ຫລາຍຄົນເຄີຍເປັນແບບແມ່ເຮືອນທີ່ລະເລີຍມົວແຕ່ໃຊ້ເຄື່ອງໃຊ້ໄຟຟ້າເຫລົ່ານີ້ໂດຍຫລົງລືມເລື່ອງການເຮັດຄວາມສະອາດມາຮູ້ໂຕອີກເທື່ອໄມໂຄເວຟກໍ່ເປື້ອນເຕັມໄປດ້ວຍຄາບແລະເສດອາຫານ ນ້ຳອຸ່ນທີ່ກົດຈາກກະຕິກນ້ຳຮ້ອນກໍມີຕະກອນຂາວໆປະປົນສ່ວນເຕົາລີດກໍມີຄາບດຳເກາະລອງຫາເວລາວ່າງຄ່ອຍໆເຮັດຄວາມສະອາດເຄື່ອງໃຊ້ໄຟຟ້າເຫລົ່ານີ້ເພາະມັນຍັງຊ່ວຍເລື່ອງສຸຂະພາບຂອງເຈົ້າໄດ້ນໍາອີກ
ວິທີເຮັດຄວາມສະອາດກະຕິກນ້ຳຮ້ອນ
ເມື່ອລອງສັງເກດດີໆຫລັງຈາກເຮົາໃຊ້ກະຕິກນ້ຳຮ້ອນໄປດົນໆຈະມີຄາບຕະກອນຄ້າຍຫີນປູນເກາະຢູ່ບໍລິເວນກົ້ນແລະຝາດ້ານໃນຂອງໂຕກະຕິກຊຶ່ງເວລາກົດນ້ຳດື່ມຕະກອນເຫລົ່ານີ້ຈະປະປົນອອກມາລວມກັບນ້ຳດື່ມເຮັດໃຫ້ຮູ້ສຶກບໍ່ເປັນຕາດື່ມລອງມາເບິ່ງກັນວ່າວິທີເຮັດຄວາມສະອາດກະຕິກນ້ຳຮ້ອນແບບງ່າຍໆນັ້ນເຮັດໄດ້ແບບໃດແນ່
1.ເຕີມນ້ຳລົງໃນກະຕິກຕາມປະລິມານທີ່ພໍດີກັບຄາບຕະກອນພາຍໃນ
2.ຈາກນັ້ນເທນ້ຳສົ້ມສາຍຊູລົງໄປປະມານ5ບ່ວງແລ້ວຄົນນ້ຳສົ້ມສາຍຊູກັບນ້ຳໃນກະຕິກໃຫ້ເຂົ້າກັນ
3.ສຽບປັກສຽບກະຕິກນ້ຳຮ້ອນຄືການຕົ້ມນ້ຳຕາມປົກກະຕິໂດຍໃຫ້ກະຕິກນ້ຳຮ້ອນເຮັດວຽກຈົນຄົບຮອບ
4.ຖອດປັກສຽບກະຕິກນ້ຳຮ້ອນອອກແລະຖິ້ມໄວ້ປະມານ5-6ຊົ່ວໂມງ
5.ເປີດຝາກະຕິກນ້ຳຮ້ອນແລ້ວຈະພົບວ່າຄາບຕະກອນເຫລົ່ານັ້ນຫລຸດອອກມາເກືອບໝົດ ສ່ວນທີ່ຍັງຄົງຄ້າງຢູ່ໃຫ້ໃຊ້ຜ້າເຊັດອອກ
6.ຈາກນັ້ນເທນ້ຳທີ່ມີຕະກອນຢູ່ຖິ້ມອອກຈາກກະຕິກແລ້ວໃຊ້ນ້ຳເປົ່າເທລົງໄປເພື່ອລ້າງແລະເຮັດຄວາມສະອາດກະຕິກຈົນແນ່ໃຈວ່າພາຍໃນກະຕິກກັບມາສະອາດຄືເກົ່າຈະໃຊ້ງານໄດ້ຕາມປົກກະຕິ
ວິທີເຮັດຄວາມສະອາດໄມໂຄເວຟ
ຕະຫລອດການໃຊ້ງານໄມໂຄເວຟໃນການອຸ່ນອາຫານເຄື່ອງດື່ມເຮົາມັກລືມສັງເກດໄປວ່າມີຄາບອາຫານທີ່ອາດເຕັ້ນອອກມາພາຍໃນໄມໂຄເວຟະແລະບໍລິເວນທາງໜ້າອີກທັງເມື່ອໃຊ້ໄມໂຄເວຟໄປດົນໆເຂົ້າກິ່ນຂອງສາລະພັດອາຫານທີ່ເຮົາອຸ່ນກໍເຮັດໃຫ້ໄມໂຄເວຟເບິ່ງຈະມີກິ່ນທີ່ບໍ່ໜ້າດົມລອງມາເບິ່ງກັນວ່າການເຮັດຄວາມສະອາດໄມໂຄເວຟແບບງ່າຍໆ ນັ້ນມີຂັ້ນຕອນແບບໃດແນ່
ອຸປະກອນທີ່ຕ້ອງກຽມ
-ໝາກນາວ1ໜ່ວຍ
-ຖ້ວຍຫລືຈອກທີ່ສາມາດໃຊ້ກັບໄມໂຄເວຟໄດ້
-ຜ້າເຊັດເຮັດຄວາມສະອາດ
ຂັ້ນຕອນ
1.ເທນ້ຳລົງໃນຖ້ວຍປະມານເຄິ່ງຖ້ວຍ
2.ຜ່າໝາກນາວເຄິ່ງປ່ຽງຈາກນັ້ນບີບນ້ຳໝາກນາວລົງໃນຖ້ວຍທີ່ມີນ້ຳປະສົມຢູ່
3.ວາງຖ້ວຍທີ່ມີນ້ຳໝາກນາວແລະນ້ຳໃນໄມໂຄເວຟແລ້ວເປີດໄມໂຄເວຟໄປທີ່ອຸນຫະພູມສູງສຸດໃຊ້ເວລາປະມານ3ນາທີເພື່ອຕົ້ມນ້ຳໃນຖ້ວຍ
4.ຖິ້ມຖ້ວຍນັ້ນໄວ້ໃນໄມໂຄເວຟປະມານ5ນາທີໂດຍບໍ່ຕ້ອງເປີດໄມໂຄເວຟໄອນ້ຳຈະຊ່ວຍກຳຈັດຄາບອາຫານທີ່ຕິດຢູ່ພາຍໃນ
5.ຈາກນັ້ນເຊັດເຮັດຄວາມສະອາດໄມໂຄເວຟດ້ວຍຜ້າແຫ້ງໂດຍເລີ່ມຈາກເພດານທາງຂ້າງແລະກວາດເສດອາຫານທີ່ຕິດຄ້າງຢູ່ອອກມາໃຫ້ໝົດລວມເຖິງເຮັດຄວາມສະອາດບໍລິເວນປະຕູໄມໂຄເວຟນໍາ
ວິທີເຮັດຄວາມສະອາດເຕົາລີດ
ເຕົາລີດເປັນເຄື່ອງໃຊ້ໄຟຟ້າທີ່ແມ່ເຮືອນເກືອບຈະລືມຄິດຮອດສະເໝີກວ່າຈະມາຮູ້ໂຕອີກທີບໍລິເວນຖານເຕົາລີດກໍເປັນຄາບເປື້ອນຫລາຍແລ້ວມາເບິ່ງວ່າເຮົາມີວິທີເຮັດຄວາມສະອາດເຕົາລີດແບບໃດແນ່
ເຮັດຄວາມສະອາດຮອຍທີ່ອອກໄດ້ຢາກໃຊ້ປາຍຜ້າຈຸ່ມນ້ຳໝາກນາວແລະຂັດຄາບເຫລົ່ານັ້ນຈົນກວ່າຈະອອກ
ເຮັດຄວາມສະອາດຮອຍໄໝ້ການເຮັດຄວາມສະອາດຮອຍໄໝ້ເທິງເຕົາລີດນັ້ນມີຫລາຍວິທີທັງການໃຊ້ຢາສີແຂ້ວທາຖານເຕົາລີດຈາກນັ້ນເປີດເຕົາລີດໃຫ້ມີອຸນຫະພູມສູງຈົນກວ່າຢາສີແຂ້ວຈະລະລາຍແລ້ວປິດເຕົາລີດກ່ອນຈະໃຊ້ຜ້າຊຸບນ້ຳເຮັດຄວາມສະອາດ ນອກຈາກໃຊ້ຢາສີແຂ້ວແລ້ວເຮົາຍັງສາມາດໃຊ້ເກືອໂຮຍເທິງເຈ້ຍຊິດຊູເປີດເຕົາລີດໃຫ້ຮ້ອນແລ້ວລີດທັບເທິງເຈ້ຍນັ້ນຖິ້ມໄວ້ໄລຍະໜຶ່ງເກືອຈະດູດຄາບເປື້ອນອອກມາ
ເຮັດຄວາມສະອາດຄາບຂີ້ໝ້ຽງເຕົາລີດເຮົາສາມາດໃຊ້ຂີ້ເຜິ້ງທຽນໄຂຫໍ່ຜ້າແລ້ວໃຊ້ເຕົາລີດທັບກ່ອນຈະມາລີດທັບເທິງຜ້າທີ່ຫໍ່ເກືອອີກໜຶ່ງຮອບພຽງເທົ່ານີ້ຄາບຂີ້ໝ້ຽງກໍຈະຫລຸດອອກມາ
ເຮັດຄວາມສະອາດສິ່ງອຸດຕັນໃນຊ່ອງເຕີມນ້ຳຂອງເຕົາລີດໄອນ້ຳປະສົມນ້ຳສົ້ມສາຍຊູກັບນ້ຳແລ້ວເທລົງໃນຊ່ອງເຕີມນ້ຳໃນເຕົາລີດເປີດຄວາມຮ້ອນສູງສຸດຈົນນ້ຳຮ້ອນຈາກນັ້ນລີດເທິງຜ້າຝ້າຍແລ້ວກົດປຸ່ມໄລ່ສິ່ງອຸດຕັນອອກມາແລະໃຊ້ຜ້າເຊັດເຮັດຄວາມສະອາດໃນພາຍຫລັງ