ວັນ​ທີ 5 ຕຸລາ 2015 ເມືອງຫາດ​ຊາຍ​ຟອງ ນະຄອນຫຼວງວຽງ​ຈັນ ໄດ້​ຈັດ​ງານ​ວາງສະແດງ ແລະ ຈຳໜ່າຍ​ສິນຄ້າ​ໜຶ່ງ​ບ້ານມີ​ໜຶ່ງ​ຜະລິດ​ຕະ​ພັນ ໜຶ່ງ​ເມືອງບໍ່​ໃຫ້​ຫຼຸດ 5 ຜະລິດ​ຕະ​ພັນ (ໂອດ໋ອບ) ສິນຄ້າ​ຄອບຄົວ​ຕົວ​ແບບ ແລະ ສິນຄ້າ​ທົ່ວ​ໄປ ຄັ້ງ​ທີ 1 ຂຶ້ນ ທີ່​ສວນ​ວັດທະນະທຳ​ບັນດາເຜົ່າ ໃຫ້​ກຽດ​ເຂົ້າ​ຮ່ວມ​ມີ​ທ່ານ ບຸນທາມ ພຸດ​ທະ​ວົງສາ ເຈົ້າເມືອງຫາດ​ຊາຍ​ຟອງ ທ່ານ ແອັດ ພັນນີ​ວົງ ປະທານ​ກຸ່ມ​ບໍລິສັດ ອິນແປງ​ກຣຸບ ຈຳກັດ ບັນດາ​ຫົວໜ້າພະ​ແນກ ຮອງ​ເຈົ້າເມືອງ ການນຳ​ເມືອງ​ຫາດ​ຊາຍ​ຟອງ ແລະ ຫົວໜ່ວຍ​ທຸລະ​ກິດ.

ສິນຄ້າ​ທີ່​ນຳ​ມາ​ວາງສະແດງໃນ​ງານ​ຄັ້ງ​ນີ້​ ປະກອບ​ມີ​ຜະລິດ​ຕະພັນ​ສິນຄ້າ​ໂອ​ດ໋ອບ ຈຳນວນ 11 ຫົວໜ່ວຍ ແລະ ສິນຄ້າ​ຄອບຄົວຕົວ​ແບບ ຈຳນວນ 23 ຫົວໜ່ວຍ ທີ່​ມາ​ຈາກ​ບັນດາ 9 ຕົວ​ເມືອງ ເຊິ່ງ​ງານ​ຈະ​ໄດ້​ດຳເນີນ​ໄປ​ເປັນ​ເວລາ 6 ວັນ ຈົນ​ຮອດ​ມື້​ງານ​ແຂ່ງຂັນ​ຊ່ວງ​ເຮືອ​ມິດຕະພາບ ລະຫວ່າງ​ເມືອງ​ຫາດ​ຊາຍ​ຟອງ ກັບເມືອງ​ໜອງ​ຄາຍ ແຂວງ​ໜອງຄາຍ​ ຣາ​ຊະ​ອານາຈັກ​ໄທ ​ທີ່​ຈະ​ໄດ້ຈັດ​ຂຶ້ນ​ວັນ​ທີ 10 ຕຸລາ 2015 ທີ່ສວນ​ນ້ຳ​ອິນ​ແປງ ຣີ​ເວີ​ໄຊ.

ແຫລ່ງຂ່າວ: