ຈີນສະແດງແສນຍານຸພາບທາງທະຫານ ຈັດງານສະຫຼອງຄົບຮອບ 70 ປີ ໄຊຊະນະເໜືອຍີ່ປຸ່ນ ໃນສົງຄາມໂລກຄັ້ງທີ 2 ຢ່າງຍິ່ງໃຫຍ່ ທະຫານທຸກເຫຼົ່າທັບກວ່າໝືນຄົນ ສວນສະໜາມທີ່ຈະຕຸລັດທຽນອັນເໝີນ ລວມທັງການສະແດງເຮືອບິນສູ້ຮົບຫຼາຍເຖິງ 200 ລຳ ພ້ອມເຊີນຜູ້ນຳ ແລະເຈົ້າໜ້າທີ່ລະດັບສູງທົ່ວໂລກ ເຂົ້າຮ່ວມງານຫຼາຍກວ່າ 30 ປະເທດ.
ສຳນັກຂ່າວຕ່າງປະເທດ ລາຍງານເມື່ອວັນທີ 3 ກັນຍາ 2015 ນີ້ວ່າ ລັດຖະບານຈີນພາຍໃຕ້ການນຳພາ ຂອງປະທານປະເທດ ສີຈິ້ນຜິງ ຈັດງານສະຫຼອງໄຊຊະນະ ຂອງຈີນ ເໜືອຍີ່ປຸ່ນ ໃນສົງຄາມໂລກຄັ້ງທີ 2 ຄົບຮບ 70 ປີ ຢ່າງຍິ່ງໃຫຍ່ທີ່ສຸດ ໃນລະດັບທີ່ບໍ່ເຄີຍເກີດຂຶ້ນມາກ່ອນ ທີ່ບໍລິເວນ ຈະຕຸລັດທຽນອັນເໝີນ ໃນນະຄອນຫຼວງປັກກິ່ງ ໃນຕອນເຊົ້າຂອງມື້ນີ້ ວັນທີ 3 ກັນຍາ ໂດຍມີສວນສະໜາມຂອງທະຫານ ທຸກເຫຼົ່າທັບເຖິງປະມານ 12,000 ຄົນ ການສະແດງເຮືອບິນຮົບນັບ 200 ລຳ ລວມທັງການພາເລດຂອງຂະບວນລົດຕັງ ແລະລົດກບັນທຸກຂີປະນາວຸດ ຈຳນວນຫຼວງຫຼາຍ.
ມີລາຍງານວ່າ ອາວຸດຍຸດໂທປະກອນ ທີ່ຈີນນຳມາສະແດງໃນຄັ້ງນີ້ມີປະມານ 80% ຈາກຈຳນວນຊະນິດອາວຸດທັງໝົດທີ່ມີ, ອາວຸດຫຼາຍຢ່າງແມ່ນຫາກໍເປີດໂຕ ຕໍ່ສາທາລະນະເປັນຄັ້ງທຳອິດ ແລະມີແສນຍານຸພາບພຽງລູກດຽວ ກໍສາມາດຍິງເຮືອບັນທຸກເຮືອບິນຂອງສະຫະລັດ ໃຫ້ມຸ່ນກະຈາຍໄດ້.
