ສຳນັກຂ່າວຕ່າງປະເທດລາຍງານວ່າ ໃນວັນພຸດທີ 26 ສິງຫາຜ່ານມານີ້ ບັນດາຜູ້ຄົນທັງຊາວແອັດສະປາຍ ແລະ ນັກທ່ອງທ່ຽວຕ່າງປະເທດ ໄດ້ຮ່ວມມ່ວນຊື່ນກັບງານເທດສະການ ໂທເມທິນາ ຊຶ່ງເປັນງານເທດສະການປະເພນີປະຈຳປີຂອງຊາວແອັດສະປາຍ ໂດຍປີນີ້ແມ່ນຈັດຂຶ້ນເປັນຄັ້ງທີ 70 ໃນເມືອງບູໂນນ ທາງພາກຕາເວັນອອກຂອງປະເທດ, ພາຍໃນງານແມ່ນມີການແກວ່ງໝາກເລັ່ນໃສ່ກັນຢ່າງມ່ວນຊື່ນ ໂດຍປີນີ້ແມ່ນມີລົດບັນທຸກໝາກເລັ່ນທັງໝົດ 150 ໂຕນ ຈອດລຽງລາຍຢູ່ຕາມຖະໜົນໃນເມືອງ ເພື່ອແຈກຢາຍໝາກເລັ່ນໃຫ້ແກ່ຜູ້ເຂົ້າຮ່ວມງານນຳໄປດຶກແກວ່ງໃສ່ກັນ.
ທັງນີ້ ເທດສະການດັ່ງກ່າວແມ່ນໄດ້ຖືກຍົກໃຫ້ເປັນງານ ການຕໍ່ສູ້ດ້ວຍອາຫານທີ່ໃຫຍ່ທີ່ສຸດໃນໂລກ ແລະ ກາຍເປັນຈຸດດຶງດູດນັກທ່ອງທ່ຽວຈາກທຸກມູມໂລກ ໂດຍສະເພາະແມ່ນຊາວອັງກິດ, ຍີ່ປຸ່ນ, ອົດສະຕາລີ ແລະ ສະຫະລັດອາເມຣິກາ ເພື່ອເຂົ້າມາຮ່ວມມ່ວນຊື່ນໃນສົງຄາມໝາກເລັ່ນປະຈຳປີ ຢູ່ປະເທດແອັດສະປາຍ.
