ດິນເຈື່ອນ ຄົນສູນຫາຍທີ່ພູສະແກນ, ເມືອງນານ ແຂວງຫຼວງພະບາງ
ມື້ນີ້ ວັນທີ 8 ກັນຍາ 2015 ເວລາບ່າຍ 2 ໂມງ ໄດ້ເກີດເຫດນ້ຳຊຸ ແລະດິນເຈື່ອນຢ່າງຮຸນແຮງ ໃນເຂດທ່ອງທ່ຽວຕາດຫ່ຽນ, ພູສະແກນ, ເມືອງນານ, ແຂວງຫຼວງພະບາງ. ເຮັດໃຫ້ບ້ານເຮືອນປະຊາຊົນ, ວັດວາອາຮາມ, ຜົນລະປູກ, ບ່ອນທຳການຜະລິດ, ສັດລ້ຽງ… ຂອງປະຊາຊົນໄດ້ຮັບຄວາມເສຍຫາຍ ຢ່າງໜັກໜ່ວງ.
ໃນຂະນະທີ່ຄາດວ່າຈະມີນັກທ່ອງທ່ຽວ ທີ່ກຳລັງທ່ອງທ່ຽວຕາດຫ່ຽນສູນຫາຍ ແຕ່ຂ່າວຍັງບໍ່ຢືນຢັນວ່າເປັນຍິງຫຼືຊາຍ ຄົນລາວຫຼືຕ່າງປະເທດ ແລະຈຳນວນເທົ່າໃດຄົນ.
ປະຊາຊົນກ່າວວ່າ ການເຂົ້າໃຫ້ການຊ່ວຍເຫຼືອ ຈາກທາງການນັ້ນບໍ່ສາມາດເຮັດໄດ້ ທ່ວງທັນກັບຄວາມຮຽກຮ້ອງຕ້ອງການ ເທົ່າທີ່ຄວນ ຈຶ່ງວອນໃຫ້ຂັ້ນເທິງເອົາໃຈໃສ່ ກຽມພ້ອມໃນການໃຫ້ການຊ່ວຍເຫຼືອ ປະຊາຊົນໃຫ້ວ່ອງໄວກວ່າເກົ່າ.
ລາຍງານຈາກ: ເມືອງນານ ແຂວງຫຼວງພະບາງ