ເພື່ອປະຕິບັດຕາມບົດບັນທຶກ ກອງປະຊຸມຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ນະຄອນຫຼວງວຽງຈັນ ກັບແຂວງໜອງຄາຍ ຄັ້ງທີ 9 ລົງວັນທີ 22 ເມສາ 2011 ທີ່ແຂວງໜອງຄາຍ ແລະ ບົດທົບທວນກອງປະຊຸມ ຄະນະກຳມະການຮ່ວມມືຮັກສາຄວາມສະຫງົບຕາມຊາຍແດນ ລະຫວ່າງເມືອງໂພນພິໄສ ແລະ ເມືອງປາກງື່ມ ຄັ້ງວັນທີ 29 ຕຸລາ 2013 ທີ່ເມືອງໂພນພິໄສ ເປັນເຈົ້າພາບ.
ກອງປະຊຸມຄະນະອະນຸກຳມະການຮ່ວມມື ຮັກສາຄວາມສະຫງົບຮຽບຮ້ອຍຕາມຊາຍແດນ ລະຫວ່າງເມືອງປາກງື່ມ ກັບເມືອງໂພນພິໄສ ໄດ້ຈັດຂຶ້ນວັນທີ 6 ຕຸລາ 2015 ນີ້ ຢູ່ທີ່ໂຮງແຮມບົວວັນ ເມືອງປາກງື່ມ ນະຄອນຫຼວງວຽງຈັນ ຝ່າຍລາວແມ່ນທ່ານ ວົງເດືອນ ບຸນຍະແສງ ເຈົ້າເມືອງປາກງື່ມ ຝ່າຍໄທແມ່ນທ່ານ ທະນະກອນ ເຄື່ອວັນ ເຈົ້າເມືອງໂພນພິໄສ ພ້ອມດ້ວຍຄະນະອະນຸກຳມະການຮ່ວມມື ຮັກສາຄວາມສະຫງົບຮຽບຮ້ອຍຕາມຊາຍແດນ ແລະ ຄະນະອະນຸກຳມະການທັງສອງຝ່າຍເຂົ້າຮ່ວມ.
ກອງປະຊຸມທັງສອງຝ່າຍໄດ້ປຶກສາຫາລືຫຼາຍບັນຫາ ເປັນຕົ້ນແມ່ນ ການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ໃນໄລຍະ 2 ປີຜ່ານມາ ການຮ່ວມມືຮັກສາປ້ອງກັນເສັ້ນຊາຍແດນ ໃນການດູດຫີນ-ຊາຍຕາມລຳນ້ຳຂອງ ການຮ່ວມມືກໍລະນີບຸກຄົນຂອງແຕ່ລະຝ່າຍຖືກຈັບກຸມຄຸມຂັງ ການຮ່ວມມືການສະກັດກັ້ນການປ້ອງກັນ ແລະ ປາບປາມຢາເສບຕິດ ການຄ້າຂາຍເຖື່ອນ ການຄ້າປະເວນີ ການຄ້າມະນຸດ ການໄປອອກແຮງງານ ຜ່ານການຈັດຕັ້ງປະຕິບັດວຽກງານຮ່ວມກັນ ດ້ວຍຄວາມຮັບຜິດຊອບສູງ ເຮັດໃຫ້ວຽກງານຫຼາຍດ້ານມີຜົນສຳເລັດເປັນຢ່າງດີ ແຕ່ຄຽງຄູ່ກັນນັ້ນ ຖ້າທຽບໃສ່ບົດບັນທຶກກອງປະຊຸມຂອງຄະນະກຳມະການທັງສອງຝ່າຍ ເຫັນວ່າຍັງມີຫຼາຍບັນຫາທີ່ຕ້ອງໄດ້ພ້ອມກັນແກ້ໄຂ ເປັນຕົ້ນ ກໍລະນີມີປະຊາຊົນຝ່າຍໃດຝ່າຍໜຶ່ງຖືກເຈົ້າໜ້າທີ່ກັກຕົວຄຸມຂັງ ເພື່ອດຳເນີນຄະດີຕາມຂໍ້ຫາ ຄະດີກະທຳຜິດຕໍ່ລະບຽບກົດໝາຍຂອງສອງປະເທດ ເຈົ້າໜ້າທີ່ທັງສອງຝ່າຍຕ້ອງແຈ້ງຊື່ ແລະ ນາມສະກຸນ ອາຍຸ ທີ່ຢູ່ ຂໍ້ຫາຄະດີ ສະຖານທີ່ກັກຕົວ ແລະ ສະຖານທີດຳເນີນຄະດີໃຫ້ອີກຝ່າຍໜຶ່ງຮັບຊາບ ເພື່ອສອງຝ່າຍຈະໄດ້ພ້ອມກັນແກ້ໄຂ ຜູ້ຂັບເຮືອຮັບສົ່ງຜູ້ໂດຍສານໄປ-ມາ ທັງສອງຝ່າຍຕ້ອງຮັບປະກັນຄວາມປອດໄພເຖິງເຄື່ອງຂອງ ແລະ ຊີວິດຂອງຜູ້ໂດຍສານ ຕ້ອງໃຫ້ນຸ່ງເສື້ອຊູຊີບທຸກຄັ້ງໃນເວລາຂ້າມໄປ-ມາເຂົ້າ-ອອກດ່ານ ສະເໜີຜູ້ປະກອບການທັງສອງຝ່າຍຂົນສົ່ງທາງເຮືອ ຢູ່ດ່ານປະເພນີບ້ານໂດນ-ໂພນພິໄສ ຫ້າມຮັບຝາກຄົນ ແລະ ສິ່ງຂອງ ໂດຍທີ່ບໍ່ແມ່ນໜ້າທີ່ຄວາມຮັບຜິດຊອບຂອງຕົນ ກໍລະນີສິນຄ້າທີ່ຍັງບໍ່ທັນໄດ້ມອບ-ຮັບຂອງທັງສອງຝ່າຍ ແມ່ນເຈົ້າຂອງເຮືອຕ້ອງຮັບຜິດຊອບຕໍ່ຜົນເສຍຫາຍທັງໝົດທີ່ເກີດຂຶ້ນ ພຽງຝ່າຍດຽວ ກໍລະນີປະຊາຊົນເຂົ້າ-ອອກເມືອງບໍ່ຖືກຕ້ອງທີ່ຜິດກົດໝາຍຂອງສອງປະເທດ ເຈົ້າໜ້າທີ່ທັງສອງຝ່າຍຕ້ອງແຈ້ງໃຫ້ກັນຊາບ ແລະ ສົ່ງຜ່ານຄະນະອະນຸກຳມະການຮ່ວມມືຊາຍແດນລະຫວ່າງເມືອງປາກງື່ມ ກັບເມືອງໂພນພິໄສ.
ນອກຈາກນັ້ນ ທັງສອງຝ່າຍຍັງໄດ້ມີການມອບຂອງທີ່ລະນຶກ ແລະ ຈັດກິດຈະກຳສ້າງຄວາມສາມັກຄີ ເສີມສ້າງຄວາມສຳພັນອັນດີ ໃນການແຂ່ງຂັນກີລາເຕະບານອາວຸໂສ ເປຕັງ ຊາຍ-ຍິງ ທັງຊົມສິລະປະເມືອງປາກງື່ມນຳອີກ.
ແຫລ່ງຂ່າວ:
