ນັກດາຣາສາດຊວນເບິ່ງປາກົດການ “ຊູເປີມູນ” ດວງຈັນໂຄຈອນໃກ້ໂລກທີ່ສຸດ ມີຂະໜາດໃຫຍ່ເຫັນແຈ້ງທີ່ສຸດ ພ້ອມກັບປາກົດການຈັນເຕັມດວງ ໃນວັນທີ່ 27-28 ກັນຍາ ຫາເບິ່ງຍາກໃນຮອບກວ່າ 30 ປີ
ເມື່ອວັນທີ່ 24 ກັນຍາ ຜູ້ສື່ຂ່າວລາຍງານວ່າ ມີຂ່າວດີສຳລັບນັກເບິ່ງດາວທົ່ວໂລກ ເນື່ອງຈາກຈະເກີດປາກົດການ “ຊູເປີມູນ” ຫລືດວງຈັນດວງໃຫຍ່ ທີ່ກຳລັງຈະເກີດໃນຄືນມື້ອາທິດທີ່ 27-28 ກັນຍາ
ໂດຍປາກົດການດັ່ງກ່າວເປັນການທີ່ດວງຈັນໂຄຈອນເຂົ້າໃກ້ໂລກຫລາຍທີ່ສຸດໃນຮອບປີ ຊຶ່ງໃກ້ກວ່າທຸກເທື່ອປະມານ 48,000 ກິໂລແມັດ ຈົນເບິ່ງເຫັນດວງຈັນມີຂະໜາດໃຫຍ່ ແລະ ແຈ້ງກວ່າປົກກະຕິ ລວມທັງຍັງເກີດປາກົດການຈັນເຕັມດວງ ຫລືການທີ່ດວງອາທິດ ໂລກ ແລະ ດວງຈັນ ຮຽງຕົວໃນແນວດຽວກັນ ເຮັດໃຫ້ເງົາຂອງໂລກທັບບົດບັງດວງຈັນ ເກີດເປັນຈັນເຕັມດວງທີ່ຢູ່ດົນກວ່າ 1 ຊົ່ວໂມງ ໂດຍຂຶ້ນຢູ່ກັບສະຖານທີ່ໃນການເບີ່ງລວມທັງສະພາບອາກາດໃນແຕ່ລະບ່ອນ
ຢ່າງໃດກໍຕາມ ຖືເປັນປາກົດການທີ່ຫາເບິ່ງຍາກໃນຮອບກວ່າ 30 ປີ ໂດຍເທື່ອຫລ້າສຸດຄື ປີ 1982 ແລະ ຈະມີໃຫ້ເຫັນກັນອີກເທື່ອໃນປີ 2033 ໂດຍຈະເບິ່ງເຫັນໄດ້ໃນອະເມລິກາເໜືອ, ອະເມລິກາໃຕ້, ຍຸໂຣບ, ແອຟຣິກາ ແລະເອເຊຍຕະເວັນຕົກ
ປາກົດການດັ່ງກ່າວສາມາດເບິ່ງເຫັນໄດ້ດ້ວຍຕາເປົ່າໂດຍບໍ່ຕ້ອງໃຊ້ອຸປະກອນ ໂດຍສັງເກດທ້ອງຟ້າທາງຝັ່ງຕະເວັນອອກ