ໃນຕອນເຊົ້າວັນທີ 27 ສິງຫາ 2015 ນີ້ ຢູ່ທີ່ສະໂມສອນ ພະແນກສຶກສາທິການ ແລະ ກິລາແຂວງອຸດົມໄຊ ໄດ້ຈັດກອງປະຊຸມເຜີຍແຜ່ເອກະສານ ກ່ຽວກັບການໂຄສະນາ-ປາຖະກະຖາ ມູນເຊື້ອປະຫວັດສາດວັນຍຶດອໍານາດ 23 ສິງຫາ ແລະ ເອກະສານນໍາພາແນວຄິດ ຜົນງານການເຄື່ອນໄຫວ ຊີ້ນໍາ-ນໍາພາ ທີ່ພົ້ນເດັ່ນຂອງອົງຄະນະພັກແຂວງອຸດົມໄຊ ສະໄໝທີ VII ໃນໄລຍະ 5 ປີຜ່ານມາ ແລະ ເອກະສານທີ່ສໍາຄັນຂອງລັດອີກຈໍານວນໜຶ່ງ.
ໃນທາມກາງໄລຍະທົ່ວພັກທົວປວງຊົນລາວທັງຊາດ ພວມສ້າງຂະບວນການຂໍ່ານັບຮັບຕ້ອນ 2 ວັນປະຫວັດສາດ ເປັນຂະບວນການກວ້າງຂວາງ, ຟົດຟື້ນ ແລະ ກະກຽມກ້າວເຂົ້າສູ່ກອງປະຊຸມໃຫຍ່ຄັ້ງທີ X ຂອງພັກ ເວົ້າລວມ, ເວົ້າສະເພາະ ກໍ່ຄືກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງອຸດົມໄຊ ທີ່ຈະເປີດຂື້ນໃນໄວໆນີ້, ພະແນກສຶກສາທິການ ແລະ ກິລາແຂວງອຸດົມໄຊ ໄດ້ຖືເອົາໂອກາດການສ້າງຂະບວນການຕ້ອນຮັບວັນສໍາຄັນດັ່ງກ່າວນີ້, ເພື່ອໂຄສະນາ ປາຖະກະຖາເອກະສານມູນເຊື້ອປະຫວັດສາດ ທີ່ສໍາຄັນຕ່າງໆ ໃຫ້ສະມາຊິກພັກ ພະນັກງານ ໄດ້ເຊື່ອມຊຶມ ເຂົ້າໃຈ ຢ່າງເລິກເຊິງຕໍ່ກັບມູນເຊື້ອເຫດການດັ່ງກ່າວ.
ຈຸດປະສົງກໍເພື່ອແນໃສ່ສຶກສາອົບຮົມສະມາຊິກພັກ ພະນັກງານ ໄດ້ຮັບຮູ້, ເຂົ້າໃຈ ແລະ ເຊື່ອມຊຶມເລິກເຊິ່ງ ກ່ຽວກັບມູນເຊື້ອການຕໍ່ສູ້ພິລະອາດກ້າຫານ, ຄວາມສາມັກຄີເປັນຈິດໜຶ່ງໃຈດຽວເອກະພາບທາງດ້ານແນວຄິດ ຕໍ່ການນໍາພາຖືກຕ້ອງຂອງພັກປະຊາຊົນປະຕິວັດລາວ ແລະ ເຊີດຊູສະຕິລະວັງຕົວ ຕໍ່ກົນອຸບາຍຂອງອິດທິກໍາລັງປໍລະປັກ, ພວກກຸ່ມຄົນບໍ່ດີ ທີ່ໂຄສະນາບິດເບືອນ ສ້າງຄວາມແບ່ງແຍກ ລະຫວ່າງ ຜູ່ນໍາພັກ-ລັດ ແລະ ປະຊາຊົນບັນດາເຜົ່າ.
ກອງປະຊຸມເປັນປະທານຂອງ ທ່ານ ສົມດີ ສີລາທອດ ຮອງເລຂາຄະນະພັກຮາກຖານ ຮອງຫົວໜ້າພະແນກສຶກສາທິການ ແລະ ກິລາ (ສກຂ), ທ່ານ ພວງວິໄລ ອິນທະວົງ ຄະນະພັກຮາກຖານ ຮອງຫົວໜ້າ (ສກຂ), ທ່ານ ຄອນທະວີ ມິ່ງບຸບຜາ ຮອງຫົວໜ້າ (ສກຂ), ທ່ານ ສົມສະນິດ ສຸດທິວົງ ຄະນະພັກຮາກຖານ ຫົວໜ້າຫ້ອງການບໍລິຫານ (ສກຂ), ມີຫົວໜ້າຂະແໜງ, ຮອງຂະແໜງ ຕະຫຼວດຮອດສະມາຊິກພັກ ພະນັກງານ ວິຊາການ ພາຍໃນພະແນກ (ສກຂ) ເຂົ້າຮ່ວມ.
ພາຍຫຼັງຄະນະຈັດຕັ້ງໄດ້ສະເໜີຈຸດປະສົງ, ຜູ່ເຂົ້າຮ່ວມ ແລະ ຜ່ານມະຕິຕົກລົງຂອງເລຂາຄະນະພັກຮາກຖານ, ຫົວໜ້າພະແນກສຶກສາທິການ ແລະ ກິລາແລ້ວ ຜູ່ເຂົ້າຮ່ວມໄດ້ຮັບຟັງການສະເໜີຜ່ານເອກະສານຕ່າງໆ ທີ່ສໍາຄັນ ເປັນຕົ້ນແມ່ນ:
– ເອກະສານ ປາຖະກະຖາ ເນື່ອງໃນໂອກາດ ວັນຢຶດອໍານາດ 23 ສິງຫາ ຄົບຮອບ 70 ປີ ແລະ 40 ປີ ( 23 ສິງຫາ 1945 ແລະ 23 ສິງຫາ 1975 ຫາ 23 ສິງຫາ 2015).
ນໍາສະເໜີໂດຍ ທ່ານ ຄອນທະວີ ມິ່ງບຸບຜາ ຮອງຫົວໜ້າ (ສກຂ)
– ເອກະສານ ດໍາລັດຂອງລັດຖະບານ ວ່າດ້ວຍການປະຍັດມັດທະຢັດ ຕ້ານປາກົດການຟຸມເຟີອຍ ແລະ ເອກະສານ ບົດແນະນໍາຂອງກະຊວງການເງິນວ່າດ້ວຍການຈັດຕັ້ງປະຕິບັດຂອງປະທານປະເທດ ວ່າດ້ວຍຄ່າທໍານຽມ ແລະ ຄ່າບໍລິການ ສະບັບປັບປຸງໃໝ່
ນຳສະເໜີໂດຍ ທ່ານ ພວງວິໄລ ອິທະວົງ ຄະນະພັກຮາກຖານ ຮອງຫົວໜ້າ (ສກຂ)
– ເອກະສານ ນໍາພາແນວຄິດ ຜົນງານການເຄື່ອນໄຫວ ຊີ້ນໍາ-ນໍາພາ ທີ່ພົ້ນເດັ່ນ ຂອງອົງຄະນະພັກແຂວງອຸດົມໄຊ ຊຸດທີ VII ໃນລະຍະ 5 ປີຜ່ານມາ ແລະ ເອກະສານນໍາພາແນວຄິດ ກ່ຽວກັບການຊີ້ແຈງອະທິບາຍ ຫາງສຽງສັງຄົມທີ່ເກີດຂື້ນ ພານໃນແຂວງອຸດົມໄຊ.
ນໍາສະເໜີໂດຍ ທ່ານ ສົມດີ ສີລາທອດ ຮອງເລຂາຄະນະພັກຮາກຖານ ຮອງຫົວໜ້າ (ສກຂ).
ໃນໂອກາດນີ້, ທ່ານປະທ່ານກອງປະຊຸມໄດ້ຮຽກຮ້ອງໃຫ້ສະມາຊິກພັກ, ພະນັກງານ ຈົ່ງພ້ອມກັນນໍາເອົາ ເນື້ອໃນຈິດໃຈ ຂອງກອງປະຊຸມ ໄປຈັດຕັ້ງຜັນຂະຫຍາຍ ໃຫ້ແທດເໝາະ ແລະ ສອດຄ່ອງກັບສະພາບຕົວຈິງ ແລະ ໜ້າວຽກຂອງໃຜລາວທີ່ຮັບຜິດຊອບ ເພື່ອພັດທະນາຕົນເອງໄປຕາມແນວທາງຂອງພັກ-ລັດ ພ້ອມກັນສ້າງສາຜົນງານ ເພື່ອຂໍ່ານັບຮັບຕ້ອນເນື່ອງໃນໂອກາດວັນສໍາຄັນຕ່າງໆ ຂອງຊາດ.
ກອງປະຊຸມໄດ້ດໍາເນີນໄປໃຊ້ເວລາ 1 ຕອນ ຈຶ່ງໄດ້ປິດລົງດ້ວຍຜົນສໍາເລັດ ຕາມຈຸດປະສົງ.

ຂອບໃຈຂ່າວແລະພາບຈາກ: ສກຂ ອຸດົມໄຊ