ເມື່ອວັນທີ່ 7 ກັນຍາ ເວັບໄຊຕ໌ເດລີ່ເມລ ລາຍງານຂ່າວອັນໜ້າຕື່ນເຕັ້ນຂອງວົງການດາລາສາດ ນັກວິທະຍາສາດຢືນຢັນການຄົ້ນພົບກາແລັກຊີທີ່ໄກທີ່ສຸດເທົ່າທີ່ມະນຸດເຄີຍຄົ້ນພົບ ດ້ວຍຄວາມຫ່າງໄກເກີນຈິນຕະນາການທີ່ 13,200 ລ້ານປີແສງ
ໂດຍທີມນັກວິທະຍາສາດຈາກສະຖາບັນເທກໂນໂລຍີແຄລິຟໍເນຍ ຫລື ມະຫາວິທະຍາໄລຄານເທັກ USA ໄດ້ເປີດເຜີຍວ່າ ກາແລັກຊີທີ່ຢູ່ໄກທີ່ສຸດເທົ່າທີ່ມະນຸດເຄີຍຄົ້ນພົບນີ້ ຄື ກາແລັກຊີ EGS8p7 ຢູ່ຫ່າງອອກໄປເຖິງ 13,200 ລ້ານປີແສງ (1 ປີແສງ = 9 ລ້ານລ້ານກິໂລແມັດ) ຊຶ່ງນັ້ນໝາຍຄວາມວ່າ ເຮົາກຳລັງເບິ່ງເຫັນອາດີດເມື່ອ 13,200 ລ້ານປີກ່ອນຂອງກາແລັກຊີແຫ່ງນີ້ ຊຶ່ງຕອນນັ້ນມັນຫາຈະກໍ່ຕົວຂຶ້ນໃໝ່ໆ ຈັກກະວານເອງກໍຍັງມີອາຍຸພຽງ 600 ລ້ານປີເທົ່ານັ້ນ (ຕອນນີ້ຈັກກະວານມີອາຍຸປະມານ 13,800 ລ້ານປີ)
ການຄົ້ນພົບກາແລັກຊີທີ່ໄກທີ່ສຸດນີ້ ນັບວ່າເປັນປະໂຫຍດຢ່າງຫລາຍກັບວົງການດາລາສາດ ເພາະນັກດາລາສາດຈະໄດ້ສຶກສາລັກສະນະຂອງກາແລັກຊີໃນໄລຍະທຳອິດ ທີ່ຈັກກະວານໄດ້ຖືກຳເນີດຂຶ້ນ ແລະ ເປັນສັນຍານທີ່ດີໃນການສຶກສາເຮັດຄວາມເຂົ້າໃຈວິວັດທະນາການຂອງຈັກກະວານ