ຜ້າຄຸມລ່ອງຫົນ ເປັນຂອງວິເສດທີ່ມັກຈະປາກົດຢູ່ໃນນິຍາຍ ຫລື ຮູບເງົາຢູ່ເລື້ອຍໆ ບໍ່ວ່າຈະເປັນສະຕາລ໌ເທກ ຫລືແຮລ໌ຣີ່ ພອດເຕີລ໌ ແຕ່ຫລ້າສຸດ ເລື່ອງເຫລົ່ານີ້ເລີ່ມເປັນຈິງຂຶ້ນມາແລ້ວ ເມື່ອນັກວິທະຍາສາດທີ່ ເບີກີ ໄດ້ຄິດຄົ້ນຜ້າຄຸມບາງພິເສດທີ່ສາມາດຮຽນແບບຮູບຮ່າງຂອງວັດຖຸ ແລະ ປົກປິດບໍ່ໃຫ້ຖືກແສງທີ່ເບິ່ງເຫັນໄດ້ກວດຈັບໄດ້ ເຖິງວ່າຜ້າຄຸມນີ້ຈະຍັງມີຂະໜາດນ້ອຍລະດັບໄມໂຄຣແມັດ ແຕ່ຫລັກການທີ່ຢູ່ເບື້ອງຫລັງເທກໂນໂລຍີນີ້ສາມາດນຳໄປຕໍ່ຍອດເພື່ອສ້າງຜ້າຄຸມລ່ອງຫົນໃນທີ່ໃຫຍ່ຕໍ່ໄປໄດ້
ນັກວິທະຍາສາດທີ່ສະຖາບັນວິໄຈແຫ່ງຊາດລໍເລນຊ໌ ເບີກີ (ເບີກີແລັບ) ແລະມະຫາວິທະຍາໄລແຄລິຟໍເນຍ ເບີກີ ເຮັດວິໄຈກັບບຣັອກຮູບຮ່າງຄ້າຍດິນຈີ່ທີ່ເຮັດຈາກ”ນາໂນແອນເທນນາ”ທອງຄຳ ເຮັດໃຫ້ໄດ້ຜ້າຄຸມຜິວທີ່ໜາ 80 ນາໂນແມັດ ທີ່ສາມາດຫໍ່ຫຸ້ມວັດຖຸ 3 ມິຕິຂະໜາດເທົ່າເຊນຂອງສິ່ງມີຊີວິດ ແລະຄຸມໄປຕາມພື້ນຜິວທີ່ມີຕຸ່ມ ແລະ ຂຸມເລິກໄດ້ ພື້ນຜິວຂອງຜ້າຄຸມນີ້ຖືກອອກແບບໃຫ້ສາມາດປ່ຽນທິດທາງຂອງຄື່ນແສງສະທ້ອນເພື່ອໃຫ້ວັດຖຸນັ້ນຖືກເບິ່ງເຫັນຄືກັບວ່າມັນລ່ອງຫົນຢູ່ແທ້ ເຮັດໃຫ້ເຄື່ອງມືກວດຈັບທາງແສງບໍ່ສາມາດກວດຈັບວັດຖຸນັ້ນໄດ້ເມື່ອມີຜ້າຄຸມລ່ອງຫົນນີ້ຄຸມຢູ່ ໂດຍງານວິໄຈນີ້ໄດ້ຮັບການເຜີຍແຜ່ໃນວາລະສານວິຊາການ Science ແລ້ວ
“ນັບເປັນເທື່ອທຳອິດທີ່ວັດຖຸສາມມິຕິຮູບຮ່າງແປກສາມາດຖືກຄຸມເຮັດໃຫ້ບໍ່ສາມາດເບິ່ງເຫັນໄດ້ໃນຄື່ນແສງທີ່ເບິ່ງເຫັນໄດ້” ຊຽງ ຈາງ ຜູ້ອຳນວຍການສູນວິໄຈວັດສະດຸສາດ ທີ່ ເບີກີແລັບ ເຜີຍ ໂດຍວັດສະດຸຊະນິດນີ້ມີໂຄງສ້າງລະດັບນາໂນທີ່ຖືກຕັດແປງເຮັດໃຫ້ມີຄຸນສົມບັດທາງແມ່ເຫລັກໄຟຟ້າທີ່ບໍ່ໄດ້ພົບໄດ້ໃນທຳມະຊາດ
“ຜ້າຄຸມບາງຂອງເຮົາຕອນນີ້ເບິ່ງຄືກັບຜ້າ ອອກແບບແລະປະກອບງ່າຍ ແລະສາມາດນຳໄປຕໍ່ຍອດຂະໜາດໃຫຍ່ເພື່ອຄຸມວັດຖຸລະດັບໃຫຍ່ໄດ້”
ການທີ່ເຮົາເບິ່ງເຫັນວັດຖຸຕ່າງໆໄດ້ກໍເພາະເກີດຈາກແສງທີ່ເບິ່ງເຫັນໄດ້ ເຮົາສາມາດຫລີກລ້ຽງກົດທີ່ຄວບຄຸມກິລິຍາໃນວັດຖຸທຳມະຊາດນີ້ໄດ້ໂດຍການໃຊ້ວັດຖຸພິເສດທີ່ມີຄຸນສົມບັດພິເສດທາງແສງທີ່ເກີດຈາກໂຄງສ້າງທາງຟິສິກ (ແທນທີ່ຈະສຶກສາເລື່ອງອົງປະກອບທາງເຄມີຢ່າງດຽວ) ຈາງແລະທີມວິໄຈໄດ້ທຸ່ມເທຄວາມພະຍາຍາມຫລາຍສິບປີໃນການຄວບຄຸມວິຖີຂອງແສງໃຫ້ໂຄ້ງຫລືພະຍາຍາມຈະປ່ຽນໃຫ້ໄປທາງຫລັງ ອັນເປັນປາກົດການທີ່ຈະບໍ່ເກີດຂຶ້ນໃນວັດຖຸທາງທຳມະຊາດ ແລະຈະເປັນປາກົດການທີ່ເຮັດໃຫ້ວັດຖຸນັ້ນກວດຈັບບໍ່ໄດ້ດ້ວຍສາຍຕາ ໃນອະດີດນັ້ນ ຜ້າຄຸມລ່ອງຫົນເປັນຜ້າຄຸມທີ່ຂ້ອນຂ້າງໃຫຍ່ ແລະ ນຳໄປຂະຫຍາຍຂະໜາດໄດ້ຍາກ ລວມເຖິງຈະເກີດຄວາມແຕກຕ່າງລະຫວ່າງຜ້າຄຸມກັບສາກຫລັງ ເຮັດໃຫ້ເຖິງແມ່ນເຮົາຈະເບິ່ງບໍ່ເຫັນວັດຖຸທີ່ຜ້າຄຸມຄຸມຢູ່ ແຕ່ເຮົາກໍເບິ່ງເຫັນຕົວຜ້າຄຸມເອງຢູ່ດີ