ເມືອງຫາດຊາຍຟອງ ນະຄອນຫຼວງວຽງຈັນ ໄດ້ຈັດກອງປະຊຸມປຶກສາຫາລືຂອງ ຄະນະກຳມະການໄກ່ເກ່ຍ-ແກ້ໄຂສິ່ງກີດຂວາງ ເພື່ອວາງສາຍສົ່ງທໍ່ນ້ຳປະປາທ່າເດື່ອ ແລະ ພ້ອມທັງປະກອບຄຳຄິດເຫັນ ເພື່ອໃຫ້ມີຄວາມເໝາະສົມລະອຽດຄົບຖ້ວນ ແລະ ຖືກຕ້ອງໃນໂຄງການກໍ່ສ້າງນ້ຳປະປາທ່າເດື່ອ ຂຶ້ນໃນທ້າຍອາທິດຜ່ານມາ ຢູ່ສະໂມສອນປົກຄອງເມືອງ ໂດຍເປັນປະທານຂອງ ທ່ານ ແກ່ນ ວໍລະສານ ຮອງເຈົ້າເມືອງຫາດຊາຍຟອງ ຜູ້ຮັບຜິດຊອບວຽກງານເສດຖະກິດ ພ້ອມນີ້ ຍັງມີທ່ານ ສຸທິນ ຄຽງສົມບັດ ຫົວໜ້າໂຄງການ ທັງເປັນນັກວິສະວະກອນນ້ຳປະປາທ່າເດື່ອ ມີຕາງໜ້າພະແນກ ຍທຂ ນວ ບໍລິສັດຜູ້ສຳປະທານຈາກ ບໍລິສັດ ວຽງຈັນອໍໂຕເມຊັນແອນໂຊລູຊີງເອັນຈີເນຍຣິງ ຈຳກັດ (VASE) ແລະ ຕາງໜ້າຈາກບໍລິສັດ ລັດວິສາຫະກິດວິສະວະກອນນ້ຳ ແລະ ສິ່ງແວດລ້ອມ ພ້ອມດ້ວຍພະນັກງານວິຊາການ ແລະ ນາຍບ້ານເຂົ້າຮ່ວມ.
ທ່ານ ສຸທິນ ຄຽງສົມບັດ ຫົວໜ້າໂຄງການໄດ້ລາຍງານວ່າ: ໂຄງການນ້ຳປະປາທ່າເດື່ອ ເປັນໂຄງການທຳອິດ ທີ່ໄດ້ມີການເຊັນສັນຍາສຳປະທານໃນຮູບແບບ (BOT) ຄືເປັນຜູ້ສຳປະທານລົງທຶນກໍ່ສ້າງດຳເນີນງານ ແລະ ມອບໂອນກິດຈະການໃນກຳນົດເວລາ 35 ປີ ຂອງໄລຍະທີ I ໂດຍມີກຳລັງການຜະລິດ 20.000 ແມັດກ້ອນຕໍ່ມື້ ແລະ ສາມາດຕໍ່ສັນຍາໄດ້ອີກໄລຍະ II ກຳນົດເວລາ 15 ປີແລ້ວ ຈາກນັ້ນ ຈຶ່ງມອບໂອນໃຫ້ກັບລັດຖະບານ ໂຄງການດັ່ງກ່າວນີ້ ມີມູນຄ່າການກໍ່ສ້າງທັງໝົດ 19 ລ້ານໂດລາສະຫະລັດ ຫຼື ປະມານ 156 ຕື້ກວ່າກີບ ເຊິ່ງມີບໍລິສັດຜູ້ສຳປະທານແມ່ນບໍລິສັດ ວຽງຈັນອໍໂຕເມຊັນແອນໂຊລູຊັນເອັນຈີເນຍຣິງ ຈຳກັດ (VASE) ເປັນຜູ້ລົງທຶນ ແລະ ດຳເນີນງານ ໂດຍແມ່ນລັດວິສາຫະກິດນ້ຳປະປານະຄອນຫຼວງ ເປັນເຈົ້າຂອງໂຄງການ ແລະ ມີບໍລິສັດ ລັດວິສາຫະກິດວິສະວະກອນນ້ຳ ແລະ ສິ່ງແວດລ້ອມ ເປັນບໍລິສັດທີ່ປຶກສາ ສຳຫຼວດອອກແບບ ແລະ ຕິດຕາມຄຸ້ມຄອງການກໍ່ສ້າງ ພາຍຫຼັງໂຄງການດັ່ງກ່າວສຳເລັດ ແມ່ນສາມາດຕອບສະໜອງບໍລິການນ້ຳໃຫ້ແກ່ພື້ນທີ່ນະຄອນຫຼວງ ເຊິ່ງກວມເອົາຈຳນວນ 28 ບ້ານທີ່ຂຶ້ນກັບເມືອງຫາດຊາຍຟອງ ແລະ ອີກສ່ວນໜຶ່ງຂອງຂອບເຂດຊາຍແດນເມືອງໄຊເຊດຖາ.
ປັດຈຸບັນໂຄງການດັ່ງກ່າວ ແມ່ນມີຄວາມຄືບໜ້າແລ້ວ 18,35% ຂອງໂຄງການທັງໝົດ ສ່ວນໃນຕໍ່ໜ້າແມ່ນຈະສຸມໃສ່ 3 ໜ້າວຽກຄື: ຈະເລີ່ມຕິດຕັ້ງສະຖານີດູດນ້ຳດິບໃນຕົ້ນປີ 2016 ແລະ ຈະສືບຕໍ່ກໍ່ສ້າງລະບົບໂຮງງານນ້ຳປະປາ ແລະ ສາຍທໍ່ສົ່ງ ຈາກນັ້ນ ຄະນະປະທານ ພ້ອມດ້ວຍຄະນະ ຍັງໄດ້ລົງຕິດຕາມກວດກາເບິ່ງຕົວຈິງ ຂອງໂຄງການກໍ່ສ້າງນ້ຳປະປາທ່າເດື່ອ ຕື່ມອີກ.
ແຫລ່ງຂ່າວ:
