ໃນຕອນເຊົ້າຂອງວັນທີ 09 ຕຸລາ 2015 ທີ່ຫ້ອງວ່າການລັດຖະບານ ທ່ານ ທອງສິງ ທໍາມະວົງ, ນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ສຈ. ດຣ. ແຟມມິ້ງ ເບເຊັນບາເຄີ້ຣ ປະທານກຸ່ມບໍລິສັດຄາສເບີກ ພ້ອມດ້ວຍຄະນະ.
ໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍ, ພ້ອມທັງໄດ້ຕີລາຄາສູງ ຕໍ່ທ່ານປະທານກຸ່ມບໍລິສັດຄາສເບີກ ແລະ ຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້. ພ້ອມດຽວກັນນັ້ນ, ທ່ານນາຍົກລັດຖະມົນຕີ ຫວັງວ່າບໍລິສັດຄາສເບີກ ຈະສືບຕໍ່ໃຫ້ການຊ່ວຍເຫຼືອ ເພື່ອພັດທະນາເບຍລາວ ກໍ່ຄື ການປະກອບສ່ວນຊ່ວຍເຫຼືອສັງຄົມລາວຕໍ່ໄປເປັນຕົ້ນ ການສົ່ງເບຍລາວອອກຂາຍຢູ່ຕ່າງປະເທດໃຫ້ຫຼາຍຂຶ້ນ, ສ້າງ ແລະ ພັດທະນາຊັບພະຍາກອນລາວ ໃຫ້ມີຄວາມຊໍານິຊໍານານງານ, ມີນະໂຍບາຍຊື້ ແລະ ນໍາໃຊ້ ເພື່ອສົ່ງເສີມສິນຄ້າພາຍໃນໃຫ້ຫຼາຍຂຶ້ນ, ນອກນັ້ນ ຕ້ອງມີການແລກປ່ຽນ ແລະ ຖອດຖອນບົດຮຽນ ແລະ ວິທີການຕ່າງໆ ເພື່ອເຮັດແນວໃດໃຫ້ຜູ້ບໍລິໂພກເຫຼົ້າ, ເບຍ ມີຄວາມຮັບຜິດຊອບໃນການດື່ມທີ່ເໝາະສົມ ແນໃສ່ເພື່ອຫຼີກລ້ຽງບັນຫາການເກີດອຸບັດຕິເຫດ ແລະ ເປັນໄພຕໍ່ສຸຂະພາບ.
ທ່ານ ສຈ.ດຣ. ແຟມມິ້ງ ເບເຊັນບາເຄີ້ຣ ໄດ້ສະແດງຄວາມຂອບອົກຂອບໃຈຕໍ່ ທ່ານນາຍົກລັດຖະມົນຕີ ທີ່ໄດ້ສະຫຼະເວລາ ໃຫ້ການຕ້ອນຮັບຢ່າງອົບອຸ່ນ, ພ້ອມທັງໄດ້ແຈ້ງຈຸດປະສົງ ຂອງການເດີນທາງມາຢ້ຽມຢາມ ແລະ ເຄື່ອນໄຫວວຽກງານ ໃນຄັ້ງນີ້ ເປັນຕົ້ນ ຜົນການພົບປະກັບຄະນະບໍລິສັດເບຍລາວ, ພ້ອມທັງໃຫ້ຄໍາໝັ້ນສັນຍາວ່າ ຈະສືບຕໍ່ໃຫ້ການສະໜັບສະໜູນຊ່ວຍເຫຼືອ ແລະ ປະກອບສ່ວນໃນດ້ານຕ່າງໆ ເພື່ອພັດທະນາເບຍລາວ ຕໍ່ໄປ.
ແຫລ່ງ: ຫ້ອງວ່າການລັດຖະບານ
ຜູ້ຂຽນ: ຂ່າວ/ພາບ: ອານິຄົມ ວົງເດືອນ, ວັນນະສິນ ຈັນດາວົງ.