງ ໂດຍນໍາໃຊ້ລະບົບຂໍ້ມູນຂ່າວສານ ທີ່ທັນສະໄໝເຂົ້າໃນ ການເຜີຍແຜ່, ຮັບປະກັນການເຂົ້າເຖິງ ໃນຫລາຍຮູບແບບໄດ້ຢ່າງສະດວກ, ວ່ອງໄວ ແລະ ມີຄຸນນະພາບຕິດພັນກັບ ວຽກງານ 3 ສ້າງ.
ແຫລ່ງຂ່າວ:
