ຂປລ. ໂດຍຕອບສະໜອງຕາມຄຳເຊີນຂອງ ທ່ານ ບານກິນມູນ ເລຂາທິການໃຫຍ່ ອົງການສະຫະປະຊາຊາດ, ທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສປປ ລາວ ພ້ອມຄະນະໄດ້ເດີນທາງຈາກນະຄອນຫລວງວຽງຈັນ ໃນວັນທີ 23 ກັນຍາ 2015 ເພື່ອເຂົ້າຮ່ວມ ກອງປະຊຸມສຸດຍອດອົງການສະຫະປະຊາຊາດ ເພື່ອຮັບຮອງເອົາວາລະການພັດທະນາ ຫລັງປີ 2015 ແລະ ກອງປະຊຸມຄົບຄະນະ ຂອງສະມັດຊາໃຫຍ່ສະຫະປະຊາຊາດ ຄັ້ງທີ 70 ແຕ່ວັນທີ 25 ກັນ ຍາ ຫາ 1 ຕຸລາ 2015 ທີ່ ນິວຢອກ ສະຫະລັດອາເມຣິກາ.
ໃນກອງປະຊຸມດັ່ງກ່າວ ຈະມີປະມຸກລັດ, ຫົວໜ້າລັດຖະບານ ຈາກ 150 ກວ່າປະເທດເຂົ້າຮ່ວມ ເພື່ອພ້ອມກັນສະ ຫລຸບຕີລາຄາການຈັດຕັ້ງປະຕິບັດ ເປົ້າໝາຍສະຫັດສະວັດດ້ານການພັດທະນາ ຫລື MDGs ຕະຫລອດໄລຍະ 15 ປີຜ່ານມາ ແລະ ພິຈາລະນາຮັບຮອງເອົາວາລະການພັດທະນາ ຫລັງປີ 2015, ລວມທັງເປົ້າໝາຍການພັດທະນາແບບຍືນຍົງ ທີ່ກວມເອົາ 3 ດ້ານຄື: ດ້ານເສດຖະກິດ, ສັງຄົມ ແລະ ສິ່ງແວດລ້ອມ ເຊິ່ງວົງຄະນາຍາດສາກົນ ຈະຕ້ອງພ້ອມກັນຈັດຕັ້ງປະຕິບັດ ໃນໄລຍະ 15 ປີຕໍ່ໜ້າ. ພ້ອມດຽວກັນນັ້ນ ບັນດາຜູ້ນຳໂລກ ຍັງຈະໄດ້ແລກປ່ຽນທັດສະນະກ່ຽວກັບບັນຫາທີ່ພົ້ນເດັ່ນໃນຂອບເຂດທົ່ວໂລກ ເປັນຕົ້ນ: ການຮ່ວມມືສາກົນເພື່ອການພັດທະນາ, ການຮັກສາສັນຕິພາບ ແລະ ຄວາມໝັ້ນຄົງສາກົນ, ພ້ອມ ທັງທົບທວນຄືນການປະຕິບັດພາລະບົດບາດ ຂອງອົງການສະຫະປະຊາຊາດ ໃນໂອກາດສະຫລອງ 70 ປີ ແຫ່ງການສ້າງຕັ້ງອົງການສະຫະປະຊາຊາດ ແລະ ກຳນົດແນວທາງການປັບປຸງອົງການສະຫະປະຊາຊາດ ໃນຕໍ່ ໜ້າ ລວມທັງການດຳເນີນການປະຕິຮູບອົງການ ໃຫ້ມີຄວາມສອດຄ່ອງກັບສະພາບເງື່ອນໄຂໃນປັດຈຸບັນ.
ນອກຈາກນັ້ນ, ຄະນະຜູ້ແທນລາວ ຍັງ ຈະເຂົ້າຮ່ວມກອງປະຊຸມປິ່ນອ້ອມທີ່ສຳຄັນຕ່າງໆ ແລະ ພົບປະສອງຝ່າຍກັບຄະນະຜູ້ແທນຕ່າງປະເທດຈຳນວນໜຶ່ງ. ຫລັງຈາກເຂົ້າຮ່ວມກອງປະຊຸມສຸດຍອດອົງການສະຫະປະຊາຊາດແລ້ວ ປະ ທານປະເທດ ແຫ່ງ ສປປ ລາວ ຈະໄດ້ເດີນທາງຢ້ຽມຢາມລັດຖະກິດ ສາທາລະນະລັດກູບາ ແຕ່ວັນທີ 2-4 ຕຸລາ 2015 ຕື່ມອີກ.
ແຫລ່ງຂ່າວ:
