ຂປລ. ພາຍຫລັງທີ່ມີການຮ່ວມມືພາຍໃຕ້ ໂຄງການເຊື່ອມໂຍງລະບົບຕູ້ ATM ຫລື BConnex ລະຫວ່າງ ທະນາຄານການຄ້າຕ່າງປະເທດລາວ ມະຫາຊົນ (ທຄຕລ), ທະນາຄານ ລາວ-ຫວຽດ, ທະນາຄານ ສົ່ງເສີມ ກະສິກໍາ, ທະນາຄານ ພັດທະນາລາວ, ທະນາຄານ ຮ່ວມພັດທະນາ, ທະນາຄານ ເອັສທີຈໍາກັດ ແລະ ທະນາຄານ ມາຣູຮານເຈແປນລາວ, ຄັ້ງຫລ້າສຸດ ກໍໄດ້ຮ່ວມໂຄງການດັ່ງກ່າວ ກັບທະນາຄານ ກຸງສີອະຍຸດທະຍາ ຈໍາກັດມະຫາຊົນ ເຊິ່ງເປັນທະນາຄານ ແຫ່ງທີ 8 ທີ່ສາມາດເຊື່ອມໂຍງ ລະບົບຕູ້ ATM ຜ່ານລະບົບຮ່ວມ BConnex ຫລາຍກ່ວາ 750 ໜ່ວຍ ທີ່ມີຢູ່ໃນທົ່ວ ສປປ ລາວ ເຮັດໃຫ້ລູກຄ້າທະນາຄານ ສາມາດຖອນເງິນສົດເປັນ ສະກຸນເງິນກີບ ແລະ ກວດຍອດເງິນ ໃນບັນຊີໄດ້ຢ່າງງ່າຍດາຍ ໂດຍຜ່ານຕູ້ ATM ຂອງ 8 ທະນາຄານ.
ການເຂົ້າຮ່ວມການເຊື່ອມໂຍງລະບົບຕູ້ ATM ຫລື BConnex ຂອງທະນາຄານກຸງ ສີອະຍຸດທະຍາ ຈໍາກັດມະຫາຊົນ ໄດ້ຈັດຂຶ້ນໃນວັນທີ 18 ກັນຍາ 2015 ທີ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ພູໂຂງ ຈັນທະຈັກ ຮັກສາການຜູ້ອໍານວຍການ ທຄຕລ ເຊິ່ງໃນຜ່ານມາ ທຄຕລ ກັບ ທະນາຄານກຸງສີອະຍຸດທະຍາ ໄດ້ມີການຮ່ວມມືສ້າງສິດທິພິເສດ ໃຫ້ແກ່ລູກຄ້າຂອງທັງ 2 ທະນາຄານ ຄື ຜູ້ທີ່ຖືບັດ ATM ບັດນັກສຶກສາ, ບັດ CUP, ບັດ VISA ຂອງ ທຄຕລ ສາມາດຖອນເປັນເງິນບາດສະກຸນເງິນໄທ ຈາກຕູ້ ATM 5.300 ຕູ້ຂອງທະນາຄານ ກຸງສີອະຍຸດທະຍາ ຈໍາກັດມະຫາຊົນ ຢູ່ທີ່ປະເທດໄທ ໂດຍໄດ້ຮັບສ່ວນຫລຸດ 20% ຂອງຄ່າທໍານຽມ ໃນການຖອນເງິນສົດ ແຕ່ລະຄັ້ງ ແລະ ບັດ CUP, ບັດ VISA ຂອງທະນາຄານ ກຸງສີອະຍຸດທະຍາ ສາມາດຖອນເປັນເງິນກີບ ຈາກຕູ້ ATM ຂອງ ທຄຕລ ແລະ ໄດ້ຮັບສ່ວນຫລຸດ 20% ຂອງຄ່າທໍານຽມ ໃນການຖອນແຕ່ລະຄັ້ງ ເຊັ່ນດຽວກັນ.
ທ່ານ ນັນທະລາດ ແກ້ວປະເສີດ ຄະນະອໍານວຍການ ທຄຕລ ຢືນຢັນວ່າ: ການເຊື່ອມໂຍງລະບົບຕູ້ ATM ໄດ້ສະແດງໃຫ້ເຫັນຄວາມເປັນຈິດໜຶ່ງ ໃຈດຽວກັນທີ່ຕ້ອງການພັດທະນາລະບົບບໍລິການຕ່າງໆຂອງ ທະນາຄານພາຍໃນ ໃຫ້ທັນສະໄໝ ເພື່ອກ້າວສູ່ປະຊາຄົມ ເສດຖະກິດອາຊຽນ ( AEC ), ໂຄງການນີ້ ເປັນໜຶ່ງໃນບັນດາໜ້າວຽກທີ່ສໍາຄັນ ທີ່ເຮັດໃຫ້ທະນາຄານຂອງຕ່າງປະເທດເຫັນຄວາມສາມາດ ແລະ ຄວາມຮ່ວມມືກັນຂອງທະນາຄານລາວ, ໃນຂະນະນີ້ ປະຊາຊົນ ຫລື ລູກຄ້າ ໄດ້ນໍາໃຊ້ BConnex ນັບມື້ຫລາຍຂຶ້ນ ແລະ ການເຊື່ອມໂຍງລະບົບຕູ້ ATM ສາມາດ ຄວບຄຸມການບໍລິການ ໄດ້ຫລາຍກ່ວາ 90% ໃນຂອບເຂດທົ່ວປະເທດ.
ຜູ້ອໍານວຍການໃຫຍ່ ກຸ່ມລູກຄ້າທະນາຄານທຸລະກິດຍີ່ປຸ່ນ ແລະ ບໍລິສັດຂ້າມຊາດ ທະນາຄານກຸງສີອະຍຸດທະຍາ ຈໍາກັດ ມະຫາຊົນ, ທ່ານ Masaaki Suzuki ກ່າວວ່າ: ເປັນບາດກ້າວສໍາຄັນຂອງລະບົບທະນາຄານທັງ 2 ປະເທດທີ່ມີການເຊື່ອມໂຍງລະບົບຕູ້ ATM ຮ່ວມກັນ ແລະ ກໍເປັນທະນາຄານແຫ່ງທໍາອິດ ຈາກປະເທດໄທ ເປັນທະນາຄານ ລໍາດັບທີ 8 ໃນສປປ ລາວ ທີ່ໄດ້ເຂົ້າຮ່ວມໂຄງການ BConnex ເຊິ່ງຈະອໍານວຍຄວາມ ສະດວກ ໃຫ້ລູກຄ້າບັດ ATM ຂອງທະນາຄານກຸງສີ ໃນ ສປປ ລາວ ກັບສະມາຊິກ 7 ທະນາຄານ ໃຫ້ສາມາດເຮັດທຸລະກໍາ ຜ່ານຕູ້ ATM ໄດ້ຫລາຍກ່ວາ 750 ໜ່ວຍ ໃນສປປ ລາວ, ບໍ່ສະເພາະເທົ່ານັ້ນ ແຕ່ມັນຍັງບົ່ງບອກເຖິງ ຄວາມພ້ອມ ຂອງລະບົບການເງິນ-ການທະນາຄານ ຂອງ ສປປ ລາວ ກ້າວສູ່ AEC ໃນທ້າຍປີ 2015 ອີກດ້ວຍ.
ແຫລ່ງຂ່າວ:
