ຖ້າເອົາຕາມຄວາມເປັນຈິງ ໄຂ່ເນົ່າ ເຖິງແມ່ນເບິ່ງດ້ານນອກຂອງໄຂ່ ອາດຈະຍັງມີຮູບຮ່າງສີສັນທີ່ສວຍງາມກໍຕາມ ແຕ່ຖ້າເຮົາດົມເບິ່ງ ຫຼືທຸບໄຂ່ໃຫ້ແຕກອອກ ເຮົາຈະໄດ້ຮັບກິ່ນອັນເໝັນພິລຶກ ຢ່າງຫາທີ່ສຸດບໍ່ໄດ້.
ວິທີແກ້ໄຂຂອງຄົນລາວຕາມຊົນນະບົດແບບດັ້ງເດີມນັ້ນ ກ່ອນຈະໃຫ້ແມ່ໄກ່ຟັກໄຂ່ໃຫ້ເປັນໄກ່ນ້ອຍ ເຈົ້າຂອງໄກ່ຈະຈັບໄຂ່ສັ່ນເບິ່ງ ຖ້າໄຂ່ຄອນແມ່ນເພິ່ນຈະເອົາອອກໄປຕົ້ມກິນ ລົດຊາດແຊບກວ່າໄຂ່ດີອີກຊ້ຳ.
ແຕ່ຖ້າຫາກວ່າບໍ່ມີການກວດກາເບິ່ງໄຂ່ ປະໃຫ້ແມ່ໄກ່ຟັກໄຂ່ຈົນໄຂ່ສ່ວນຫຼາຍແຕກອອກເປັນໄກ່ນ້ອຍແລ້ວ ຈຶ່ງໄປກວດເບິ່ງໄຂ່ຕາມທີຫຼັງ ເຮົາກໍຈະໄດ້ໄຂ່ໄກ່ເນົ່າ ທີ່ໂຄດເໝັນ ຈະເອົາມາຕົ້ມແລ້ວປິ້ງຈີ່ຈັ່ງໃດມັນກະເໝັນ ເໝັນຈົນບາງເທື່ອຜູ້ກິນເກີດເຈັບຫົວກໍໄດ້.
ຖ້າປຽບໃສ່ກັບບັນຫາສັງຄົມກໍເຊັ່ນກັນ ການກວດພົບບັນຫາແຕ່ຫົວທີແລ້ວຮີບຟ້າວແກ້ໄຂແມ່ນເປັນເລື່ອງທີ່ດີ ເປັນປະໂຫຍດ. ແຕ່ການປິດບັງຄວາມຈິງ ບໍ່ເປີດເຜີຍເລື່ອງລາວ ປິດຫູປິດຕາ ກໍຈະເຮັດໃຫ້ບັນຫາທີ່ບໍ່ດີ ມັນຮຸນແຮງຂຶ້ນ ຈົນເຖິງຂັ້ນແກ້ໄຂບໍ່ຕົກກໍມີ
ຄືກັບໄຂ່ທີ່ປະໄຫ້ມັນເນົ່າສຸດຂີດແລ້ວ ເຖິງຂ້າງນອກຍັງສວຍງາມ ແຕ່ຂໍບອກວ່າ ຢ່າໃຫ້ມັນແຕກໃສ່ມືກໍແລ້ວກັນ ຈະເໝັນຕິດມືໄປຈົນທ່ານນອນບໍ່ຫຼັບເລີຍກໍໄດ້ ແລະມື້ໜຶ່ງຂ້າງໜ້າ ເຖິງບໍ່ທຸບ ໄຂ່ເນົ່າກໍຈະແຕກສົ່ງກິ່ນເໝັນໃຫ້ໄດ້ດົມຢ່າງບໍ່ອີ່ຕົນດັງຢ່າງແນ່ນອນ.
ບັນຫາຂອງໄຂ່ມັນມີຢູ່ແລ້ວ ຕ່າງແຕ່ວ່າເຮົາຊິສະຫຼາດພໍ ທີ່ຈະເລືອກກິນໄຂ່ຄອນ ຫຼືຊິກິນໄຂ່ເນົ່າ ເທົ່ານັ້ນເອງ
ແອັດມິນຊຽງ