ຂປລ. ທ່ານ ສີວອນ ວົງຄໍາຈັນ ເຈົ້າເມືອງໆນານ ແຂວງຫລວງພະບາງ ໄດ້ໃຫ້ຂໍ້ມູນຫລ້າສຸດໃນເວລາ 14:00 ໂມງຂອງວັນທີ 9 ກັນຍາ 2015 ນີ້ວ່າ: ຈາກ ເຫດການນ້ຳໄຫລຊຸ ຢູ່ຕາດຫ່ຽນເມືອງຂອງຕົນ ໄດ້ເຮັດໃຫ້ມີຜູ້ເສຍຊີວິດ 4 ຄົນ ແລະ ປັດຈຸບັນ ກູ້ຊາກສົບແລ້ວ 2 ສົບ, ຍັງ 2 ສົບບໍ່ທັນພົບ, ຂະນະທີ່ເຈົ້າໜ້າທີ່ ແລະ ຍາດພີ່ນ້ອງ ກໍາລັງເລັ່ງຄົ້ນຫາຢູ່.
ເຈົ້າເມືອງດັ່ງກ່າວ ໄດ້ລາຍງານຕື່ມວ່າ: ເຫດການດັ່ງກ່າວ ໄດ້ເຮັດໃຫ້ເຮືອນຊານຂອງ ປະຊາຊົນເສຍຫາຍ 24 ຫລັງ, ລວມທັງສັດລ້ຽງ ແລະ ເນື້ອທີ່ການຜະລິດຖືກເສຍ ຫາຍຢ່າງໜັກ. ແນວໃດກໍດີຍັງບໍ່ສາມາດ ຄາດຄະເນຄວາມເສຍຫາຍໄດ້ເທື່ອ, ແຕ່ໄດ້ມອບໃຫ້ເຈົ້າໜ້າທີ່ກ່ຽວຂ້ອງ ຂຸ້ນຂ້ຽວເກັບກໍາຂໍ້ມູນ, ໂດຍບ້ານທີ່ເສຍຫາຍ ຫລາຍທີ່ສຸດ ແມ່ນບ້ານນາຝາຍ, ສີບຸນເຮືອງ ແລະ ອີກຫລາຍບ້ານ ທີ່ລຽບແຄມຢູ່ສາຍນໍ້ານານ.
ຢ່າງໃດກໍຕາມ ປັດຈຸບັນອໍານາດການປົກຄອງແຂວງ ໄດ້ສົ່ງກໍາລັງເຂົ້າໄປຊ່ວຍເຫລືອ ປະຊາຊົນເບື້ອງຕົ້ນແລ້ວ, ພ້ອມນັ້ນທາງເມືອງນານ ກໍໄດ້ຈັດຕັ້ງຄະນະ ກໍາມະການ ກູ້ໄພເພື່ອຊ່ວຍເຫລືອ ປະຊາຊົນຜູ້ຖືກຜົນກະທົບ ແລະ ຄອບຄົວຜູ້ເສຍຊີວິດ.
ໃນວັນທີ 10 ກັນຍາ ນີ້, ເຈົ້າແຂວງພ້ອມດ້ວຍໜ່ວຍງານ ທີ່ກ່ຽວຂ້ອງໄດ້ລົງສຳຫລວດ ຄວາມເສຍຫາຍ ແລະ ໃຫ້ກໍາລັງໃຈແກ່ປະຊາຊົນ, ພ້ອມທັງຫາລື ເພື່ອຊອກຫາວິທີ ທາງແກ້ໄຂໂດຍໄວ.
ແຫລ່ງຂ່າວ:
