ຄົນບາງຄົນເບິ່ງເຫັນຝັ່ງ ແຕ່ບໍ່ສາມາດ ຂ້າມຟາກໄປໃຫ້ເຖິງຝັ່ງໄດ້ ປຽບດັ່ງຄົນບາງຄົນມີຝັນອັນເລື່ອນລອຍ ແຕ່ບໍ່ສາມາດສ້າງຝັນໃຫ້ເປັນຈິງໄດ້ ອາດຈະເປັນຍ້ອນວ່າ ຝັ່ງຝັນຂອງຄົນໆນັ້ນ ກວ້າງໄກແລະຍິ່ງໃຫຍ່ ເກິນກວ່າຈະລອຍຂ້າມໄປເຖິງໄດ້ ຫຼືບໍ່ກໍບໍ່ມີຄວາມພະຍາຍາມ.

ຄົນບາງຄົນເຖິງແມ່ນຫຼຽວບໍ່ເຫັນຝັ່ງ ຫຼືເຫັນພໍເລືອນລາງ… ແຕ່ເຂົາກໍນຳພານາວາຊີວິດຂອງເຂົາ ມຸ່ງສູ່ຝັ່ງຝັນອັນຍິ່ງໃຫຍ່ໃນມະໂນພາບ ດ້ວຍການມີຊີວິດເປັນເດິມພັນ ຖ້າບໍ່ເຖິງຝັ່ງຝັນ ຈະບໍ່ຍອມຫັນຫຼັງກັບ ຈະບໍ່ຍອມຕິດຕໍ່ຄົບຄ້າສະມາຄົມ ກັບເພື່ອນໆ ໃດໆ ທັງນັ້ນ ດ້ວຍເຫດຜົນສະຖານະຂອງຊີວິດ ທີ່ຍັງບໍ່ປະສົບຄວາມສຳເລັດ. ການຄົບຄ້າສະມາຄົມກັບເພື່ອນຝຸງ ຍ່ອມມີຄ່າໃຊ້ຈ່າຍ… ຫາກບໍ່ຍອມຮ່ວມຈ່າຍ ຄົງໄຮ້ເຊິ່ງກຽດຍົດສັກສີ ແລ້ວຈະຈົມປັກ ຂາດແຄນຍາກຈົນຢູ່ຈັ່ງຊັ້ນ.

ຄົນບາງຄົນກວ່າຈະເຖິງຝັ່ງ ນ້ຳຕາແຫ່ງຄວາມເຈັບປວດ ບຶດໜຶ່ງຖືກທຸບຕີມີບາດແຜນເຕັມໂຕ ຮ້ອງໄຫ້ຈົນນ້ຳຕາເຫືອດແຫ້ງ ກາຍເປັນຄວາມແຂງແກ່ນທີ່ສຸດ ໃນປັດຖະພີ.

ຝັ່ງຝັນຂອງເຮົາ ຂ້ອຍແລະເຈົ້າ

ມັນໄກເຫຼືອເກີນ ແຕ່ເຈົ້າຕ້ອງສະຫຼາດພໍ ທີ່ຈະຫຼອກໂຕເອງວ່າ ມັນບໍ່ໄກດອກ ເພື່ອພິສູດພະລັງແຫ່ງໜຸ່ມສາວ ແລະຄວາມລ່ຳລວຍທີ່ສຸດຂອງຊີວິດ ໃນອະນາຄົດ.

100 ຄົນສຳເລັດ ກໍຕ້ອງມີ 100 ຄົນພະຍາຍາມ

100 ຄົນລົ້ມແຫຼວ ກໍຄື 100 ຄົນ ບໍ່ມີຄວາມພະຍາຍາມ

ເຈົ້າແລະຂ້ອຍຕ້ອງຢູ່ໃນ 100 ຄົນທຳອິດເທົ່ານັ້ນ.

ສຸທັດ ສີພົມ ຄົນຈຳປາສັກ