ທຸກມື້ນີ້ເຮົາເຮັດວຽກຢູ່ທີ່ໂຕະເຮັດວຽກຕິດຕໍ່ກັນຫລາຍຊົ່ວໂມງໂດຍບໍ່ຮູ້ຕົວ ນັກວິໄຈອາເມຣິກາພົບວ່າພຶດຕິກຳແບບນີ້ບໍ່ດີຕໍ່ສຸກຂະພາບຫລອດເລືອດ ແຕ່ຫາກໄດ້ອອກມາຍ່າງພຽງແຕ່ 10 ນາທີ ລະບົບຫລອດເລືອດກໍກັບມາສຸກຂະພາບດີຄືເກົ່າໄດ້ຢ່າງບໍ່ໜ້າເຊື່ອ
ພະນັກງານບໍລິສັດໃນຫລາຍປະເທດນັ່ງເຮັດວຽກທີ່ໂຕະເກີນເຄີ່ງໜຶ່ງຂອງເວລາງານທັງໝົດ ຍິ່ງເທກໂນໂລຍີພັດທະນາໄປຫລາຍເທົ່າໃດ ວິຖີຊີວິດຂອງເຮົາກໍຍິ່ງປ່ຽນໄປຫລາຍເທົ່ານັ້ນ ເຊີ່ງກໍຈະສົ່ງຜົນກະທົບຕໍ່ສຸກຂະພາບຫົວໃຈຢ່າງຫລີກລ້ຽງບໍ່ໄດ້ ຫລ້າສຸດ ນັກວິໄຈທີ່ມະຫາວິທະຍາໄລມິຊູລີຄົ້ນພົບວ່າ ຖ້າຫາກຄົນເຮົານັ່ງເຮັດວຽກ 6 ຊົ່ວໂມງຕິດຕໍ່ກັນ ລະບົບທາງເດີນເລືອດຈະເຮັດວຽກລຳບາກ ແຕ່ຫາກຍ່າງອອກກຳລັງກາຍພຽງແຕ່ 10 ນາທີພາຍຫລັງຈາກນັ່ງມາດົນ ສຸກຂະພາບຂອງລະບົບທາງເດີນເລືອດກໍຈະກັບມາດີໄດ້
“ພວກເຮົານັ່ງເຮັດວຽກສ່ວນໃຫຍ່ມັກຈະເພີດເພີນ ແລະ ເຮັດວຽກໄປເລື້ອຍໆໂດຍບໍ່ຮູ້ຕົວວ່າເຮັດວຽກໄປດົນເທົ່າໃດແລ້ວ ເຮັດໃຫ້ເກີດການບໍ່ເໜັງຕີງຮ່າງກາຍເປັນເວວລາດົນຕິດຕໍ່ກັນ” ດຣ. ຈາມ ພາດິນລາ ນັກວິໄຈດ້ານໂພສະນາການ ແລະ ສີນວິທະຍາການອອກກຳລັງກາຍ ຄະນະແພດສາດ ມະຫາວິທະຍາໄລມິຊູລີ ສະຫາລັດອະເມຣິກາເຜີຍ
“ແຕ່ຢ່າງໃດກໍຕາມ ການສຶກສາຂອງເຮົາພົບວ່າ ຖ້າເຮົານັ່ງເຮັດວຽກ 6 ຊົ່ວໂມງຕິດຕໍ່ກັນ ຫລືຄິດເປັນເວລາສ່ວນໃຫຍ່ຂອງເວລາເຮັດວຽກ ເລືອດຈະບໍ່ຄ່ອຍໄປລ້ຽງທີ່ຕີນ ແຕ່ເຮົາກໍພົບວ່າ ພຽງແຕ່ລຸກອອກມາຍ່າງແຕ່ 10 ນາພາຍຫລັງຈາກນັ່ງມາດົນໆ ກໍຈະສົ່ງຜົນຍ້ອນກັບເຮັດໃຫ້ສຸກຂະພາບດີຂຶ້ນ”
ໃນການສຶກສາເທື່ອນີ້ ນັກວິໄຈໄດ້ປຽບທຽບການເຮັດວຽກງານຂອງລະບົບທາງເດີນເລືອດຂອງຜູ້ຊາຍສຸກຂະພາບດີ 11 ຄົນກ່ອນ ແລະ ຫລັງນັ່ງເຮັດວຽກ ນັກວິໄຈພົບວ່າການໄຫລວຽນຂອງເລືອດບໍລິເວນຂາພັບຈະຫລຸດລົງຢ່າງຫລາຍເມື່ອນັ່ງເຮັດວຽກເປັນເວລາ 6 ຊົ່ວໂມງ ຫລັງຈາກນັ້ນ ນັກວິໄຈໃຫ້ຜູ້ຮັບການທົດລອງອອກມາຍ່າງສັ້ນໆ ແລະ ໄດ້ຄົ້ນພົບວ່າ ການຍ່າງດ້ວຍຄວາມໄວປົກກະຕິຂອງຕົວເອງພຽງແຕ່ 10 ນາທີກໍຊ່ວຍຟື້ນຟູການໄຫລວຽນຂອງລະບົບໄຫລວຽນຂອງເລືອດໄດ້
“ເມື່ອການໄຫລວຽນຂອງເລືອດຫລຸດລົງໄປ ແຮງຮຸກຖູລະຫວ່າງເລືອດທີ່ໄຫລກັບຝາຂອງຫລອດເລືອດໃຫຍ່ນັ້ນກໍຈະຫລຸດລົງໄປນຳ ການຍ່າງຈະໄປຫລຸດຄວາມສາມາດໃນການພອງຕົວຂອງຫລອດເລືອດໃຫຍ່ ການພອງຕົວຂອງຫລອດເລືອດບົ່ງບອກເຖິງສຸກຂະພາບຂອງຫລອດເລືອດ ຍິ່ງຫລອດເລືອດພອງຕົວໄດ້ຫລາຍເທົ່າໃດ ແລະ ຕອບສະໜອງກັບສິ່ງແວດລ້ອມໄດ້ດີເທົ່າໃດກໍຈະເຮັດໃຫ້ສຸກຂະພາບດີຂຶ້ນເທົ່ານັ້ນ”
ນັກວິໄຈໄດ້ເນັ້ນໃຫ້ປະຊາຊົນທົ່ວໄປຫັນມາເຂົ້າໃຈຜົນກະທົບຂອງການນັ່ງເຮັດວຽກຕິດຕໍ່ກັນດົນໆວ່າຈະເກີດຜົນກະທົບຕໍ່ສຸກຂະພາບຫລອດເລືອດຢ່າງໃດ ໂດຍແນະນຳໃຫ້ລຸກອອກມາຍ່າງເປັນເວລາສັ້ນໆເພື່ອບໍ່ໃຫ້ເກີດພະຍາດຮ້າຍຈາກການທີ່ຫລອດເລືອດຜິດປົກກະຕິໃນອະນາຄົດ
“ມີງານວິໄຈອອກມາວ່າການນັ່ງໃຫ້ໜ້ອຍລົງຈະເຮັດໃຫ້ມີກະບວນການເມຕາບໍລິຊຶມລວມເຖິງສຸກຂະພາບຂອງລະບົບທາງເດີນເລືອດດີຂຶ້ນ ເຮົາຍັງຄວນຈະຕ້ອງເຮັດວຽກວິໄຈຕໍ່ໄປເພື່ອສຶກສາວ່າລະບົບຫລອດເລືອດທີ່ໄດ້ຮັບຜົນກະທົບຈາກການນັ່ງເຮັດວຽກນັ້ນ ໃນໄລຍະຍາວຈະເກີດຜົນຫຍັງຂື້ນ”